vor lauder gebabbl, dass die eine die ander angerufn hat und ob der andern ihr händi geklinglt hat oder net, haut doch die alte die dühr zu und der schlüssl war noch dringschdeckt im audo drin ...
jetzt hammersch kappt! sooo ein scheissdreck ...!
kei geld, kei babiere, kei schlüssl - weil, die schlüssl von der wohnung, die warn ja auch im Twingo drinn mitsamst der handasche. jetzt warn mir dagschdandn und hamm dumm geguckt, aber sowas von dumm, des könnt ihr euch garnet vorsdell ...
... simmer erschdemal gassi gangn, weils ja sonst widder dunkl gewesn wär. swär aber grad wurschd gewesn, allawall dörf ich sowieso in Underbleichfeld net frei lauf, weil die hasn danzn. swird doch früüjahr und die hasnmänner suchn sich e frau - da guckn die net, ob einer wie ich daherkommt. und weil ich mir da ganz leicht ein von die hasnmänner fang könnt ...
mer hatse scho von weitm gsehn, wiese rumghüpft sinn mitenander, swar noch hell genuch ...
ganz leicht hättmer die kriech könn ...
shat mir gar kein spass gemacht, des gassi und drum wars auch gar net schlimm, dasses bloss e halbe stund war - außerdem wars kalt und der wind hat gepfiffn und nasse füss hammer auch kriecht ...

hinterher simmer durchs ganze dorf gelaufn und hamm den beemmweh gsucht, aber mir hammen net gfundn, weil den hat der Volker mitgenommn kappt irchndwohin und mir hamm ja net gewusst, wo der Volker hin is. also is die Bea heim, weil ihr händi leer war und ich und die alte sinn zu unserm audo, damits uns keiner wechfängt und ham gewart. e viertlstund später is die Bea widder kommen und mir hamm weiter gewart und gewart ...
und dann hammer uns e daxi beschdellt, des wo uns heimfährt, dassmer den zweitn schlüssl fürn Twingo hol könne. zuerschd hammer aber bei unserer nachbarin angerufn, ob die überhaupt daheim is, weil wenn die net daheim gewesn wär, hättn mir ja gar nix mach könn, weil die hatn schlüssl zu unserer wohnung und ohne den hättn mir net nei in die wohnung gekönnt ...

also, wo warich?
ach ja, wie mir so auf des daxi gewart hamm, is plötzlich der beemmweh ankommn mitm Volker. der hat den Gerd gsucht kappt, desweechn warer fort gewesn - des hamm die zwei weiber aber nadürlich widder net mitkriecht kappt - tüüühpisch, gell?

der Gerd hat versucht, den Twingo aufzumachn mitm langn steckn, so ein wie die audoaufbrecher auch hamm, die wo immer die fremdn audos mitnehmn. der Gerd hat den aber net, weiler fremde audos mitnimmt, sondern der is audomehchaniker. den holn sich leut, die wo sich aus ihrm audo ausgschberrt hamm - so wie mir - und der macht des audo dann auf.
aber soll ich euch was saach? der Gerd hatn net aufgebracht, unsern Twingo! der Twingo iss scheints net so leicht aufzukriechn, wie beisbiehlsweis die merzehdesse oder die beemmwehs oder borsches .
in der zwischnzeit hat der Volker des daxi fortgschickt.
und dann hat uns die Bea, weil, wie gsacht, der Gerd unser audo net aufgebracht hat, nach Würzburch gfahrn, die alte hatn schlüssl bei der nachbarin gholt und aus der wohnung dann den audoschlüssl und dann simmer widder nach Underbleichfeld gsaust, hamm unser audo von draussn von der brährieh gholt und uns erschdemal bei der Bea undm Volker ausgeruht ...

da warnmer dann also zweiehalb stund lang mit blöhdsinn beschäfdicht gewesn - und des daxi, des wo umsonst kommn war, hammer auch noch bezahl müss...!

sacht doch selber ...
. ein scheiss bassiert eim, wemmer net aufbasst ...!!!

sternzeit 2.480,7

des ganze gelände vom verein habbich ich heut absuch müss, weil sich da seit neustm immer fremde leut rumtreibn und zeuch hinstelln und anders zeuch forttdraachn. und außerdem hamm die da obn e kleins hüttle hingebaut und da stinkts gaaanz verdächtich nach klumpfüss, aus dem hüttle raus ...
ihr sehts, ich muss allawall arch aufbass!
ich bin garnet ferdich worn mit rumschnuffln und war fix und ferdich, wie ich eendlich ferdich war - des heisst, ferdich warich ja eichndlich noch gar net, aber die alte hat fortgewollt, weil SIE ferdich war mit ihrm ...
und dann simmer auch noch fortgfahrn, wie die zweifüsser middach gessn kappt hamm ...



swar kei schönns wetter - shat genieslt, der wind is gangn und die sonn hat bloos ab und zu e mal rausgeguckt aus die wolkn und aufm weech in die Rööhn hats soo gereechnt, dass mir scho gedacht hamm, mir müssn widder heimfahr und der Thomas hatt gsacht, dasser bei demm wetter ganz bestimmt net ausm beemmweh aussdeicht!
in der Rööhn war richdichs Rööhnwetter - neblich, dass mer fast nix gsehn hat und schnee! den hamm die leut von da obn ann rand von die strassn gschauflt kappt mit große audos - bloss damit ich net richdich lauf hab könn und bis ann hals neigsunkn binn. des war furchdbar, sachich euch! ich habb hüpf müss, damit ich üüberhaupt aus dem schnee rauskomm. sogar der Chris hat sich schwer gedahn und dabei hat der vieeel längere füss als wie ich!



dafür wars in dem wald wo mir gelaufn sinn umso intressander. da war der schnee noch ganz dick geleechn und die hasnspurn und die von die andern viecher warn so deutlich, dasse sogar die zweifüsser gsehn hamm ...



leider hammse mich net alleins lauf lass und den Chris auch net, schad ...
swär zu gfährlich im wald hammse gemeint, weil da könnt ja einer komm und die zweifüsser dotschiess, aber wenn mir dabei sinn, dann traun sich die jäächer net ...
ich und der Chris mir warn hinderher soo müd, dass mir scho im audo geratzt hamm. ich binn erschd richdich wach worn, wie mir die freche katz vom Chris direkt neis maul lauf hat woll - die sdellt sich doch datsächlich frech hin, guckt mich an und maunzt rum!
und wennse mich genuch angeguckt hat, dann kommtse her und schnufflt an mir rum und will ihrn kopf an mich reib - jaaa ...! des dät die mach, aber die alte hat dann angsd, dass die mich beisst und dut mich wech ...
ICH dät ganz gern emal annere rumschnuffl ...

sternzeit 2.490,7

heut is fasching - heut verkleidn mir uns, hat die alte gsacht ...
von weechn UNS - MICH hattse verkleid! und die andern auch! schäm mussmer sich als anständicher hund, wie die ein verschammeriern! und dabei hätts ja noch schlimmer komm könn, weil zuerschd hat die alte vorkappt, mich als deufele zu machn - zum glück hattse aber kei hörnli kriecht ...!
statts, dasses dann gelassn hätt, isse auf e klohreiche idee kommn und hat mir vom Thomas flüücheli mach lass ...
mit denne habbich dann stuuundnlang rumlauf müss ...
e "hellsäindschl" dät ich sei, hat die alte jedm derzählt  - guckt euch blooos net die fottos an ...!









der Leo war auch dabei an fasching, abe der hat glück kappt ...
weil der hat sich nämhmlich net verkleid müss und drum gibts vom Leo auch kei so e lächerlichs fotto - da braucht der garnet so dreckich zu grinsn ...





gottseidank hamm wenichstns die fremdn zweifüsser mitleid mit mir kappt und mir extra viele guddelichs gebn.
hmmm ..., des war dann eichndlich widder garnet so schlimm ...

irchndwie krutscht die alte auch scho widder mit die reisedasche rum ...
und "ich muss unbedingt n neuen falkplan haben" hattse gsacht ...
des klingt net gut, ich glaub, mir fahrn widder fort ...
wahrscheinlich ans mehr - swar nämlich die red davon dass des gar net lusdich is, dass e fähre untergangn is, wo mir doch auch mit die fähre fahr müssn ...

aber auf jedn fall fahrm mir näxte woch erstemal widder nuntern Chiemsee, soviel weissich und diesmal nemme mir die Lene mit ...
... und da untn mussich widder stuuuuundnlang stillsitz, des gfällt mir gar net ... ... und dass die alte sich lauter zeuch kauft, des wose überhauptnet braucht - und hinterher bin ich widder schuld gewesn - des gfällt mir scho gleich üüüberhaupt gar net...
 

nach oben

letzte änderung am 12. februar 2004

sternzeit 2.474,7

mein lieber hund, wie kann eim bloss so was blöhds bassier .?
näääh ..., nääh ...
mir hamm uns ausgschberrt - oder vielmehr die alte hat ...!

 

middn in der brährieh warnmir gstandn unds audo war zu!