letzte änderung am 30. dezember 2005

sternzeit 3.085,9

habbich euch eichndlich scho erzählt, dass mir nimmer bei die Norma üb dürfn . ?
aaaalso ..., ich hab euch doch erzählt, dass mir im winter, wenns dunkl is, bei die Norma übn am mittwoch, nä . ?
des heisst, gaaanz früher, da hamm mir uns immer bei uns in Würzburch bei die Baywa getroffn und hamm da aufm barkblatz blöhdsinn gemacht. die letztn zwei jahr warn mir dann am mittwoch immer aufm barkblatz von der Norma gewesen - aber heuer hamm die uns nimmer hab woll, wiemer gfraacht hamm ...
... des wär zu gefäährlich ...
... hammse gemeint ...
... und dann warmer dagschdandn ...
hmmm ., erschd hammer net gewusst, womer hinsolln - sgibt ja net soviele blätz in Rimbahr, wos ruich is UND hell. aber gottseidank hat uns der Manfred nochen scheinwerfer gschenkt, weil sonst isses zu dunkl obn aufm blatz und unser zweifüsser dähtn sich die füß brech.
der Manfred hat uns scho letzts jahr en scheinerfer gschenkt kappt, für wenn mir abnds nocheweng zammsitzn, dass mir auch die mäuslöcher noch finden und die zweifüsser ihr essn und mit denne zwei lichter könne mir jetz auch üb und auf unserm eichene blatz bleib.
da brauchn mir kei doofe Norma mehr.
vier scheinwerfer wärn zwar besser, aber mir könne sowieso bloß zwei aufschdell, für noch zwei hamm mir gar kein blatz, womerse fest mach könnertn und mer soll ja net unbescheidn sei, gell ?
des is zwar eweng umschdändlich jetzt immer am mittwoch, weil, wenn mir naufgfahrn sinn, naufn blatz, dann müssn ich und die alte erschdemahl alle dührn von unserm audo zuschberr, damit uns keiner klaut, weils doch sooo dunkl is middn in die brährie, da is weit und breit kei laddehrn und weil mir doch immer die erschdn sinn, und wenn die alte slicht vom audo ausmacht, dann siehtmer gar nix mehr und wenn sich jetzt einer so ganz heimlich anschleich däht .
. drum verbarrikadiern mir uns erschdemal im audoh drin und guckn naus und lauschn, obs irchndwo rumkruscht und raschlt, bis der Thomas kommt und des aggregaaht anschmeisst. wenn des läuft, dann hammir licht und mir könne ganz frech ausm audo rauskrabbl und im kondähner die gasöhfn anmach, damit die zweifüsser net frier müssn .
danach schberrt die alte dann den blatz auf und schmeisst mich schonemal nei, weil ich muss doch guck, ob noch alles in ordnung is .
. und wenn die andern alle da sinn, dann duhnse übt - halt blöhdsinn mach, weil am mittwoch immer bloß blöhdsinn gemacht wird ...
. und so ab und zu, wenn der Fax da is, dann kann ich auch mit blöhdsinn mach .

die ehnamtlichn vom altnleuthaus warn beim keechln, und weil mir auch zu die ehrnamtlichn ghörn, warn mir auch mit beim keechln. eichntlich heisst sich des boohling, aber des is fast desselbe, wies keechln. mer muss auch mitere großn kuuchl nach die holzmännli schmeiss, und wenn die männli dann umfalln, dann freunsesich, die zweifüsser .
. und je mehr männli umfalln, desto mehr freunsesich und schrein rumm .
na ja ., ich brauch euch ja net zu derzähln, dass ICH mich da bloß widder gelangweilt hab .

sternzeit 3.089,9

bei die viecher in merchndheim warmer auch und wie jeds jahr wars widder eine aufreechung. der Santo hat sogar gekotzt, sooo hat der sich über die ziechn aufreech müss, wiese rumgelaufn sinn einfach so, direkt vor seinerer nas und wiene sei mamma am zaun angebundn hat, weilse die schweinli foddografier hat woll - weil da dürfn kei hünd mit nei, zu die schweinli - da hatter rumgschrien und rumgejammert und wollt den zaun rausreiss. zum glück hat die alte grad noch gemerkt, dass der zaun scho halber rausgerissn war ausm bodn, sonst wär der Santo mitzammst dem stickl abghaut und auch zu die schweinli neigerennt.

eichndlich wollten mir garnet fahr, weilso wenich hünd kommn sinn, aber des hättn mir bereut, und weilmer schonemal unterweechs warn, simmer dan halt bloß mit 3 audohs losfahrn.
des is heuer scho des ganze jahr zugangn, dass mir so wenich leut bei die ausflüüch warn. die alte und die Edith meine, dass mir einfach zuviele ausflüüch machn und die leut mühd sinn, oder se denkn, dass ja soooo viele ausflüüch sinn, da brauchmer bei demm heut net mitzufahrn, mir fahrn beim näxtn mit ...
... aber es näxte jahr gibts kei soviele ausflüüch mehr, hat die alte gsacht ...
... SOOOO ...
... sollnse doch alleins fortfahr ...
... MIR könne unser ausflüüch auch alleins mach und dann brauchmer uns net nach die leut zu richtn und könne losfahr wann mir wolln und auch wohin mir wolln ...
... des hammse jetzt davon - net dess des iiiirchndein intressier däht ...
... näääh ...
 

ach ja, beim dokter warich auch widderemal .
weil die alte sich sorchn um mich gemacht hat, weil  ich im alteleuthaus nix ess habb woll .
drum hat mich die alte zum dokter gezerrt und der hat an widder mir rumgedatscht und rumgedrückt und mir überall hin neigeguckt und so .
. und mir mei bluhd wechgenommn hatter auch, weil es hätt ja sei könn, dass ich was gifdichs gfressn kappt hätt und drum .
. oder es hätt mir was im gedärm liech könn. drum hammse mich gerönncht und weil des net gelangt hat - mer hat net alles gsehn, wassmer seh hat woll, oder vielmehr mer hat was gsehn, was net da sei hat soll ...
... und da is der altn dann ganz schlecht worn, weil so en schattn im bauch, sachtse, den soll mer net hab ...
naja, und dann hat der dokter gsacht, dass, wennmer des ganz genau seh will, ob des wirklich e schattn is oder bloß eine von meine niern, die da eweng da rumhängt, wose eichntlich net rumhäng soll ...
... dann müssertmer da en uldraschall mach ...
... und dann hat mir der dokter am bauch die haar abschnittn - ganzegars, bis aufn nackichn bauch -, und mir ganz kalts, eklichs zeuch aufn bauch, auf den nackichn, draufgschmiert und mitm kaltn ding drauf rumgfahrn. und ich hab bloß aufm buckl liech und mich net wehr könn. des däht doch garnet weh und ich soll mich net so anschdell .

na ja, er hat dann doch nix schlimms gfundn, kein schattn und nix und nach e baar daach is mirs widder gut gangn - ich hab bloß in der zeit nix gscheits zum essn kriecht, des hat mich am meistn geärchert .
... und die alte ärchert sich auch, weilse sich jetz die neue warme winterjacke nimmer leist hat könn und immer noch die altn anzieh muss ...
... aber da isse selber schuld - hätt ja net so viel geld beim dokter nausschmeiss müss ...
... also, ich hätt des net gebraucht, des rönnchn und des uldraschallzeuch ...

sternzeit 3.095,9

heut warnmir widder bei der Dorothee aufm seminar .
frühs hat uns der Chris wie immer mit seim audoh abgholt und wie mir die Nina eingsammlt kappt hamm simmer losgfahrn. der Moritz hat net mitgekönnt, weil kei blatz mehr fürn frei war, der hat mitm Michl en männerdaach gemacht.
drum sinn mir bloß zu dritt underweechs gewesn mit unsere mammas. die Nina hat auch net mitgemacht, die hat bloß zuguck dürf bei dem datschseminar, wie mirs scho zweimal kappt kappt hamm .
ihr wisst scho, zuerscht bedatschn sich die zweifüsser geechnseitich selber und dann uns hünd .

. und diesmal hammse uns bänder ummen bauch gewicklt und uns erzähl woll, dasses uns dann besser geht und mir auch gar kei angst mehr hamm, wenn mir die ummen bauch hamm .

. mit zwei schdrick simmer gführt worn und da hat die alte dann gemeckert, weil des hattere net gfalln - eingewicklt wie e gschenkbäckle und zwei schdrick ummen hals und dann noch rumgführt wer - näääh ., mir hat des auch net gfalln . !!! da hats die Nina besser kappt wie ich und der Chris, weil die is net eingewicklt worn, die hat garnix mach müss .
na ja, swar gottseidank bloß ei daach diesmal .
... und naja ...,
... bei der Mahdiena hats mir besser gfalln damals ...
... des is aber kei wunder, sacht die alte, weil die Mahdiena is e bräcktischenner zwei und die, dies jetz gemacht hat, bloß e bräcktischenner eins - drum dürf die Mahdiena auch zwei daach an mir rumdatsch und net bloß ein ...
... und drum will ich näxts jahr nochemal zu der Mahdiena fahr und mich von dere bedatsch lass ...

sternzeit 3.104,9
 

. ach ja, abschdimm hammse auch müss, von weechn irchndenem zugebundene dach .
. ich weiss davon nix genaus - swird net so wichdich sein .

nach oben