letzte änderung am 29. dezember 2005

sternzeit 3.052,9

heut warn mir bei die Westies eingeladn ...
weil noch so schönns wetter is, hamm die zweifüsser gegrillt im gartn ...
zuerscht simmer aber alle miteinander naus die mäus gangn, weil diesmal der Flocke dabei war und der Chris - aber der Chris der war ja schonemal dabei, wie mir im gartn ghockt sinn ...

naja, jednfalls sinn mir erscht gelaufn, damit mir alle miteinander nei ins haus gekönnt hamm und der Moritz sich net aufreech hat müss und hamm mäus gegrabn und so und dann simmer nei zum Moritz und der Nina. die zwei sinn gleich nei in ihr körble gangn, weil die warn mühd und mir andern sinn nein gartn. da hammer nadührlich erschtemal alles durchsuch und abschnuffl müss, weil so e fremder gartn, gell ...? des könnter euch ja vorschdell ...
... und außerdem is da auch e zaun drum rum um den gartn und da laufn andauernd hünd vorbei und leut ...
... da mussmer scho öfters guck, dass kei fremder reinkommt und uns des ganze schöne fleisch wechfrisst ...
die Edith hat sich gleich zu anfang den dickn zeh anghaut, und dann hatse nimmer gscheit lauf könn.
die hat gebluht, wie e sau!
des hammse dann erscht gscheit eiwickl müss, dasse net überall alles vollbluht und dass da auch ja keiner hinkommt, weil des hat ja mordsmähßich weh gedahn ...

wie mir alles ausgsucht kappt hamm, hamm mir hünd uns in die sonne geleecht und uns ab und zu mit fleischbröckeli fütter lass.
bis mittn in der nacht sinn mir da im gartn geleechn und sinn arch späht erscht heimkommn ...
den Moritz und die Nina habbich gar nimmer gsehn an dem abnd, die wern wohl scho gschlafn hamm ...
ach ja, jetz hättichs doch ganz vergessn ...
 

sternzeit 3.059,9

zum Paddy und der Bonny simmer heut gangn und hamm in denne ihrm wohnzimmer ghockt ...
die mamma vom Paddy hat ganz viele sachn zum anziehn dabeikappt und die hatse denne andern zweifüsser alle gezeicht, dass diese kauf könne ...
für die alte war aber garnix dabei zum kaufn ...
... netemal ei einzichs bullöhverle oder so ...
... weil die alte da net neibasst in des zeuch, was die Ulli dakappt hat - die is einfach zu fett ...

mir wars ganz arch langweilich da, weil der Paddy und die Bonny net reingedürft hamm, swarn einfach zuviele leut da und da hättn die gschdöhrt, hammse gsacht, die zweifüsser ...
also war ICH  ganz alleins da, netemal der Chris hat mitgedürft kappt ...
irchndwann müssn mir da nochemal hin und dann hat die Ulli auch was für die alte da, hattse gsacht ...
für mich hats an dem abend bloss widder gheissn ...
... na, ratet doch mal ...
... ja, genau, bravsei und unterm disch liech ...

sternzeit 3.061,9

mir warn in der Rööhn ...
... "Dieser Ausfluuch wird in die Annalen des Vereins eingehen als der "Pannenausfluuch"..." hat die alte gsacht ...
shat ja scho richdich angfangt kappt, weil der ausfluuch eigndlich garnet sei hat soll ...
... also eichndlich hatter scho sei soll und dann doch widder net, weils bennziehn so deuer worn is und die zweifüsser doch alle kei geld hamm und die Rööhn doch so weit wech is ...
... dann sinnse sich aber net einich worn, wohnimer sonst fahr könnert und weil viele von die leut drauchich warn, dassmer net nei die Rööhn fahrn, drumm simmer dann doch hin ...

wie mir losgfahrn sinn, sinn die meistn leut - egrad die, die wo am lautestn gschrien kappt hamm, dasse sich scho des ganze jahr auf die Rööhn freun, und dass mer des doch net mach könnert, ihne die ganze freud nemm -, net kommn und mir warn am end bloß 8 hünd: ich und die Nina und der Barry, der Beethoven, die Lilly, der Wurschtl und der Chris und der Flocke ...
... und unser zweifüsser ...
der Santo und die Flocke hamm spähder nachkomm woll, weil die scho da obn in der näh von der Rööhn warn und net erscht nunter und dann widder nauf fahr hamm woll ...
 

habbich eichndlich scho gsacht, dass mir ein dolles wetter kappt hamm .. ?
... die sonn hat schiene - ball schöner wie im sommer - unds war grad warm genuch, dass mer net gschwitzt hat, wemmer durch die geechnd gerennt is. eweng e kalter wind war frühs, wie mir losgfahrn sinn, aber später, in der Rööhn, isses gangn - in der sonn wars richdich angenehm, bloss wennse wech war, hamm die zweifüsser scho gfrohrn, die wo kei jacke dabei kappt hamm ...

ja, wiemer also endlich in der Rööhn warn, simmer zu fuss losgebilchert, durchs Schwazze Moohr durch ...

... der Thomas hat uns e zimmer für uns ganz alleins beschdellt kappt und da hammer ganz gemühtlich sitz könn, ohne dass uns einer gschdöhrt hat ...
wie ihr euch ja denk könnt, hamm widder bloss die zweifüsser zu essn kriecht und mir hünd hamm unterm disch hock müss und hamm uns angeglotzt ...
... da is dann auch  DIE Flocke mit ihrene zweifüsser kommn und dafür sinn nachm essn die Lilly und der Wurschtl mit ihrene heimgfahrn, weil die hamm ihr kinder dabeikappt und die warn scho mühd und ham gekwenglt - weil die sinn ja noch klein - und einer hat sich scho neis audoh geleecht kappt und gschlafn ... in dem wirtshaus hamm mir laaang unterm disch hock müss und die zweifüsser hamm viel gelacht und noch e eis gessn und en kaffe getrunkn und dann wars scho nach viere, wiemer naus aus dem wirtshaus sinn ...

ich saachs euch, ich war dir vielleicht froh, wie ich drausn war und rumlauf hab dürf ...
... bei demm schöne wetter unterm wirtshaustisch hock, des is net meins ...
... obwohl ganz so schlimm wars auch widder net, weil dem Santo sei mamma hat ihr däschelich nebn sich auf der bank liechn kappt und bis die lang geguckt hat ...
... habbich des scho halber ausgfressn kappt ...
... und die hat noch netemal gschimpft mit mir, sondern hat mich dann die ganze zeit mit guddelichs versorcht und die Nina und ihrn Santo auch ...

also gut, drausn hamm die zweifüsser beschlossn, dass mir hünd noch eweng lauf müssn, weil mir sooo brav alle miteinander unterm disch geleechn warn, damit mir unsern schdress loswern - ich maach schdress eichntlich ganz gern, weil dann dürfich nähmlich immer noch eweng extras draußn rumlauf ...
... und mir sinn dann auch noch über e stund lang quer durch die brährie gelaufn ...
der Werner hat gemeint kappt, er kennt den weech und mir müssn bloß "da demm dramplpfahd nachlauf" ...
... und dann hättn mir uns doch ball noch verlaufn ...
... in der Rööhn ...!!!
weil der dramplpfahd der is kreuz und quer und über stock und stein, durch und übers wasser drüber gangn und einmal isses ganz steil nuntergangn durchn wald und mer is dauernd über die wurzln von die bäum drübergschdolpert ...
... an gäns simmer vorbeikommn - die sinn da ganz alleins frei rumgerennt -, ganz viele gäns ...
... und hühner warn auch da und e katz ...
... und nadührlich mäuslöcher ...
... und einmal hät der Santo die Christine fast noch den berch nunterschmissn und die alte is einmal auch fast aufm bodn geleechn weilse übere wurzl gschdolbert is ...
... und des pfähdle is immer schmaler worn und deilweis immer nässer und nässer unds is über holzblankn gangn - fast so wie damals in Norweechn, da womer auch über stock und stein gemüsst hamm ...
mer sieht ja garnix mehr von der landschaft, hamm die zweifüsser gemeint, vor lauter aufnweechaufbassdassmernethinfällt und einer hat dann gsacht, des macht nix, guckn mir uns halt nacher die fottos an ...
... und dann hammse alle gelacht ...
... irchndwann hammer den Beethovn und sei mamma hinsetz lass müss, weil die Anidda nimmer weitergekönnt hat und hamm die audohs gholt und aufm rückweech hammer die zwei mitgenommn.
... die Flocke is mit ihre leut widder heim nach Bahd Kissingn gfahrn ...
... und mir hamm uns auch aufn heimweech gemacht ...

... ich und die alte warn zu dere zeit noch beim Santo im audoh gsetzn, weil der Barry ja beim Chris mitgfahrn is. irchndwann hat die Christine net aufgebasst ...
... und schwupps, warn die andern audohs fort und mir auf der audohbahn drobn und sinn nimmer runterkommn - die näxte panne, weil ...
... eiiiichndlich hamm mir doch auch mit zum Barry seim audoh gsollt kappt, weil ich und die alte doch widder umschdeich hamm müss - der Santo is doch garnet nach Rimbahr gfahrn ...
... und drum hamm mir aufm näxtn barkplatz gewart, bis die andern nachkommn warn ...

wie mir uns vom Santo verabschied kappt hamm und von der Christine und nachdem mir widder beim Chris undm Flocke eingschdiechn warn, sinn mir auch weitergfahrn - immer hinterm Barry seim audoh hinterher ...
... bis dreiviertl von der streck hat des audohle durchghaltn, dann hats aufgebn unds hat gar kei wasser mehr halt könn - des ist schneller untn nausgedröpflt, wiemers obn neigschütt hat ...
... und dann warn mir auf der audohbahn gschdandn und die audohs sinn an uns vorbeigflitzt, dass dir ganz anders worn is - uns hünd hammse scho garnimmer nausgelassn, dass uns keins von die flitzeaudohs dohtfährt - und die zweifüsser warn ums audohle rumgschdandn und hammem auch nimmer helf könn ...

... drum sinn der Thomas und der Michl beim gebliebn, bis freunde vom Barry seim pappa und seiner mamma kommn sind unds heimgschleppt hamm - von unsere zweifüsser hat ja keiner en schdrick fürs audohle dabeikappt hat - bloß die für uns hünd, aber da hatmers net hinhäng könn - noch nitemal an den vom Flocke oder vom Chris ...
... mir andern sinn schonemal vor heimgfahrn ...
... wobei dann unser kubblung es schdinkn angfangt hat und so hundert meter lang die Edith gemeint hat, dass die jetzt endlich ganz verreckt is und mir auch noch auf der audohbahn rumsteh müssn ...
... aber sie is net verreckt und mir sinn gut heimkommn ...

buh, war ich froh, wie mir später den Michl heimgfahrn kappt und selber daheim warn ...
... hundsmüd warich, hab bloß noch schnell was gessn und mich dann in mein korb geleecht und geratzt ...
so, des war also unser bannenausfluuch in die Rööhn ...

... schön wars drotzdehm - die alte hat sogar gemeint, des war der schönste ausfluuch, den unser verein je gemacht hätt. drotz - oder grad weechn - denne ganzn bannen, weil soviel gelacht wie heut hamm die zweifüsser scho lang nimmer ...

ach ja, ei banne hättich jetz fast noch vergessn ...
... die alte hat ihrn ob-ijeckdiefdeckl unterweechs verlohrn - des hattere ganz schö gschdunkn ...
... weil desweechn hatse am näxtn daach nein mediamarkt fahr müss und sich en neun kauf müss, dass des ob-ijckdief net verkratzn duht ...
... und weilse schonemal da war, hatse sich gleich noch e neus anders obijeckdief gekauft - und dabei schreitse immer rumm, sie hat kei geld ...
 

mitm askari undm Chris warich auch underweechs ...
... da wo die schiffli wartn, am main ...
des hat schbass gemacht ...
mir sinn einfach losgelaufn, nei in die botahnik ...
... weil der Askari muss doch noch üb ...
... und da sinn ich und der Chris dabei, damiter sich net fürcht, so ganz alleins, wenn die fremdn hünd kommn ...
... weil der soll nähmlich die fremdn hünd in ruh lass - und des übter grad ...
... mit gaaaanz viel käs und würschtli ...
... und ausweich und zu manche von die hünd hingeh und zu andere widder net ...
ach gott, ja, des kennt ihr glaubich alle noch von früher, gell ? - ich jednfalls hab des auch üb müss und hab damals auch vieeeel käs und würschtli kriecht ...
... des war e schöne zeit ...!
naja, jetzt wars auch schö, weil, wenn kei fremde hünd kommn, dann schnuffln mir rumm und gehn ins wasser und guckn die entn nach - weil die dürfmer auch net jaach, genauso wenich wie die hasn ...
... oder die eisnbahn ...
aber guck dürfich und vielleicht kriechich ja dochemal eine von die entn, die sinn ja neugierich genuch und kommn einfach her ...

und dann is auch noch der Roy krank gewesn ...
der war in uhrlaub bei fremde leut und wie sei mamma ne widder abgholt hat, war dem Roy sei eins auch ganz dick und rot und ganz arch entzünd. sie is gleich zum dokter mitm gangn, aber er hat auf dem auch scho nix mehr seh könn. des muss wohl scho daache her gewesn sei , dasser sich wehgedahn kappt hat - warum sinn denn die fremdn leut net mitm gleich zum dokter gangn ... ?
... dann hätter vielleicht jetzt noch alle zwei auchn ...
wahrscheinlich hatter dann auch noch mit die pfootn dran rumgemacht und danach is alles zu schbäht gewesn. der dokter hatm schbritzn gebn und salbe und anders zeuch, abers auch war ganz kaputt und innen drinn hat sich zeuch angsammlt und des hat gedrückt und gedrückt ...
... und drum war des auche nimmer zu rettn ...
was bassiert is, weissmer net, der dokter hat gemeint, er hat eine aufs auch gekriecht, aber mer kann nix genauers saach, obber nei en ast gelaufn is, oder obber sich mitm Herrkulles gschläächert hat, oder obn einer ghaut hat ...
naja, jednfalls hat der Roy jetzt bloß noch ein auch, des andere hat der dokter wechgemacht und zugenäht, weil bei uns hünd gibts ja kei glasauchn wie bei die zweifüsser ...
... da wird des loch zugenäht, damit mer net irchndwann mit hängnbleibt im gebüsch und sich alles aufreißt ...
sis jetzt alles verheilt, sacht die Lydia. er hat arche schmerzn kappt, aber jetz gehtsm scho widder gut und er kommt ganz gut mit seim eim auch zurecht ...

sternzeit 3.068,9

am näxtn daach hat die Anja eingeladn kappt. die Anja hat die Gisela gfraacht kappt, obse netemal bei uns e drähning mach will, weil die Gisela, die macht des arch guht und da könne die leut noch viel mehr lern, als wie bei der Anja - sacht die Anja. es warn dann auch alle begeistert vonnere, weilses soo gut gemacht hat .

nach oben