letzte änderung am 4. november 2004

sternzeit 2.715,8

ich hab mich ja scho gewundert kappt, warum die alte so spät aufgschtandn is ...
um halber 8e hats dann geklinglt und zwei zweifüsser sinn vor der dühr gschdandn ...
der eine hat angst vor mir kappt und wollt zuerschd gar net in mei wohnung nei und dabei habbichm bloss gsacht kappt, er soll vorsichdich sei und mir nix davondraach oder kaputtmach, aber schon hat mich die alte ausgschimpft - dabei is SIE  immer die erschde die wo sacht, die hünd dürfn ruhich knurr, des solln die zweifüsser nenet verbiet, weil des gar kei akression wär, des denkn die leut bloss immer und hamm angst - so wie der mann ...
ebn ...! ich habm bloss gsacht, dassichn beobacht ...
... ganz genau beobacht ...
der andere zweifüsser hat kei angst vor mir kappt. der hat selber en hund daheim.

ja, und dann hamm die uns doch dadsächlich unsern ofn geklaut ...!
... jetz, wos kalt wird und mir sowieso scho daachelang friern abnds ...
... die hammn die treppe nuntergedraachn und uns en andern dafür hingschdellt. und dann hammse ewich gebraucht, bissen zammgebaut kappt hamm. die musstn den ebarmal widder ausenanderleech, weil der so kombliziert wär und widder zammbau ... aber irchndwann hammse sogar festgschdellt, dass die asche in dem ofn datsächlich net brennt, wemmer e feuerzeuch hinhält - und des holz auch net ...
e neus loch nei die wand hammse mach müss und des alte zumach - ein krach war des und ein dreck ...
... und gemessn hat der eine - aber mir solln kei angst hab, die gasleidung wär absolut dicht ...
und dann hatter noch etliche andere dinger wechgemacht und neue hingemacht ...
mit gas mussmer halt vorsichdich sei, hatter gsacht und drum däter so lang brauch, weil mir ja beschdimmt net in die luft fliech wolln ...
... hmmm ..., eichndlich ...
... fliech wär scho net schlecht, da dätich dann endlich auch die vööchl kriech und die flederMÄUS. und die entn ...
aber ich glaub, der hat des anders gemeint, weiler auch gsacht hat, dass wemmer net gaanz vorsichtich is, eim der ofn um die ohrn fliech dät ...
... so e riesnding ...
... nä, des willich net, dass der in meiner wohnung rumfliecht ...
mir hättn uns ja en andern altn ofn nemm könn - es brunnowerk hat da genuch davon rumstehn, den hättmer sogar für ummesonst kriecht, aber des sollmer net mach, hat uns der zweifüsser gsacht kappt, wierer schonemal dagewesn is und festgschdellt hat, dass unser alter ofn ganz kaputt is und mern wechschmeiss muss. weil wemmer sich so en altn ofn holt, der wo schonemal laang wo gschdandn war und den dann im audo eweng rumschmeisst, dann müssertmer auch angst hab, dass der es fliechn gelernt hat ...
 

die zweifüsser warn zum schluss alle ganz begeistert, weil der ofn so schö wär und der mann hat gemeint, dasser froh is, dasser der altn gfällt, weiler scho angst kappt hätt und widder mitnemm hätter des schwere ding net mööch ...
er hat erzählt, dass sei meister ganz entsetzt gewesn wär, weil die alte sich soe doiersch ding kauft - einfach so, am delefohn - ohne dassesichs vorher anguckt ... und die alte hattm dann erzählt, dasse sich so auch schoe audo gekauft hat - mittn in der nacht, im finstern, womer nixmehr gsehn hat und wiese dann am näxtn daach von der arbeit heimkommn wär, da hättse en gelbn merrzehdes in der strass stehn gsehn und gedacht: "schöö, des is beschdimmt mei neus audo ..." - weil dassder merrzehdes gelb is, des hattere der mann gsacht kappt, der wohnere verkauft hat ...
... und er isses dann auch wirklich gewesn ...
naja, die kenne halt alle die alte net, sonst wissertnse, dass die merkwürdich is ...
... und seltsam ...
... die macht andauernd so komischs zeuch ...

also gut, wiese ferdich warn, dem ofn beim warmmachn zuzuguckn, sinn die zwei zweifüsser gangn und mir auch. und weil der ofn immer noch so gschdunkn hat, hat die alte beschlossn, dasse mich mitnimmt zum schaffn und ich im audo wart muss bisse ferdich is. und dann habbich ich zwei stund lang dumm guck müss. wenichstns sinn öfters krankeleutaudos kommn und ich hab bei denne mitsing könn - sonst wärs mir ja noch langweilicher gewesn ...
 

hmmmm ..., was sonst noch ...?
aufm flohmarkt warnmer e baarmal und hamm alts geraffl verkauft für unsern verein ...

 

des heisst, mir hünd hamm nix verkauft, mir hamm nadührlich aufgebasst, dass uns keiner was davonträächt ...
des verkaufn hammir die zweifüsser mach lass ...

des festle war toll, weil die alte da den ganzn daach kei zeit für mich kappt hat und ich hab widderemal ganz für mich alleins den blatz von vorn bis hintn durchsuch könn und mäus grab und ...
 

... und überall warn hinterher wiese alle fort warn widder die krümeli rumgeleechn und ich hab widder en haufn arbeit kappt, die alle zammzulesn ...

soo schö war des, dass mir erscht heimkommn sinn, wies ganz dunkl war ...
... und am näxtn daach habbich dann bauchweeh kappt, ganz arch. und drum binnich mit der altn zum dokter. der hat an mir rumgedrückt und mit seim hörrohr ghorcht an mir und dann hatter mir mei bluht wechgenommn und aufn disch hatter mich geleecht und nochemal an mir rumgemacht - rönnchn hatter des genennt - des hatter gemacht, weiler seh hat woll, ob in meim bauch irchndwas drinn is, was net neighört ...
... und dabei wars mir doch sooo scho ganz elendichlich ...
dann hammer wart müss und noch netemal die katzn in ihrm käfich hamm mir spass gemacht vor lauter bauchweh ...
wiemer e zeitlang gewart kappt hamm, hat uns der dokter erzählt, dass mei bluht ganz in ordnung wär und dass alles drin is, was neighört und es is nix drin, was net neighört.
des hat die alte schonemal gfreut und wiererere gezeicht hat, dass in meim bauch auch nix drinn is, was net neighört, warse richdich glücklich - weilse scho angst kappt hat, der dokter schneid mirn bauch auf ...
aber dann hat der dokter gsacht, dassmer sieht, dassich schbondühlosn hab, vorn und in der mitte und hintn und dassmer da garnix mach kann, des wär halt so und mer könnertse auch net obberier, weils 6 oder 7 stück sinn, und dass ich jetz nimmer so viel hüpf dürf und dassich vielleicht öftersch en "hexnschuss" kriech, so wie letztes jahr im winter ...
... des wär, weil ich alt bin, hatter gemeint und des wär jetzt aber net sooo schlimm, weilich klein wär und dassich dadran net sterb muss und ich müssert jetz auch noch kei tablettn kriech, weil mir noch nix weh däht dadran - bloß ab und zu ...
woher will DER des wiss, ob mir was wehduht, hä ...???
... da war die alte dann nimmer froh ...

... mittwochs übn mir jetzt widder untn bai die Norma aufm barkblatz, solang mir obn aufm blatz noch kei licht ham ...
... und beim Willi warich auch noch eingelaadn, weil sei mamma geburdsdaach kappt hat.
aber für mich is nix rausgschbrungn bei dere einladung, außer generv vom Willi, weil, shat ja bloss die mamma vom Willi geburtsdaach kappt und net der Willi ...

sternzeit 2.732,8

 

sternzeit 2.738,8
 

der Onkl Horst und die Tante Helga hamm scho auf uns gewart. die hamm sich gfreut, dasse mich gsehn hamm und hammich alle zwei gschdreichlt, obwohl die Tante Helga eichntlich hünd mit kurze nasn und runterhängende ohrn lieber hat. aber mich maachse scho. ich hab mich aber auch dafür refangschiert und erstemal die ganzn krümeli vom bodn aufgelesn. bei die zwei isses arch warm, weil der Onkl Horst immer so friert. und außerdem duhn die alle zwei ganz arch viel kwalm mach. die duhn immer, wennse eins von die weissn stäbli ausgemacht hamm, gleich widder e neus anbrenn. drum is in der wohnung vom Onkl Horst immer soe archer nebl und wenn ich heimkomm von dene, dann mussich jedes mal bad, weil ich so schdink ...
nachdem die zweifüsser was gessn kappt hamm, simmer gassi gangn. do obn in Emsdettn stehn ganz viele bäum rum wo der Onkl Horst wohnt. da simmer rumgelaufn und ich hab ganz neu was zum schnuffln gfundn. läsdich war bloss, dass auche kleins drecktriefermädle rumgelaufn is - a bäbi noch und die hat dauernd mit mir sbiel woll und hat garnet versteh könn, dass ich zum duhn hab. war ich froh, wie ich die los war. abnds war ich dann im wald - des war auch schö, aber vieeel zu kurz. ich hätt den ganzn daach da zubring könn ...

 

dohtmüd warich, wie mir abnds nei unser hodell sinn, obwohl ich eichndlich gar net sooo viel gschafft kappt hab an dem daach ...
des hodell war e ganz alts haus - seit 350 jahr steht des da scho rumm und leut wohne drin.
wie mir abnds noch eweng untn in unserm hodell ghockt sinn is blötzlich die dühr aufgangn und en haufn leut mit hölzerne schuh an die füss sinn reinkommn ...
DIE hamm vielleicht einen krach gemacht ...! ich hab dene aber gleich gsacht, dasse net so rumtrampl solln, weilichse sonst beiss ...!
... und dann warnse auch ruich ...
naja, net ganz ruich, weil die hamm doch ihr drinkes drink müss und dabei viel rumkicher und so müss ...
da obn in Emsdettn, näh?, da machn die zweifüsser nähmlich ejedesmal, wenn einer vonne es erschde mal e kleins bäbikind kricht, en "altn brauch" ...
was des is, weissich net, jednfalls rottn sich dann, wenn des zweifüsserbäbi da is, die freund von die mamma und dem babba von dem bäbi zamm, kaufn e grosses rosinebrot und mit dem brot aufm langn brett laufnse mit die holzdinger an die füss durch die ganze stadt, von einer kneibe in die ander, bisse bei dem bäbi sinn ...... und in jeder kneibe kriechnse was zum trinkn und dann gehnse widder fort, zur näxtn kneibe ...
und wennse dann bei dem bäbi sinn, dann gebnse der mamma und dem babba des brot ...
... wennse dann noch steh könne, weil die hamm ja dann scho sooooooviel trinkes kappt und manchmal sinnse dann hackedicht, sacht der mann, dem wo unser hodell ghört ...

später sinn die alte und ich nauf gangn in unser zimmer und dann is widder des alte spiel losgangn, des ihr ja scho kennt ...
... jedesmahl, wennich grad eingschlafn war, is die alte herausn rumgelaufn, weilse in dem bett net schlaf hat könn und frühs hatse widder rumgejammert ...

frühs simmer dann zweimal durch die stadt gelaufn, bevormer nochemal zum Horst gfahrn sinn. da dort simmer dann noch e baar stund gebliebn. die zweifüsser hamm geraatscht und ich hab mich von dene alln kraul und sdreichl lass.
dann simmer widder heimgfahrn ...

des war des wochnend ...
ach ja ...
... des schönste hättich ja fast vergessn ...
... weil mir ja soo lang im audo gsetztn sinn, an die zwei daach, habbich der altn halt erlaubt, mich zu massiehrn und mit mir rumzuschmusn. da war uns alle zwei dann net so langweilich und die alte hat sich auch über was freu könn ...

nach oben