letzte änderung am 26. dezember 2004

sternzeit 2.744,8

scho widder underweechs gewesn ...
diesmal in die andere richdung - nunterzus ...
... und gottseidank auch widder gemühtlich im körble hock könn und schlaf ...
die Lucky hat nähmlich e neus audo kriecht und jetzt hattse en fensterblatz ganz hintn drin und ich hab den gaanzn hintern sitz für mich ganz alleins kappt.

mir hamm widder in unserm altn zimmer gschlafn - in dem hodell kenne mir uns aus, da gibts wenichstns kei böhse überraschung. die fahrt war net schö und weil mir erschd späht fortkommn sinn, hammer auch net unser übliche lange bause mach könn, bloss kurz naus zum biesln und widder fort - gereechnd hats auch, unds war abnds scho nach neune, wie mir in Aschau druntn ankommn sinn.

 

in der erschdn nacht habbich net viel gschlafn ...
andauernd hats irchndwo gebollert und gerumplt, aber ich hab net im kloh schlaf dürf, weil die fliesn zu kalt wärn, näh ..., ich hab in meim korb bleib müss, obwohls da garnet sicher war ...
bis mittn in der nacht is des geboller zugangn ...
die alte hat noch gemeint, wenn die morchn nacht auch widder solang keechln, dann wird des noch lusdich wern ...
aber die zweite nacht wars dann ruich ...

frühs simmer nüber gfahrn zum wörkschopp und sinn da auch nochemal rumgelaufn im wald, weil, weil mir da ja noch net warn vorher, simmer viel zu früh ankommn. kalt wars und gereechnt hatsa auch scho widder, gfrorn hammer alle 4 ...
in dem wörkschopphaus hammer uns dann im kreis - mir warn 6 hünd - zu unsere zweifüsser hinleech müss. ich hab mich ja gewundert, dass mir bloss so e baar warn, bis die alte sich zu mir aufn bodn ghockt hat und angfangt hat, an mir rumzufummln ...
zwei daach lang hamm die an uns rumgedatscht - dellingtn datsch halt ...
zwischndurch hatt die Mahdinah unsere zweifüsser gsacht, wieses mach müssn und hat immer widder nachgeguckt, obses auch richdich machn. manchmal hamm sich auch die zweifüsser geechnseidich bedatscht, oder die Mahdinah hat anne rumgemacht oder ne erzählt, wasse mach müssn und wie und wofür des helfn duht, wennse uns bedatschn oder wogeechn ...
och, ich hätt des noch länger wie die zwei daach ausghaltn, swar richdich gemühtlich ...
... dasitz und dirn belz durchkraul lass von vorne bis hintn und von obn bis untn ...
... meistns jednfalls - an mei pfotn lassich nähmlich kein und an mei maul auch net, oder an die ohrn ...
nääh ..., des maachich net ...
und, weil die alte mich net festhalt hat dürf, habbichse da auch net dran rummach lass. die Mahdinah hat dann immer gfraacht, ob die alte mitkriecht hat, warum ich fort bin, oder dass ich mich immer ganz schlau so hinsetz, dasse nur an besdimmte schdelln grabbl kann ...
die alte hat des nadührlich widder garnet gerafft kappt ...
die hat mich doch datsächlich immer festhalt woll, aber da hattere die Mahdinahre dann auf die finger gebn.
die zeit is schnell vorbei gangn und schwupps wars middach und mir sinn draussn rumgelaufn ...
die andern warn auch draussn unterweechs und die rote hat mich e baarmal angeknurrt, da binnich dann lieber net hingangn zuere. so ejungs weib und so garschdich scho ...
die alte hat gemeint, ich sollmir nix draus mach, die ackiehdas wärn alle eweng grandich...

 

die andern zwei, die noch da warn, die hamm auch immer widder rüber zu uns gebrummlt und die eine is sogaremal rüberkommn.
boah ..., hat die sich aufgereecht ...
... aber sie hat net mich gemeint ...
näh ..., die Mahdinah hat bloß mit ihrm sduhl geraatscht kappt ...

der erschde daach war recht schnell rum. mir hamm noch e große runde gedreht und sinn dann in unser hodell. ich sachs euch, hünd, ich war sowas von mühd ...
und wie dann auch noch der fremde hund vom nachbardisch mich dauernd frech angeglotzt hat, da habbich dem einfach bescheid saach müss ...!
naja, die Lucky hat scheints scho gschlafn, weilse net mitmach hat woll und drum binnich halt alleins ausgschimpft worn ...
 

am zweitn daach vom wörkschopp hamm die zweifüsser angfangt, uns hünd einzuwickln mit bindn wie die muhmien und damit hammer rumlauf müss und die Mahdinah hat ihrn senf dazu gebn. die alte hat sich auch einwickl lass müss und hat dann sach müss, wie sich des anfühlt, dasse eingewicklt is. aber die alte hat nix gschbürt, des war eichndlich auch net anders wie net eingewicklt hattse gsacht. aber die andern zweifüsser hamm behaupt, sie steht ganz anders da und däht sich anders beweech und däht auch "anders rüberkomm" ...
HÄH ...???
... und ich und die andern hünd dätn sich auch anders beweech, hammse gsacht. mir war des wurscht, was die saachn, ich hab en ganzn haufn guddelich gfundn und aufgfressn und wenn ichse alle gfressn kappt hab, hat die alte mir neue gschmissn ...
des hattere die Mahdinah aber dann verbotn, weilich mich angeblich net konzentriert habb und bloß guddelichs gsucht hab ...
naja, ich habja scho widder schlimme vermuhdungn, weil die alte hat sich gleich beim wörkschopp zwei von dene bindn gekauft ...

sternzeit 2.767,8

den geburdsdaach vom Flocke seiner mama hamm die zweifüsser gfeiert - des war schö, weilich da widder emal die Lara gsehn hab ...
und den Felix ...
die sinn nähmlich widder da. die hamm aber allawall gar net viel zeit, weil die jede minute ihrene leut helf müssn beim rennofiern. die hamm sich en altn durm gekauft, der wo scho über 300 jahr alt is und ganz schö kaputt. da gibts en haufn zum rebariern und zum neumachn, weil im näxtn frühjahr, da wolln die da neizieh und da muss dann alles ferdich sei.

wie mir e woche später im dunkln mit fackln durch die brährie gschlichn sinn, warn die Lara und der Felix auch dabei. zuerschd hamm mir uns alle obn aufm blatz getroffn und sinn dann mitenander losgelaufn. jeder von die zweifüsser hat e brennende fackl kappt und des war auch gut so, weils scho gaanz dunkl war und mir uns sonst gar noch verlaufn hättn ...
swar intressant, so im dunkln rumzuschleichn ...
da findmer ganz andere viecher und spurn - überall raschlts und hüpfts rum und des sieht im licht von die fackln dann richdich gschbenstisch aus ...
... bloss die zweifüsser, die hamm einen solchn krach gemacht, dass ich nix fang hab könn - die viecher hamm uns ja scho von weitm ghört und sinn davon und vom strick hamm die uns auch net runtergelassn, dassmer hinterne hergekönnt hättn. die zweifüsser hamm wie gsacht soo laut getratscht und gelacht, dassmersch in würzburch drin ghört hat. die alte hat gemeint, dass mir vom dorf druntn aus gsehn beschdimmt ausgsehn hamm wie der kuhglucksklahn, bloss die weissn kuttn hättn noch gfehlt und der Thomas, der wo aufm blatz gebliebn is und den bunsch warmgemacht kappt hat, hat hinterher derzählt, dass des richtig gschbenstisch ausgsehn hat, wie unsere zweifüsser mit die fackln im gänsemarsch hintereinanderhermarschiert sinn. von uns hünd hattmer bloß die helln gsehn. die Lara, den Felix und den Willi net und mich scho gleich garnet. wenn ich jetzt net am strick ghängt wär ...
mir warn über e stund underweechs - solang wie die fackln halt ghaltn hamm - bis naufs Wolfsbild simmer gewallt und widder zurück ...
und weil mir obn ums Wolfsbild rummgelaufn sinn, hat der Thomas gemeint, mir hamm ringlreihn gedanzt mit die fackln ...
schöner wärs nadührlich gewesn, wenns net gereechnt hätt, oder wenns gschneit hätt und alles weiss gewesn wär ...
näxtes mal machen mir des erschd im januar, wenns nimmer so siffich is obn in die felder ...





hinterher warn mir dann noch im kondähner ghockt. da hatt der Thomas schö warm gemacht kappt und die zweifüsser ham bunsch gsüfflt und blätzli gessn - und mir hünd auch ...

nach oben