letzte änderung am 28. oktober 2006
 

sternzeit 3349,10

jetz simmer widder da ausm bairischn wald.
die alte hat noch e woche uhrlaub kappt und die hammer ganz gemühtlich rumgebracht ...
... sinn vieeel untn am main gassi gangn und an der jottvauah ...
... hamm lang gschlaafn und vieel gschbielt und gschmuhst ...
... und sinn rumgegammlt ...
emal e gaanze woche ohne schdress und rumgerenn, des war schö ...!
... und dann hat die alte widder schaffn geh müss und jetz hatt uns der alldaach widder ...

was is sonst noch so bassiert ... ?
der Fax hat e frau kriecht. naja, frau kammer eichndlich net saach, sie is ja erschd 10 wochn alt ...
... und nervt noch, wie alle bäbies ...
. und manchmal knurrt mich die kleine hex fei scho an ... !
und zwei minutn spähder renntse mir nach und will schbiel mit mir ...
mal guck, wie des wird, wenn die groß is - ob mir dann wirklich unser "freud" hamm mit der Joy ...

die Lucky und die Lene hamm schdress mit die nachbarskatzn und die Lucky is scho ganz wuschich. fünf fremde katzn renne auf denne ihrm balkohn rum und krabbln die bäum nauf aufn balkohn und widder nunter. und in der wohnung von der Lucky rennese auch rum. und weil's auch noch so warm is und mer die balkohndühr net zulass kann hat die Bea ball noch mehr schdress als wie die Lucky und rennt blohs noch in die bodahnik rumm , dass die Lucky auchemal ihr ruh kriecht und wenichstns eweng schlaaf kann, sachtse ...
... und drum fahrn mir jetz nimmer nach underbleichfeld, weil die Lucky mich sonst vielleicht noch weechn dere ganzn aufreechung verbrüüchl däht .
. des mussich net habb . !

apropoppo bodahnik ...
... datt Willi hammer gedroffn, nach laaaaanger zeit widder emal, im wald, wiemer mitm Chris undm Flocke gassi gangn sinn. aaaaufgführt hat der sich dir vielleicht! und dabei warn mir noch ganz arch weit wech und  MIR   sinn ganz schdill gewesn und hamm garnix zum gsacht und hin zum simmer auch net .
. und drotzdem hatter sich aufgführt .
. also näh . !
. sooo aufgführt hatter sich fei früher net . !
. da binnich direkt froh, dass ich den nimmer dreff - net dass die leut denkn, ich däht auch so schbinn wie der Willi . !

beim Rosso undm Monello warnmer eingelaadn. da hats mir jetzt net so gfalln, weilich net rumlauf hab dürf, im gartn ...
...bloohs auf die derasse sitz und brav sei ...
die hamm nähmlich kein richdichn zaun um ihrn gartn rum und da kammer überall durch die heckn schlüpf und sis viel gebüsch da und winkeli, wo die alte mich net so leicht finnert .
. und hasn hamm der Rosso und der Monello - zwei schdück hasn . !
. und in des geheeche von die hasn wärich ganz leicht neikommn, da hättich mich garnet arch anschdreng müss, da wärich gleich drüberghüpft geweesn .
. und gfangt hättich die auch gleich kappt. des wär einfacher gewesn wie beim Flocke seine hasn .
. zu denne ich net neikomm. und wennich noch so such, da is kei loch zum findn, vorne net und hintn auch net .
naja, soo schlimm war des jetz auch net, dassich am schdrick ghängt war und net rumlauf hab dürf, weil vorher binnich über e schdund aufm blatz rumgerennt und hab mäus gsucht und war desweechn scho ziemlich mühd - bei dere hitz auch noch .
. und nacher sinn ich und die alte noch zum Flocke gfahrn und ich hab noch e runde mit demm gerauft ...

sternzeit 3.361,10

irchndwie reisst des fei in letzter zeit wirklich arch ei ...
... dassmer nettemal am wochnend ausschlaaf dürf ...
heut warnmer aufm floomarkt, weil die alte und die Edith und die Anita alts zeuch verkauf hamm woll. aber desmal hat sichs net renndiert. die hamm wenicher geld kriecht für ihr alts zeuch, wiese dem mann geb hamm müss, dass derse aufm floomarkt rumschdeh hat lass und drum hammer auch ganz früh unser zeuch widder neis audoh gebackt und sinn heimgfahrn. zuerscht zur Edith und sinn da eweng rumgsetzn - die katz war nadührlich net da, schad ...
... und dann simmer naufn blatz und hamm drähniert ...
... oder vielmehr die andern hamm drähniert ...
...  ICH bin rumgelaufn und hab die mäuslöcher kondrolliert und bin in die büsch rum und habb geguckt, ob der has widderemal da gewesn is ...
. aber ich haben net gedroffn, der war net da ...
... bloss 3 große vööchl sinn rumgfloochn und hamm gschrien. einmal is einer diereckt über mir im kreis rumgfloochn und is blötzlich ganz schdill in der luft ghängt und hat mit die flüüchl gschlaachn ...
... und da is mir doch eweng andersch worn und ich hab mich in die büsch gschlaachn, dann isser fortgfloochn ...

nachm drähning hammer uns mitm Rosso undm Monello und mitm Nisse undm Pelle im wald gedroffn, aber mir sinn net weit gelaufn, weil mir alle mühd warn. ich und der Chris und der Beethovn, mir warn ja scho seit ganz frühs auf die bein und sinn schdundnlang aufm blatz rumgschlappt und die andern vier hamm gemäähndräild kappt und warn auch mühd. der Nisse und der Pelle hamm desweechn auch gleich widder in ihrm audoh schlaf dürf ...
. mir andern sinn mit die zweifüsser nein biergartn gangn ...

sternzeit 3.368,10

heut hat uns der Peter was erzählt .
nääh ., net uns hünd, sondern die zweifüsser, aber mir hünd müssn da doch immer dabeihock unterm disch und brav sei.
zuerscht simmer alle mitenander, nachm drähning, in den kondähner nei - des warn einen haufn hünd, sachicheuch, und eng warsch auch weil, wode hingeguckt hast, ware hund geleechn oder füss von die zweifüsser gschdandn.
der Peter hat dann geredd und geredd und die zweifüsser hamm zughört .
. und mir hünd hamm uns gelangweilt, bis auf dassmer uns unterm disch manchmal anbrumml hamm könn .
. und nach faste stund isses dann naus gangn zur prakdischn vorführung von demm mähndrähilling .
 

. und die alte hat nix foddografier könn, weil die so schnell gerennt sinn und bis die sich lang umgeguckt hat .
. warnse fort .

. danach hammse noch gezeicht, wiemer mitm mähndrähilling anfängt - des hat dann der Nisse zeich müss und dann wars dunkl und mir sinn heimgangn .

. weil mir hünd uns alle verschdandn hamm und alle ohne schdrick hamm lauf dürf und gerennt sinn und bad hamm könn, weil's doch so heiss war .
. ich erzähl euch jetz aber net, dass der Chriss widder e halbe schdund mittn in der fahrrinne von die schiffli rumschwommn und nimmer rauskommn is .
. fix und ferdich war der danaach und hat ball nimmer rausgekönnt ausm wasser .
. aber danach warer zufriedn, weils warm ja auch arch warm gewesn .

. und dasse ihre ganzn leut des erzählt, alln, die wose kennt, hat die alte auch noch gsacht .! SO, DES hatter nun davon . ! jetzt geht keiner, der en hund hat, mehr zum zum essn .!
. und hinterher issere eingfalln, dass des ja scho die Kadderina auf ihrer hommpäitsch stehn hat, dass der kei hünd hab will und die leut alle verscheucht undse net bei sich ess lässt, wennse ihrn hund dabei hamm.
simmer halt widder vorgelaatscht und hamm beim idalieener gessn, wie letzts jahr und da war, auch widder wie letzts jahr, desselbe durchenander mitm essn .
. und nachm essn simmer mitm böötle widder heimgfahrn .

sternzeit 3.374,10
. und dann warnmer noch miteinander - ich und der Chris und der Flocke mit eim audoh und der Moritz, die Nina, der Fax und die Joy mitm andern audoh - bei der Doredeeh, weil die unsere zweifüsser was übers schbieln erzähl hat woll .
aber des häddn mir uns schbahr könn, des war unnöhdich nausgschmissns geld hat die alte gsacht, weil die Doredeeh nix anders erzählt hat, als wie des, wo in unserm buch auch drinschdeht .
. und sie hats auch ganz genau so erzählt wie des buch und nix anders und sogar die selbn foddos hatse uns gezeicht. desweechn hättn mir kei einehalb schdund mitm audoh fahr brauch, wo mir des buch daheim hamm ...
. aber nääh ., halt ., mir hamm des ja garnet daheim, des hat sich ja der Askari ausgeliehn .
. aber wennss widderkommt, dann könne ich und die alte des ganze zeuch schbiel, des wo da drinn schdeht in demm buch .


am übernäxtn daach simmer nach Kitzingn gfahrn, weil die Bine und der Gau uns zum grilln und zum kaffe eingeladn kappt hamm. ich hab mich gfreut, dassich die Lara widderemal gsehn hab, aber die hat garnix von mir wiss woll, sondern hat blohs mitm Flocke rumgemacht und mich undn Chris hattse garnet beacht. daführ hat uns der Felix umso mehr beacht - besonders den Chris ...
. der hat sich am anfang ja garnet beweech dürf, scho isser angebrummlt worn .

daführ wars im haus und drumrum umso indressanter .
. ich hab euch ja scho derzählt, dass des e alter wehrdurm is, da wo die Lara drinn wohnt und der is scho über dreihunnnert jahr alt .
. und der hat sogar zwei keller .!
. und einer von die keller is zugemauert, weil sonst könnertmer untn drunter, nä . ?
. under die häuser druntn durch .,
. durch ganz Kitzingn lauf, weil der Lara ihr durm e alter WEHRdurm is .
. und in die wehrdürm, da warn früher die zweifüsser ghockt und hamm aufgebasst, dass keiner in die stadt nei is, der wo da net neigeköhrt hatt .
. und wenn einer kommn is und die stadt kaputtmach hat woll, dann hammse von die wehrdürm obnrunter mit schdein gschmissn und mit die bisdohln geknallt .
na ja, jetz is der keller zugemauert, weil sonst dähtn ja die fremdn leut alle bei der Lara neis haus komm und frech rumglotz .
in dem keller untn drin, da wohne flederMÄUS . !
. und die könne flieech . !
ICH freu mich, wiese gsacht hamm, dass da untn im keller sogar flederMÄUS wohne und renn da nunter und will mir ebaar fang .
. könne die flieech . !
. so eine gemeinheit .!
und außerdem hockn die net in ihre löcher drin, wie sich des ghört für mäus .
. nääh . ! die hängn alle obn von der decke und von die balkn runter .! ich hättse ja noch netemal gsehn, wenn die net dauernt rumgschrien hättn .! guckich nauf, hänge die flederMÄUS an der decke - wo gibtsn sowas . ! also, ich find des unverschähmt . ! und einen krach hamm die gemacht .! ich guck noch die alte an, aber die hört ja nix, die is ja fast daub .
. die hört nachts auch net die hasn in die gebüscher oder die richtichn mäus, wiese rumlaufn .

ja, sis scho doll da, in der Lara ihrm durm .
. da findmer in jeder ecke irchndwas, was gut riecht und manches rennt dann fort und mer kann hinterher, aber fang habbich keins von die viecher könn, die sinn einfach zu schnell gewesn und außerdem müssn die sowieso alle bald auszieh, wenn der Gau anfängt in dem keller zu schaffn. der schmeisst dann alles alts gerümpl naus und die viecher hamm dann garnix mehr, wose sich verschdeckl könne - bis auf die flederMÄUS, die hänge ja drobn an der decke und die willer auch net vertreib .

bei der Lara isses schö .
. und die alte sacht auch immer, dassere des dürmle scho gfall däht - wennse noch 30 jahr jünger wär .
. aber jetz isse einfach scho zu alt für siemefuchzzich kwadrahtmeeter auf drei stockwerk verdeilt und die zwei keller undn dachbodn noch extras - des wärn ja .
. und wo die doch nachts immer e baarmahl aufs kloh muss und bei der Lara im durm is des kloh ein stock diefer wie es schlafzimmer und mer muss die steile drebbe nauf und nunter .
. die däht die alte garandiert dreimahl die woche nunterfliech .
 

nach oben