|
 |
|||||||||||||
 |
|||||||||||||
|
letzte änderung am 7. mai 2004
... da warmer dann fast e stund lang gstandn und sinn immer widder bloss e baar meter weiterkommn - swär besser gewesn, mir wärn die zeit in Holledau gassi gangn gewesn ... keiner hat gewusst, warum mir da eichndlich rumgschdandn sinn, weil da war nix, kei kabutts audo und nix - bloss weiter vorn da hammse gebuddlt kappt und die ganze strass kabuttgemacht. im radio hammse auch nix erzählt und erschd wie mir scho laaaang weiterfahr hamm könn, hammse was von 10-km-langem-stau-bei-Behringersdorf gfaslt ... wie mir in Aschau ankommn sinn, wars scho widder dunkl und wisst ihr was, lusdicherweis hamm mir in dem selbn zimmer schlaf dürf, wie beim letztn mal. die geechnd habbich auch scho gekennt - bloss dass halt überall schnee rumgeleechn war, und dass die auch grosse haufn ausm schnee gemacht hamm - denne ihre haufn warn sogarn noch vieeel grösser als wie die in der Rööhn gewesn sinn ... 
über die nacht - oder vielleicht solltich besser die zwei nächte sachn - schweichich lieber ... die alte hat sich die halbe nacht rumgewälzt wie e wahlross und hat net in dem fremdn bett liech und scho gar net richdich schlaf könn. andauernd hattse mich gschdört mit ihrm gejammer und gschdöhn und dauernd isse rumgelaufn ... und dann sinn da auch noch irchndwelche leut durchs haus gschlichn und ich bin hellwach gewesn und hab gut aufgebasst. die hamm sich dann auch garnet rein zu uns getraut, wiese mich brummn ghört hamm - ich habse jedesmal vertriebn ... ... am näxtn früh warn die alte und ich entschprechnd müd, wie mir aufgschdandn sinn ... 
des seminar selber is mich ja widder emal gar nix angangn. ich und die Lene hamm bloss daliech und brav sei müss. am erschdn daach warn auch gar kei intressante hünd in dem saal unds war stinkelangweilich ... "drähning zur verhaltnskorrektur" hats gheissn, und die alte und die Bea warn schwer beeindruckt von die skälliwaks, wie die des so machn mit die bösn hünd ... die skälliwäcks hamm zwischndurch immer widder gfraacht, was die leut an dem verhaltn von die hünd im fideoh aufgfalln is und der alten is oft garnix aufgfalln gewesn und die andern auch net, oder sie hamm jeder was anders gsacht - die alte hat zur Bea gsacht, dass da widder 10 leut 10 verschiedene hünd gsehn hamm jedesmal ... naja, vielleicht wars halt auch nur schwierich zum sehn, weil die skälliwäcks hamm die hünd aus denne fideohs ja oft gsehn und lang und net bloss jedes mal 5 minutn, wie mir alle ... 
was die zweifüsser vorn derzählt hamm. des hat MICH jetzt auch net sooo intressiert. vielmehr intressiert hamm mich die guddelichs, die zwischndurch immer widder mal runtergfloochn kommn sinn. leider hamm viel zu seltn die andern hünd im saal gegauzt oder sinn rumgelaufn, sonst hättich wahrscheinlich vieeeel mehr guddelichs kriecht, aber leider warn diesmal nur brave hünd bei dem seminar und drumm muss mer halt nemm, wasmer kriecht ... die hünd, die da warn, warn wie gsacht eichndlich alle recht langweilich, zumindestns die am erstn daach. am zweitn daach wars dann scho anders ... am zweitn daach war e baar meter von uns wech e junger rotzlöffl gsetzn und hat dauernd frech zu uns rübergeglotzt! die Lene is scho zu mir in mein korb gekrochn kommn - blöd, weil dann ja ICH da rausgemüsst hab, weilich ja schließlich net mit der Lene in eim korb liech kann - und ich hab mich auf der Lene ihr deckle leech müss. jetzt hat aber der rotzlöffl mich noch vieeel frecher anglotz könn und ich hab überhaupt nimmer schlaf könn, weil der ja netemal mehr 3 meter von mir wech gsetzn is und ich den ja jetzt auch anstier hab müss. wehe, der hätt sich auch noch frech beweecht! dem hättich gholfn! des saachicheuch!
in der erstn bause is sei fraule dann auch noch mitm rüber zu uns kommn, weilse gemeint hat, die Lene und ich könntn mit dem eweng sbiel, aber die alte hat ihr gemeinerweise verratn, dass der genau meine kampfklasse hat ... die frau hat gelacht und gemeint, ich wär wohl gröössnwahnsinnich, weil ihr hund doch 4mal so groß wär wie ich ... ... die soll sich bloss nix einbild, mit DEM wär ich scho lang ferdich worn ...! und jetzt egrad ... ... aber die alte hat mich net gelassn ... ... ich hab ja noch netemal drübermarkier dürf, wie der im saal den blummedopf angebinklt hat ... ... den ganzn daach net ...! gemein ...! alle andern hamm beschdimmt da hingmach dürf - mer hat ja gsehn, dasses des pfützle immer größer worn is ... bloss ich hab widderemal net gedürft!!!!!!!!  
in die bausn simmer jedesmal nausgangn in schnee und sinn rumgelaufn. unsern altn weech vom letztn jahr hammer ja noch gekennt und drum simmer diesmal auch emal woanders gelaufn. der schnee is mir bis an bauch gangn und ich hab hüpf müss, damit ich vorwärtskomm an manche stelln. die Bea und die alte hamm uns auch noch guddelichs dahin gschmissn, wo der schnee am diefstn war und dann hammse gekichert und gegigglt und des ganz lusdich gfundn, wenn mir uns geblaacht hamm, die guddelichs ausm tiefn schnee rauszupfriemln - und aaaandauernd hammse uns verfolcht mit die fottoapperate, aber die alte hat widder über die hälft von die fottos lösch müss, weilse nix worn sinn - auch nix neus ... des hattse davon kappt ... abnds hamm die zweifüsser jedesmal jede e bier gebichlt und fernseh geguckt. hinterher warnse alle zwei blau wie die veilchen - JAAAA ...! des hamm die selber gsacht ...! ehrlich ...! also ICH hätt euch des net verratn ...
in dem grossn saal, da hamm die zweifüsser vorne also erzählt und erzählt und fideohse gezeicht von hünd mit "verhaltnsproblemn". in den einen hat sich die alte richdich verliebt, der dätere gfall, hatse gsacht und dasse den am liebstn mit heim nemm dät, wenner da gewesn wär .... des fand ich gaaaanz arch gemein! ICH soll mich immer "benehmen" und "brav sein" und der ...? der hat sei eichene leut beiss dürf und DEN will SIE mit heim nemm ... ... die spinnt doch, die alte! naja, gottseidank war der ja net da und ich glaub auch net, dass demm sei leut den hergebn hättn, weil sonst hättnse sich ja net monatelang die müh gemacht mitm und so en haufn geld bei die skälliwäcks bezahlt, nä?!?! auf der heimfahrt hat die alte immer noch von dem gschwärmt ... ... pffft ..., en schähferhund dät sie woll! ...
naja, mir hamms rumgebracht, des seminar. diesmal hat die alte sich arch beherrscht und fast nix eingekauft, wasse net braucht - bloss e paar guddelichs hatse mitgenommn, weil, die bücher hammer scho fast alle und die wo mir noch net hamm, die brauchn mir net. des schbielzeuch war auch net intressant und die kitteli vom letztn mal, die hammse GOTTSEIDANK diesmal nimmer dakappt. hammer en haufn geld gschbart ... mir müssn ja näxtn monat mit der fähre fahr, gell? da könne mir jetzt net so viel geld ausgebb ... die heimfahrt war wie immer und stinkelangweilich ... im mai fahrn mir scho WIDDER nuntern Chiemsee *stöhn*. diesmal is des seminar im nachbardorf, aber da warn mir auch scho e baarmal und mir schlafn dann dort, wo sonst immer die Bea gschlafn hat, weil die fährt ja im mai net mit. die Lucky und die Lene könne vielleicht scho gut genuch jaach, die brauchn nix mehr aufm seminar zu lerne. erst im herbst dürf die Lucky mitfahr und die alte und die Bea lerne dann, wiese uns hünd richdich massier müssn - vielleicht kapierts dann auch endlich emal die alte ... da wo mir im mai wohnen tun, in dem bauernhof, die hamm rehe und anders viechzeuchs - ich freu mich scho drauf ... im mai fahr ich des erste mal mitm Chris zusammn - DES wird bestimmt ganz besonders lusdich ...! net dass ihr denkt, ich wär noch nie mitm Chris bei em seminar gewesn, näääh ..., aber des is unser erstes jaachseminar und mit dem Chris kann ich bestimmt gut jaach - schließlich bringn die uns bei DEM seminar bei, wie mer NOCH besser jaacht als wie mir des scho könne, oder ...?!?! ich bin jednfalls gschbannt - ich hoff ja net, dass die uns widder den ganzn sbass verderbn ... des heisst, wenn mir im april die fähre überleebn duhn, ich und die alte ... sternzeit 2.503,7 swar garnet komisch gestern bei die altn leut ... die alte hat widderemal so en anfall kricht und gemeint, sie müsste mich "erziehen" - bääääh ...! sitzn bleib habbich gsollt und wenn ich nur eiiiin einzichs mal mei füss auf dere frau ihrn schoss nauf hab, da hattse mich gschimpft! und runtergezoochn von dem schoss ... immer wieder ... ich hab mich gar nimmer richdich aufs essn konzentrier könn ... und irchndwann hattse mich einfach fortgezerrt und in die hinterste ecke geleecht. da habbich bleib müss und zuguck müss, wie die andern die ganzn gutn guddelichs alleins aufgfressn hamm. und ich war dortgeleechn und hab gewart, dasse mich widder holt und dann habbich mei füss nimmer auf den schoss naufgschdellt, weil - sicher is sicher -, net dass ich gar nix mehr abkriech von die guddelichs ... der Thomas hat den Chris andauernd geärchert und die altn leut hamm ihr freud dran kappt. allawall simmer nur noch ganz weeniche, die wo zu die altn leut gehn ... der eine alte mann, der wo immer ganz besonders auf uns wart, der is scho ganz draurich und will gar kein mehr von uns e guddelich geb ... von unserm platz kann ich euch gar nix neus erzähl, weil mir ja wie gsacht am wochnend net da warn und ich also auch net weiss, obs neue hasn da hat und ob die mäus scho widder rumlaufn ... und ob die klumpfüss widder da warn, ihr wisst scho, denne wose des häusle gebaut hamm nebn unserm platz, weiss ich auch net ... sternzeit 2.508,7 also,ich geh ja net gern nein wald, weil ich da nie alleins lauf dürf ... und weils der alten auch net gfällt, wenn ichse am strick hab, laufn mir gottseidank net so oft da rum. schö wärs da ja scho ... ... wenn der blöde strick halt net wär ... jetzt hamm die zweifüsser aber widderemal nein wald gemüsst, weil einer guck muss, wasses so alles da gibt und wie lang mer braucht und so zeuch und ob sich des überhaupt rendiert, da rumzulaufn ... "Walderlebnispfad" nennt sich des und mer soll was lern könn da ... soll ich euch was saach ...? NIX kannste da lern, gar nix! sis alles beschiss - auf dem ganzn weech! die bringn die zweifüsser bloss auf dumme gedankn ... mit steckn auf die kaputtn bäum rumhau solln die zweifüsser - und des nennese dann musik und bei em andern baum, da soll sich einer ans eine end hinschdellt und e anderer ans andere und dann gucknse von die zwei seitn nei, und des heisst mer dann delefonier ... ... uns hammse über die baumstämm drüberlauf und - hüpf lass ... ... und nei en altn baum sinse neigekrabblt und hamm die tür zugemacht. dann kammer lausch, was der wald so sacht - die angeber! die hörn doch üüüberhaupt fast garnix, was der wald so erzählt ... ... en sandkastn gibts da, da hängn dinger, wode die spurn von die verschiedene viecher mit nachmach kannst, die wo im wald rumlaufn - die echtn spurn hat natürlich keiner von die zweifüsser gsehn, weil blind sinnse ja auch halber ... ... den höxtn baum von der welt hammse ausgeleecht mit baumstämm und den dickstn auch - da kammer entlang- und drumrumlauf - auch alles net echt ... ... und weiter hintn, da ware ganz alter, hoher - und diesmal sogar e lebicher - baum gstandn. um den rum hammse e häusle gebaut, womer die treppe naufgekönnt hat - gaaanz hoch nauf ... weilmer da durch die stufn durchguck kann, hamm einiche von uns hünd, und eine von die zweifüsser - ich verrat euch net, wer des war - angst kappt. in die andern bäum drumrum hammse vööcheli neigsetzt, aber kei echte, näääh ..., des warn auch bloß widder bescheissvööchl!!!, und die zweifüsser hamm mit lange rohre sich die vööchl anguck könn aus der näh, weil mit ihre eichene auchn hättnse die ja auch widder net gfundn .... ... noch weiter hintn is e krumme brücke gewesn, die geht net nur auf und ab und zick und zack - nä, die geht auch über nix drüber als über luft. der Thomas hat vorgelesn, dass des e meddidazionsbrücke wär aber die alte meint, die schineesn, die baun solche brückn geechn die bösn geister. weil die bösn geister - nä? - die könne nur gradaus lauf und net zickzack und wenn jetzt einer von dene hinter dir her is, dann musste bloss über so e bösegeisterbrücke drüberlauf ... ... und weil die zickzack geht und der böse geist, der kann ja nur gradauslauf - da fällt der dann von dere brücke nunter und du kannst dich rett ... ich weiss ja net, was die zweifüsser sich denkn, machmal glaubich, die denkn gar nix, die spinne einfach! ICH jednfalls glaub net, dass die bösn geister bloss gradaus lauf könne, aber die solln bloss komm, dann beissichse ...! ach ja, irchndwo mittn ins gebüsch hamm die zweifüsser, die den weech gebaut hamm, viecher gschdellt. wennsde da von weitm nüberguckst, dann denkste, da iss was ...!!!!!!!! ... aber wennste hinkommst isses bloss e stück holz, des wo aussieht wie e reh oder e karnickl oder e wildsau ... also mich könne die damit ja einmal verscheisser, aber e zweitsmal bin ich da net drauf reingfalln und der Chris auch net ... ... en unechtn fuxbau hammse auch dakappt, sogar mitm fux drin - aus blasdik ... ... und kei 10 meter weiter wech war e echter fuxbau und ich schwörs euch - da war beschdimmt e echter fux dringhockt mit seine kinder ... ... aber DEN hamm die zweifüsser nadührlich net gsehn und ich hab net hingedürft ... ihr sehts, lauter dumms zeuch. des, was wirklich intressant gewesn wär, des hamm die zweifüsser gar net mitkriecht ... ... einehalb stund simmer durchn wald gschlappt und für was? - für nix ...! naja, gut, für nix stimmt net ganz, intressant wars scho, es daachblättle zu lesn im wald, weil da is ja alles widder ganz anders als wie da wo mir sonst rumlaufn ...
der geburtsdaach vom Flocke e baar daach später war aber scho intressanter. da hats wenichstns was gscheits zum essn gebn. die Christl hat widder jedm von uns hünd en kuchn gemacht kappt - DER war lecker ...! meiner jednfalls, die von die andern habbich net gsehn, weil mir die kuchn, wie immer, einzln kricht hamm, damit die Christl uns beim essn fottografier hat könn und drum hammse immer die dühr zugemacht ... bloss der ganze reis in dem kuchn drinn ... da kannste biesl ...! ohne ende ...!
am näxtn daach sinn die alte und ich mitm Onkl Manfred zum Onkl Horst gfahrn, weil der auch geburtsdaach kappt hat. da wars net so schöö ... erst hammer eewich lang mitm audo fahr müss. ein wind war und gereechnt und ghaachlt hats. shat den vauweh vom Onkl Manfred bald von der audobahn geweeht und gsehn hattmer auch nix vor lauter nebl! und wiemer in Emsdeddn ankommn sinn, da war der Onkl Horst garnet lusdich, weil sei frau net da war. die is nämlich krank und drum musse allawall woanders sei und der Onkl Horst dürfse nur ganz wenich besuch, weilse ebn so krank is und drum isser ganz arch draurich ... beim Onkl Horst isses garnet schö, da liecht überhaupt nix zum essn rum - netemal aufm bodn unds stinkt ganz arch nach die weissn stäbli, dierer sich immer nein mund steckt - mei fell hat noch daachelang gschdunkn, sacht die alte ... dafür war unser hotel direkt nebn der EISNBAHN geleechn und ich hab endlich was zum tun kappt ... am liebstn wärich ja naus ... alle baar minutn isse vorbeigerennt, die eisnbahn, die ganze nacht lang ... am näxtn daach hammer den Onkl Horst nochemal besucht, aber er war immer noch draurich und mer hat nix mitm anfang könn, net einmal hatter mich gschdreichlt ... drumm simmer auch bald heimgfahrn. einmal hammer lang rumgschdeh müss, weil en haufn leut ihr audos kaputtgemacht kappt hamm und die bolizei erscht widder aufräum hat müss. sogar der Diffdoff war da. einer von die zweifüsser war nämlich so arch kaputt, dassmern net mitm audo ins krankeleuthaus bring hat könn und drum hat der dokter den Diffdoff gerufn und der is gfloochn kommn und hat den kaputtn zweifüsser mitgenommn ... und, wie wenn des wochnend net scho aufreechnd genuch gewesn wär, is uns auch noch e licht aufgangn - in unserm audo! und da is die alte dann ganz nerwöhs worn, weil, weil unser audo nix saach kann, drum machts immer lichtli an, wenns krank is und wenn DES lichtle angeht, dann is des audo arch krank und kann mimmer anhalt, wenns rennt ... wie der Thomas und die alte vorne neigeguckt hamm, hammse gsehn, dass in dem ein behälter fast nix mehr drin war und drum is die alte am näxtn daach ins audokranknhaus gangn ... warum der behälter jetzt halber leer war, hamm die auch net rausgfundn, weil rauslauf dut nirchndwo nix, es is alles dicht. drum hammse in dem audokranknhaus den behälter einfach widder vollgemacht und seitdem leuchtets lichtle nimmer ... ich hoff ja, dass des audole jetzt widder gsund is und net an irchndn baum fährt, wenns schnell rennt weils nimmer anhalt kann. wo mir doch näxte woch mit die fähre fahrn ... stellt euch emal vor, mir fahrn hintn von nei, in die fähre und unser audo kann nimmer anhalt und mir fahr vorne widder naus - direkt nein wasser ...! ... da müssert die alte ja dersauf! die kann nämlich net schwimm ... ja, und der geburtsdaach vom Onkl Manfred, der war auch noch ... da binnich aber immer der einziche hund und zum essn kriechich da auch nix, da kann ich noch so verhungert guck ... en haufn leut warn da, andauernd binnich dene im weech gewesn und hab mich woanders hinleech müss - ich war froh, wie ich widder heimgeh hab dürf ...
|
