letzte änderung am 26. november 2006
 

24. November 2006, 18:24 Uhr
 

Hallo Freddie,

äi morgen zeich ich dir was.

 Ä Loch!!

 Und ich habs gfunne, gans ällens.

Pass uff, des war so.
`S Fritzle unde Monello ham´n Papa abgelengt. Die zwä Blödeli ham nämlich
net wieder schnell genuch nein Blatz gekönnt und ham deswäche scho am Dörle
rumgekratzt. Und der Papa hat erscht sein Rucksack auf´n Disch am Condäner
lech müss, der hat nämlich ´n Rucksack voller Abbordiersache und Fuddersäck
mitgschläfft.

Und da habbich ä Loch gfunne!!! Ich hab erscht so gedan als müsset ich ämal
scheiß, dabei hab ich mich aber immer näher an des Loch hingschliche. Und
wie der Papa mit seim Schlüssele des Dörle aufschließ wollt, damit die zwä
Blödeli nei könne, da bin ich unne durch,  hä......

Erst iss nix passiert. Des hat ä ganze wäll gedauert bis unner Papa gsacht
hat "äi Rosso hast du´n Schuss? Schau dasde rüwer kommst". Aber ich hab mich
net ablenk lass. Bin erscht äweng am Zaun auf und ab, damit die annern Zwä a
senn wo ich bin, denn ich wollt ja net so sei, zumindest den Schwarze hätt
ich mitgenomme, denn den kanni gut gebrauch.

Aber der Papa hat dann zu denne gsacht, dasser halt middere ällens dräniert
und dann sinse mit´m ´rumgedabbt. Ich hab dann noch khört wieer gsacht hat,
lasst den Blödel, der kommt scho widder.

Tja, dann warn da awer noch äweng weiter hinne am Acker so orangene Männli
und die hamm´n Haufe von unnere Kumpels dabei kabbt. Da hab ich mir gedacht,
äi als alder Mändräler gehst ämal dahi und zeigst denne wie´s geht des
Gschäfft midde Sucherei. Die hamm nämlich Zeuch gsucht, was vorher die
orangene Männli zammgschossse hamm.

Hä, da häst ämal unnern Papa säh soll, wie der gerennt iss. Die ganze Zeit
lichder mit zwä Däibverbänd dahemm rum, aber da hadder vielleicht renn könn.
Naja, aber du kennst mich ja, in null komma nix war ich daobe an denne grüne
Scheune. Da habbich ´n gute Blatz kabbt. Ich hab säh könn wie sich unner
Kumpels angstellt ham und ich hab säh könn wo unner Papa rumgeloffe iss.
Weil gerennt iss der net lang. Der iss dann uffemal ganz gemühtlich geloffe.
Habb scho gedacht der sucht was anners. Und die Blödeli ham vielleicht
kheult. Ich gläb die hatme bis naus´n Einsiedl khört. Wärnse mit mir ´s wär
bestimmt geil worn.

Naja, wie der Papa scho ganz weit weg war und die orangene Männli mit unnere
Kumpels mit´m Auto fortgfahrn sinn, da hab ich mit´m Schwarze Mitleid kricht
und bin widder nunner geloffe. Bin awer net nei komme wäche dem scheiß Zaun.
Des Loch hawwi uffemal animmer gfunne. Hm.... dann iss uffemal der Papa
dagewese, hat mich angeleint (zum Wegrenne hab ich dann a ke Lust mehr
khabt) und dann hadder mich nein Platz nei gführt, hat mich am Bauzaun, da
wo im Sommer immer die Mama vom Bethoven hockt, angebunde und iss´n nein
Blatz nei gange.

De annern zwä hadder dann ganz viel Leckerli gäwe und hat mit denne noch
äweng mit denne Fuddersäck ´rumgschmisse. Danach simmer hemm. Ich gläb, dass
der äweng schtinkich war, der hat mich bis heut nachmittach nixma
angeglotzt. Gewasche hamse mich vor der Hausdür. Richdich beinlich war des.
Ä Bus iss vorbei gfahrn und alle ham gsenn, dass ich gewasche werd muss. Nur
weil ich äweng ausgschaut hab. Des hat der Papa zu de Mama gsacht "der schat
aus..."
Wie die dann gfracht hat warum, hadder mich nein Schutz näm woll, weil er
haddere erzählt, dass ich durch´n Loch bin, aber scho ziemlich schnell
widder da war. Dabei warn des wenigstens 20 Minudde. Kannst´n Schwarze
frach. Naja iss awer a besser so, weil die Mama kricht sonst ämal ´n
Herzinfaggt. Des sacht die immer zum Papa.

Am Nachmittach iss dann der Papa mit´m Fritzle zum Murphy gfahrn.
Kohlschwarz iss des widder hemkomme. Hä..., dann iss der a gewasche worn. Da
danach isser mit´m Schwarze ganz allens fort. Und wie se hemmkomme sinn, dat
der den vielleicht gelobt. Sooo´n brave Hund, sooo brav. Nur weil der Blödl
die komplette Runde, dawoma sonst  IMMER  an der Leine geh müsse, ganz ohne
Leine geh hat döff und net amal abkhaut iss.

Da danach isser dann notgedrunge mit mir a fort. Und weil der mich bis dahin
ke enzichsmal mehr angeguckt hat, da hab ich gedacht, naja der Klügere gibt
nach und hab halt äweng ´rumgschleimt. Hab´n fast auf´m ganze Schpaziergang
nur angeglotzt. So dasser scho fast überme drüber gschdolbeert iss. Und
wiema dahem warn, hab ich mich net näwem gelecht, sondern uffn druff. Dann
hadder nimmer anners gekönnt als widder mei Freund zu sein.

also tschüss bis morche,

Rosso

nach oben