letzte änderung am 6. februar 2004

sternzeit 2.443,7

weil mir so spät in der nacht erst heimkommn sinn, hammir den halbn daach vom erstn daach verschlaafn und warn erst richdich wach, wiemer scho widder in Rimpar beim resteessn gsetzn sinn. aber eichndlich war da auch noch nix mit uns los - noch netemal der Flocke hat lust zum raufn kappt, von mir ganz zu schweichn. ich bin halt auch nimmer der jüngste ...
mir sinn den ganzn daach rumgegammlt und abnds hammer die Lara undn Felix getroffn. die sinn extra aus Heidlberch raufgfahrn mit ihre zweifüsser, weilse mich seh hab hamm woll. den Felix hättich jetzt net gebraucht, aber über die Lara habbich mich arch gfreut und die Lara sich auch, aber weil der Felix dabei war, hammir net miteinander schbiel könn, des war zwar schad, aber da kannste halt nix mach. der Felix hätt uns ghaut, weil die Lara doch sei frau is ...

apropoppo hau ..., jetz hättich doch wirklich noch fast krach mit meim bestn freund Flocke kriecht! nääh ..., näähhh ...

DEN  knochn wollt der Flocke nämlich net mit mir teil ...
naja, gottseidank hat die Christl ne dann fortgeräumt, bevor mir uns ghaun hamm ...

hmmm ..., was war sonst noch los?
ach ja ...! die alte hat geburdsdaach kappt.
an dem daach wose den geburdsdaach kappt hat, da hammer eichndlich net gfeiert - eeeeiiiichndlich ...
die alte hat alle leut gsacht kappt, dasse net feiert an demm daach, sondern später mit der Helga zamm e groooße feier macht; aber, hatse gsacht, sie dät sich freu, wenn einer käm - und dann sinnse fast alle kommn, obwohls garnix gscheits zum essn gebn hat.

middachs um 2e iss scho losgangn, da is die erste "nur emal ganz kurz vorbeikommn zum graduliern" und dann sinn die Lucky und die Lene kommn mit ihre leut. da habbich dann zu duhn kappt, dass mir keins von denne weiber nei mei haus geht, oder mir mei bäll wechnimmt. mit denne zwei isses aber noch gangn, weil essn steht bei mir nie rumm, da muss ich sowieso immer schau, dass ich net verhunger und muss alles schnell aufess, wennichs hingschdellt kriech, weil sonst isses fort, die alte is gemein - die dut mir, nur um mich zu ärchern, immer gleich nach e baar minutn es essn widder wechnemm - wenn ich da net schnell genuch bínn ...
später isses schlimm worn, wie der Chris kommn is und der Flocke und der Beethovn und die Alice und ganz zum schluss noch die Gina und der Sputnik ... ich hoff, ich hab jetz kein vergessn - jednfalls war ich dann beschäfdicht!
der Chris klaut nämlich! und die Gina auch ...
und der Sputnik hat sich einfach nei mei neus haus geleecht - bloss, weiler mich immer in seim korb liech lässt, denkt der, er kann da einfach ...

ein gewusl war des in meine kleine wohnung. überall warn zweifüsser rumgsetzn und hünd! die Lucky hats scho garnet eausghaltn vor angst. die vieln fremdn hünd und die dührn die sich beweecht hamm und die kloospülung - des kann die Lucky alles net verdraach und drum hat die Bea sich mitere nei die küch hock und wart müss, bis der Volker aufgessn kappt hat, dann sinnse fort - schad ...

dafür sinn der Manfred, die Helga und der Thomas kommn ...
die alte war schwer beschäfdicht, die hat en haufn gschenke ausback müss - hauptsächlich warn des ja gschenke für mich, aber ich will emal net so sei und lassere ihr freud ...
zum essn is die net kommn - naja, des schad dere emal gar nix ...

des häusle zum mitnehmn für mich - des, wo der Sputnik sich so frech neigeleecht hat und von da drinn aus den Flocke angebrummlt hat - hammer e woche später gut brauch könn, wiemer in Schöllkrippn auf dem ädschillidyfanndaach warn. da habbich dann wenichstns net frier müss in dere kaltn halle ...

die Edith hat uns frühs abgholt, weil die da auch mitgemacht hat - oder vielmehr der Chris . die alte und ich mir hamm net mitgemacht. die alte kann nimmer so renn, die is da scho zu alt dafür. mir hätts nix ausgemacht, aber die alte lässt mich nimmer hüpf, weilse angst hat, dass ichs widder neis kreuz kriech wie letzts jahr schonemal. des habbich euch ja erzählt, dass ich e baar daach net richdich lauf hab könn, gell?
mir warn also dortgsetzn und hamm zugeguckt, ob die des auch alles richdich machn und die alte hat fottografiert ...
... und dann sinn die fottos widder nix worn, weil die alte, die is nämlich zu blöd zum fottografiern und drum warn die fottos alle vieeel zu dunkl und mer hat nit viel drauf gsehn ...
... des hattnmer ja scho öfters ...
mer hätt ja vielleeeeiiiicht den altn fottoapperat mitnemm soll und net den neun, der wo fuurchtbar viel geld gekost hat und mit demmer jetz net umgeh kann, weil der sooooo viel macht - alles außer kaffekochn, sacht die alte ...
... habbmussmern - aber fottografier kammer dann net mit ...

des war was, wie mir ankommn sinn! katzn ..., üüüberall katzn! die sinn frei rumgerennt und hamm sich gar net vor mir gfürcht, nääää ..., eine is sogar herkommn und hat mich angfaucht.

aber der größte stress warn die klumpfüss ...
... die warn auch überall!
... stellt euch des dochemal vor - ICH - von die klumpfüss umzinglt!!!!!!!!!

scho wie mir auf den parkblatz gfahrn sinn, sinnse rumglaufn und hamm zweifüsser rumgführt und auf sich sitzn kappt.
auf dem weech in die halle nei musstn mir sogar zwischn die wohnungn von die klumpfüß durch wo die, die daheim warn, neugierich rausgeguckt und mich beschnufflt hamm. IIIIIHHHHH ...., ein neugierichs volk!
wenn die schnuffln, dann pfludern die dir ins gsicht nei, dassde ganz nass bist hinterher.

war ich froh, wie mir endlich anne vorbei warn ...
den ganzn daach lang habbichse schnaufn ghört und gechn die wänd haun nebnan - scheinbar hammir se gschdört beim schlafn, ich weiss net, sie warn jednfalls recht laut. und einer, der hat immer mit seim kopf ghaut, immer im hin und her - wie die hosbidalismuskinder, hat die eine frau gemeint und mit die auchn hatter gerollt, dassde es weisse gsehn hast. mir war scho eweng mulmich, des kann ich euch saach, weil der war diiirekt nebn uns gewohnt ...

in die pausn, simmer mitenander gassi gangn und widder - üüüüberall, wode hingeguckt hast - klumpfüss! so viele habbich mei lebdaach noch net auf eim haufn gsehn ...!
irchndwie habbich die nas voll von klumpfüß für die näxte zeit ...

der chris, der dschalba, der jobo, der lucky und der willow - die hamm den ganzn daach schaff müss in dere halle. die warn abnds, wiemer heimgfahrn sinn, alle dotmüd. ich kann des versteh, weilich ja scho vom zuguckn alleins müd worn bin und von dem ganzn klumpfuß-stress ...

sternzeit 2.458,7

die woche drauf iss des grosse fest gschdiechn ...

dass mir scho vor woochen eingeladn hamm, habbich euch ja erzählt, gell?!

also, des war so ...
... mir hamm innem altn keller gfeiert - der mann, dem wo der keller ghört hat, hat gsacht, dass der scho fünfhunnert jahr alt is und dass unter dem keller nochemal e keller wär, der wo diirekt in den fels neighaut worn is, wo die festung obn drauf steht und dass, wenns da neireechn dät, des wasser einfach versicker dät, weil der ganze keller aus muschlkalch is - ich hab ja immer gedacht, muschln gibts nur im wasser ...
naja, jednfalls da untn, in dem keller unter dem keller, da wärs ganz kalt, von weechn die feuchdichkeit und so, nä?!

am abnd vor demm fest simmer schonemal hingfahrn. die zweifüsser hamm blumme zammgebundn und kerzli neigedahn, und die disch hammse gedeckt und lauter so zeuch. für mich hats nix zum duhn gebn, also binnich nur rumgeleechn, hab zugeguckt wie die schaffn und mich gelangweilt. einmal is die Tina runterkommn. der Tina ghört des hotel wo der keller drinnis. die hat mich noch nie leid könn. scho wiese e kleins bäbi war, hatse mich immer angegauzt und mich beiss woll. an dem daach, hatse mich erschd bloss blöd angeglotzt und dann hatse sich auf mich gschdürzt! wenn die alte se net grad noch am halsband derwischt hätt, dann hat die blöde kuh mich doch datsächlich noch gebissn! - aber so isses nochemal gut gangn. ich hab bloß ein klein schmarrn am buckl davongetrdaachn ...
danach hat die Tina nauf gemüsst in ihr wohnung - des hattse davon kappt, so!
am näxtn daach simmer um 5e abnds schon hingangn - weil um 6e hats ja losgeh soll - und hamm noch gholfn des büffeeh aufzubaun.

ja, und so nach und nach sinn dann meine gäste kommn:

der Cento war zuerschd da, dann so nach und nach der Flocke, der Chris, der Beethovn, die Lara und der Felix, der Jobo und der Dschalba  und ganz zum schluss - wie immer halt, weil die Sputniks ja niiiieee ferdich wern und überall zu spät kommn - sinn die Gina und der Sputnik kommn ...
es sinn auch en haufn zweifüsser aufgedaucht, so um die fuchzich stück rum oder mehr, mer hat kaum noch tret könn vor lauter zweifüsser - die warn üüüüberall rumghockt und rumgschdandn.
mir hünd hamm uns mit UNSERE zweifüsser ganz nach hintn zurückgezoochn, damit mir zusammn bleib hamm könn und hamms uns unter die disch gemütlich gemacht. die andern zweifüsser - ich musses übrichens widder sach -, die, die net zu uns geköhrt hamm, die hamm sich den gaanzn abnd über gewundert, dass mir so viele sinn und uns trotzdem net dotbeissn und dassmer uns gar net hört ...
... halt auch wie immer ...
gschwitzt hammer recht, weil der bodn warm war und ein gemurml und gekicher von die zweifüsser war ...
... den gaaanzn abnd lang und später ...
... später hamm die gsungn! iiiiigitt ... ein gegröhl war des. und die hamm gar nimmer aufghört, den ganzn restlichn abnd hammse rumgsungn, dass mer als anständicher hund net schlaf hat könn. naja, mir hättn auch so net schlaf könn, weil des büffeeh ganz vorne war und mir ja - wie gsacht - ganz hintn gsessn sinn, is ständich einer von unsere leut aufgstandn und hat sich was zum essn oder trinkn gholt ...

hmmm ..., e maus hammse auch noch kappt, die war innem drathkäfich gsetzn, weil, die hätt ja nie für uns alle gelangt und dass mir kein krach kriechn, hammsese in dem käfich kappt. warum die die überhaupt mitgebracht hamm, weissich net, die eine frau hat nur gsacht, dass des keine von der Helga ihre mäus is, sondern e wilde, grad an dem daach gfangte aus Waldbrunn ...
ich hab ja den ganzn abnd ghofft, dass ICHse zum schluss kriech, aber naja, ich glaub, die hamm die widder lauf gelassn in Waldbrunn ...
ganz spät abnds, wie scho viele gäst wech warn, hat die Jeanett den Sputnik gholt und hatn nimmer hergeb woll. weil der Sputnik, der wärs, hatse gemeint, den dätse gern mitnemm, wennse jetzt nach dene riffa auswandert. die Anke war scho richdich stinkich und hat mitm Steffn rumgebäbbert, dassere ihrn hund gfällichst widder hol soll, net, dass die noch wirklich mitm abhaut ...
und wisst ihr, was des schlimmste da dran war? kei einzichs mal hat sich der Sputnik umgedreht, der hat sich doch datsächlich einfach so klau lass!!! NÄÄH, NÄÄÄ H ...!!!

um 3e in der früh sinn die alte und ich erst neis bett kommn ...
ach ja - und gschneit hatts an dem abnd auch noch und alles war blötzlich ganz weiss ...
... mehr wie an weinachdn ...

nach oben