letzte änderung am 30. januar 2007

 

sternzeit 3.486,10

außer, dass mir widder nuntern Kiehmsee gfahrn sinn, war in demm monat eichntlich net viel los bei und mit uns …
… mir hamm nix anders gemacht als wie sonst auch ...
… bissness äss juhschuäll halt ...

zum Kiehmsee nunter simmer ganz frühs losgfahrn, weil des hundesümbossjum, ja scho middachs losgangn is ...
e baar daach vorher hat unser dwingoh ins kranknhaus gemüsst, weiler sich immer so aufreecht und dann vor wut kocht. und weil mir des auf der audohbahn gar net brauch könne, hamm mir nachguck lass, wo der immer sei ganzes wasser hinbringt, weil biesl duhter net, des hat die alte scho beobacht kappt. die dort hamm aber auch nix gfundn und drum hamm mir einfach widder e bahr flaschn mit wasser eingebackt – die mir dann doch net gebraucht hamm ...
… und e baar daach vorher simmer nein medjamarkt gfahrn und hamm uns eins von denne dinger gholt, die wo immer mit der alten redn undere saachn, wose hinfahr muss (ich saachs euch, hünd, da isses laaaaangweilich, in dem medjamarkt! und bis die alte ihr ding endlich kappt kappt hat - nääääh, nääähhh, näähhh …). die alte is nämlich doof, die will nuntern kiehmsee und kommt in dänemark raus, wende die alleins irchndwohin fahr lässt. dere mussmer des alles saach: da fährste jetzt nach links und da vorne dann widder gradaus und so …
… des macht die dann auch ganz brav. mir sinn einfach dahin gfahrn, wo die frau gsacht hat und …
… schwupps, warn mir da ...
… am Kiehmsee …
 

untn in Aschau simmer widder zuerscht in unser hodell gangn und hamm unser zeuch neis zimmer gschmissn – zimmer nummer 8, wie immer, wenn mir in Aschau untn sinn. danach simmer, wie scho die jahr davor, durchs dorf gebilchert und hamm eweng markiert und rumgeguckt und sinn dann zur festhalle gfahrn und hamm uns en blatz gsucht.
weechn mir und meim körble warn mir widder ganz vorn in der erschdn reihe ghockt. da habbich den meistn blatz und keiner von die vieln leut duht mich treht.
die alte hat erschemahl ihr runde mach müss, obse net noch e neus buch find, wose noch net hat – und daheim merktse dann, dasses doch scho kappt hat …
… oder e kittele für mich …

in der zwischnzeit habbich auf unser zeuch aufgebasst, dasses uns keiner klaut und dafür hat mir die alte dann guddelichs mitgebracht.

dann is losgangn und ich hab mich schlafn geleecht, weil mir is des langweilich, außer in die bausn, wo mir draußn rumschnuffln, mit die andern hünd schbieln und so, aber da duht mich die alte dann scho rechtzeitich aufweck.
die alte hat widder en haufn neus zeuch gelernt kriecht:
wiemer, wennmer scho en haufn hünd hat, sich dann nochn en böhsn hund ausm waisnhaus hol kann und wiemer des macht, dassmer den dann mit die andern zammschmeisst, ohne dasse sich dauernd brüüchln oder dohtbeissn ...
... und über kranke hünd, was mer da mach kann und wiemer rauskriecht, was e kranke schilddrüse macht oder wenn ich jetzt zum beischbiel en hohn bluhddruck kriech däht ...
... ob des von deinerer mamma geerbt is, oder ob de des selber gelernt hast, wennde zeuch machst, des wo die zweifüsser net wolln. da hammse viel von rattn dazu derzählt und von katzn - und mir kei einziche gebn zum schbieln ...
... und dass mir gfühle hamm und so ...
... und über klumpfüss hat e frau auch geredd – aufem sumbossjum für hünd, stellt euch dess emal vor, redd die über klumpfüss ...!
eine hat übers schnüffln geredd, wases alles für „Nasenarbeit“ gibt und wie des hilft, wenn hünd aggressief sinn und so ...
 

ach, hünd, die hamm der alten noch viel mehr derzählt, aber mehr fällt mir jetz grad net ein …
… und jedes mal, wenn einer ausgeredd kappt hat, hats e bause gebn und mir sinn naus, weil’s war sooo ein schöns wetter, des könnt ihr euch gar net vorschdell, hünd … !!!
… gschwitzt hammer und die sonn hat gschiene …
… und ich hab gebadn in dem flüssle, des wo die alte immer für die Tirohler Ache ghaltn hat, aber des wo eichndlich Prien heisst …
… und mäus habbich gsucht …
… und mit einm von die andern hünd habbich gschbielt. der is mir immer nachgelaufn, wie wennich schbeck in der dasche hätt.
heuer hat mich gar keiner angegauzt und überhaupt hats garnet so viel aus die audohs rausgegauzt, wie sonst.

… und die alte hat mit andere zweifüsser geratscht. einiche von denne hamm mir ja scho von woanders gekennt …
… die eine frau von dem piehdiehtie-ieeeeh treffn hammer widder gsehn, aber die hat net so arch viel zeit kappt, weil die hat obn auf die embohre innem käfich eingschberrt sitz müss und denne andern vieln leut des genauer erzähl müss, was die vorne alles saachn, weil viele kei englischs zeuch versteh duhn …
… drum hamm die leut auch alle was auf die ohrn sitzn kappt, und die Simone hat denne des alles übersetzt und erklährt, wasse net verschdandn hamm …
… aber abnds hattse mit uns am disch gsetzn beim essn.

nachm essn sinn die alte und ich dann in unser hodell gfahrn und ich hab mich nei mein korb geleecht und hab gschlaffn …
… des heisst, in der erschtn nacht habbich net schlaaf könn, weils von untn immer so gebollert hat, weil die zweifüsser hamm gekeechlt bis um dreie in der früh …
 

am näxtn daach simmer widder aufgschdandn und sinn e halbe stund auf unsern grenznlos weech rumgelaufn, dann hat die alte es büffeh aufgfressn und danach simmer widder in die festhalle gfahrn und es is weitergangn mit die vordrääch …
… und mit die bausn …
… und abnds hamm die zweifüsser büffeh kappt, hamm gessn und danach sinn mir in unser hodell gfahrn und hamm uns nei unser körble geleecht …
… und am drittn dach simmer widder aufgschdandn …
… wie immer halt …
 

wie des sümbossjum aus war simmer heimgfahrn und die frau in dem kästle hat uns widder erzählt, wo mir hinfahr müssn ...
… auf der heimfahrt hat uns e plöhtmann dann fast noch alle drei umgebracht!
erscht isser ball unserm Dwingoh nein ausbuff gegrabblt und hat mit die lichtli geleucht und sei audoh hat uns angschrien, dass mir uns gfällichst von der audohbahn mach solln, weil ER jetzt kommt. dabei hamm mir grad en ellkahweeh überholt und es issn berchnauf gangn. unser Dwingoh hat gekeucht und sich geblaacht. aber dem da hintn isses net schnell genuch gangn. wie mir dann nüber sinn auf die rechte seite, hatter uns überholt und der alten en voochl gezeicht, is gaaaanz dicht vor uns eingschehrt, dass die alte ganz arch bremms hat müss, damit der dicke Beemmweeh kei loch nei unsern armen altn Dwingoh beisst und dann isser immer langsamer worn um uns zu ärchern …
… und wierer gemerkt hat, mir komme garnimmer den berch nauf, hatter ganz driumpfierend sein Beemmweeh davonrenn lass …
... so ein plöhtmann … !
… und dabei war des wetter dann sowieso scho schlimm genuch …
… gereechnt hats aufm heimweech, dass des wasser auf die strass gschdandn war und einen nehbl hatts kappt …
… und je weiter mir nach Würzburch kommn sinn, desdo schlimmer isses worn mitm reechn undm nehbl
… mir hamm manchmal gar nimmer gsehn, wo die strass hingeht und hamm gaaanz langsam fahr müss, dass der arme alte Dwingoh sich net weh duht …
… und zweimal warmer auch im stau gschdandn und es is garnimmer weitergangn und mir hamm gewart und gewart …

na ja, aber zum schluss simmer dann doch heil heimkommn, mir drei alte grabbeli, wie die alte immer sacht …
… eichndlich mir vier – weil die frau in dem kästle, die ghört ja jetzt auch zu uns drei.

nach oben