letzte änderung am 1. november 2006

sternzeit 3.440,10

manchmal gehen mir zu die andern, und guckn zu wiese drähniern ...
... und manchmal duht die alte dann foddografier ...
und weilse vom ätdschilidi scho ganz viele foddos gemacht, warnmir heutemahl beim verschdeckerles dabei ...

die zweifüsser gsacht hamm,  hammse "aha" gsacht und sinn weitergangn.

unser audoh war auch scho widder emal kabutt. nach Rimbahr simmer noch kommn, aber wie die alte des dohr aufgschlossn kappt hat, hats kein zuckerer mehr gemacht. ich bin dann mitm Flocke schonemahl naufn blatz und mit der Lilly undm Sugar .
. und die alte hat mitm Sebastian versucht, dasses audoh widder geht. aber sis nimmer gangn. den ganzn berch isses nuntergerollt, aber sis net angschbrungn.
der Sebastian hat gemeint, dass die lichtmaschien kabutt wär und dass des recht deuer is. und dann war des audoh untn beim Göbl gschdandn, direkt vorm marderle und weilmers da net steh hat lass könn - so ganz alleins, middn in die bodahnik, is der Michl mit seim audoh kommn und hat unser audoh ins kranknhaus gschleppt. is egrad noch gutgangn, weil die schdange runterghüpft is, grad vorm Emmerling seinerer dühr. und dann hat uns der Thomas sei audoh mitgebn für dass die alte auf die arbeit fahr kann mit. des war fei arch net vom Thomas, den Thomas wenn mir net hättn, des hat die alte erscht widder gsacht.
swar dann doch net so schlimm mit unserm audohle, weil blohs die bakderie kabutt war und jetzt gehts widder ausser, dasses immer so komische schläch duht, wenn mir über en hubbl fahrn.

sternzeit 3.462,10

für den Chris und sei zweifüsser kommts allewall ganz dick. erscht is die Teiny krank und fast doht - grad hattmerse noch rett könn und jetz muss die oberiert wird, weil der dumohr, den wo die in ihrm bauch hat, ihr alles wechfressn duht und die arme Teiny muss ball verhunger. die frisst und frisst und der dumohr wird dick und fett. .

und jetzt weint die Edith ganz arch viel und is draurich und der Thomas läuft auch ganz draurich rum ...
... und weil des noch net langt, is dem Chris sei einer dumohr e böhser und mer weiss net, wies mitm Chris weitergeht.

 ... und jetzt iss einer davon, der auf der schulter, e böhser gemäster dumohr gewesn, den womer beschdrahl müssert und dann e kehmoderapie mach und jetzt weint die Edith noch viel mehr und der Thomas is noch viel drauricher. blohs der Chris is net draurich, der hüpft rum, als wennem nix fehl däht, blohs wenner beim dokter hockt - ich bin da zweimahl mitgangn, damitter net soviel angst hab muss - da zitterter und jammert und weilich auch angst hab beim dokter, zitter und jammer ich mitm mit.

an demm daach, wo die Edith des mitm Chris gsacht kriecht hat, warn mir beim Peter zum geburtsdaach eingeladn und drum hammir des festle garnet richdich genies könn weil, wenn die zweifüsser so draurich sinn, dann könne der Chris und ich uns auch net freu, auch wennsde noch so leckere guddelichs kriechst

erschd simmer aber gassi gangn.
des heisst, gassi sinn ich und der Beethovn gangn, weil dem Beethovn sei mamma is scho alt und kann nimmer so weit lauf und der Beethovn is ja auch scho ganz alt. und weil einer doch bei dene zwei bleib und aufbass muss, dasse net doht umfalln .
. sinn ich und die alte mit dene zwei gassi gangn, umn see rum und so. einfach so vor uns hingedibblt und immer widder emal hingsetzt hamm sich die zwei weiber und ich hab rumgschnufflt und der Beethovn auch.

gemeckert, wie ich nei bin. in dere wirtschaft hamm sich unser zweifüsser dann recht ärcher müss, weil die uns hünd widder net hab hamm woll. die hamm uns an en ganz kleine disch gsetzt, wo mir gar kein blatz kappt hättn - unser zweifüsser hamm sich scho ganz klein mach müss, dasse hingebasst ham und mir . ?
. mir hättn da garnimmer hingebasst. und wie se sich beschwert hamm, weil doch der disch scho wochn davor beschdellt geweesn is, da hatne des mädle noche maul anghängt und war recht unverschähmt zune. der Peter is gleich naus mit seinere hünd, weiler an dem disch net sitz hat könn und dann is die Birgit naus zu ihrm Peter. und dann is die Edith auch naus .

. und dann bin ich mit der alten auch naus und hab geguckt, was die draußn machen. und dann hammse beschlossn, dasse einfach ihr trinkes trinken und mir dann fortfahrn und nix in dere wirtschaft essn, weil die meistn scho der abbeditt vergangn geweesn is. und so hammers dann auch gemacht.
mir sinn einfach weitergfahrn.

und wie mir die näxte wirtschaft gsehn hamm, simmer da nei. swar dann scho halber dreie nachmiddach aber mir hamm doch noch wasser zum trinkn kriecht und unser zweifüsser was zum essn. weils so späht war, hamm mir die ganze wirtschaft für uns ganz alleins kappt und mir hünd hamm uns jeder inne ecke geleecht und gschlaffn. na ja, schlaff habbich jetzt net gekönnt, weil unser leut so laut gegigglt und gelacht hamm. die warn dann widder guht drauf und hamm witzli gemacht und sich gfreut, dass des essn da so guht in dere wirtschaft war und dassmer so viel blatz kappt hamm und dasses in dere wirtschaft vieeeel schöner war, wie in dem Holzberchhof.
also hünd, ich gebb euch den guhdn rat .
. geht da net nei, in den Holzberchhof! die löckern euch da nei und dann pferchnse euch in die hinterschde ecke zamm! des dürf mer sich net gfall lass! also mir gehen da nimmer hin, unser geld kömmer auch anderswo vieeeel besser ausgeb! ja, des hammer dann auch gemacht. mir sinn länger sitzngebliebn, wiemer eichntlich geblahnt kappt hamm und dann simmer heimgfahrn und ich hab der alten gsacht, wasse schreip soll, damitmers net vergessn, dass mer euch warnen duhn!

und wenn schnee liecht - net zuviel, weil sonst sinn die schifahrer widder underweechs und mauln, wenn mir hünd die schbuhrn kabuttmachn - dann fahrn mir nochemahl nauf in die Rööhn zum wandern und gassigehn .
. und nachm gassigehn hockmer uns widder nei die wirtschaft, wo mir so schö blatz kappt hamm und schlaaf hamm könn .

sternzeit 3.469,10

unsern facklzuuch hammer auch widder gemacht, wie letzts jahr und des jahr davohr auch scho ...
desmahl wars zur abwexlung recht windich unds hat uns ball davongeweht, da drobn aufm berch und die fackln hamm auch net lang ghaltn, dann sinnse runtergebrennt gewehsn. zum glück hammir eine von die neun lampn dabeikappt, sonst hättn mir nie mehr zurück zum kondäihner gfundn, weils scho so dunkl war und mer auf die felder ja auch net viel sieht weil, da sinn ja kei lampn, nä ... ?
aufm blatz hat des ackregaht geduckert und drum hammer da ein von die grohsn scheinwerffer brenn lass könn, dassmer wenichstns da was gsehn hamm - wenn jetz der has kommn wär und ich hättn net gsehn, des wär doch schad gewesn, gell ... ?
 

bilder hat die alte heuer keine gemacht, weilse nähmlich ihrn foddoapperat in Würzburch vergessn kappt hat, aber der Daniel hat e baar gemacht kappt. weil mir warn doch vorher beim Emmerling und der scheff is mit uns mit unserm audoh e stückele mitgfahrn, damiter des komische geräusch hört, des wo unser Twingo macht. der is dir vielleicht gfahrn ...!
... wie eine wildsau ...
... die schlechtestn schdrässli hat der sich ausgsucht und is die gehschdeich nauf und nunter mit karacho ...
... und nix ... !
... kei geräusch ...
... swar zum verzweifln! und ich war ganz umsonst hintn drin rumgfloochn gewesn ...
 

aufm blatz habbich erschdemahl schbring könn, bisses dunkl worn is und dann sinn auch scho die andern kommn ...
... und wie die alle da warn, simmer mit die brennende fackln rumgelaufn ...
... und danach warnmer alle im kondäihner ghockt ...
... schduuundnlang ...
glühwein und apflbunsch hats gebn und apflkuchn und drei sortn zwieflblootz ...
... und für mich en haufn guddelichs, weil shat ja jeder von die zweifüsser en haufn davon dabeikappt und da habbich mich widder bei alle durchgfressn ...
... e baar habbich auch beklau könn und die hamm des garnet gemerkt, wie ich mei nas in dene ihr daschn neigschdeckt und die guddelichs rausgfressn hab ... hähähä ...

wer alles da war, wollt ihr wiss ... ?
... aaalso ...
ich war da ...
... und der Fax und die Joy ...
... und der Beethovn ...
... und der Rosso und der Monello unds Fritzle ...
... und der Chris ...
... und die Lara ...
... und der Askari ...
... und der Barry ...
... und die Nina ...
... und die Sina und der Santo ...
... und die ander Nina und der Moritz ...

... und nadührlich die ganzn zweifüsser die dazu geköhrt hamm - und der Detlev noch extras, aber der hat den Flocke net mitgebracht kappt ...
... schad ...

und schad is auch, dassmer kei foddos hamm, wiemer alle mitenander im kondäihner ghockt warn, wo die Birgit alles soo schö sauber gemacht kappt hat und überall hatse lichtli hingschdellt und zeuch aufghängt, weil doch auch hällowiehn gewesn is ...
... und drum hatse auch noch fier kürbisser ausghöllert kappt und die warn vorm kondäihner aufm disch gschdandn und die auchn von die kürbisser hamm gruhselich geleucht, weil da warn auch lichtli drin gschdandn ...

nach oben