letzte änderung am 17. juli 2006
 

sternzeit 3319,10

diesmal simmer mit der Lene mitgfahrn .
. nach Bamberch auch widder aufe seminahr.
da hats dadrum geh soll, was die alte mir alles zum fressn geb dürf und was net. des meiste habbich ja net so richdich verschdandn und ich glaub, die alte auch net .
. drum habbich da gar nimmer zughört, hab mich nei mein korb geleecht und gschlaffn .
. oder die vieln muckn gejaacht .
 

und am zweitn daach warich dann ganz alleins, weil da hat dann die Lene auch nimmer mitgedürft .
warum net . ? ich weisses net, mir sacht ja immer keiner was .
ich glaub, swar widderemal zu viel für die Lene, die ganze aufreechung und so .
also MIR hat des garnix ausgemacht, ich find des da obn kuhl .!
. da fahrig morchn am liebstn gleich widder nauf und dann kann die alte im häusle drin was über uns hünd lern .
. und ich kann draussn meinerer wähd nachgeh .
sis ja net weit vo uns wech, mir sinn grademal e schdund gfahrn mitm audoh .
. und dann warmer scho da .

na ja, swarn scho andere hünd da, aber die habbich net gedroffn - bloss ghört die ganzn zwei daach lang .
. die warn im audoh von ihrer mamma ghockt, drei kleine und zwei große, in EIM kombiaudoh hamm die ghockt und einmal am daach is die mamma von dene mitne fortgfahrn zum biesln .
. und dann warnse widder im audoh ghockt und hamm gegauzt .
ich bin da scho garnimmer hingangn zu dem audoh, weil sonst wär da vielleicht ja gar noch einer rauskommn .

na ja, jednfalls .
... des seminahr selber war für die katz . !
. weilich jetz auch nix anders zum fressn kriech wie vorher .
. bloohs mit die fremdn leut schdreit die alte sich seitdem rum, weil die saachn, mer däht kei seminar net brauch und mer soll auch kei buch les, sondern soll des gaanz alleins mach mitm essn für die hünd .
schö blöhd von der alten, meint ihr net auch . ? - sollsese doch mach lass, wasse wolln .
. ICH hab da kei broblehme mit, ich fress alles .
. alles, wasich kriech halt .
. weil schdinkichs zeuch kriechich ja net, da hat sich die alte ja immer mit ihrer huchmannkwahlidäht .
. und die graust sich scho immer, wennse widder was von die madn im fleisch liest und dass des andere hünd ess müssn .
. die kriechn halt vielleicht nix besserch - da dähtich des auch ess .

jetz binnich scho widder abgschwiffn, wo warichn jetz . ?

die ganze wiese habbich abgsucht, bis in die hintersn gebüschl nei binnich gekrochn .
. kei alte . !
. in den schuppn nei, da wo des krachdings gschdandn is, des wo auch immer so gschdunkn hat .
. kei alte . !!
. dann binnich in des häusle nei, wo die andern zweifüsser rumgschdandn sinn und geraatscht hamm .
. immer noch kei alte . !!!
. na ja, dann wirdse halt widderemal aufm kloh hockn, wie immer, wennichse net find, habbich mir gedenkt und hab mich vor die klohdühr ghockt und gewart .
. und gewart .
. und gewart .
... und wie ich mir grad denk, die braucht aber heut widder lang, oder is die dahdsächlich ohne mich abghaut . ?
. kommtse von draußn zur dühr rei . !
SIE hat mich draußn gsucht - war beschdimmt auch in alle gebüscher neigekrochn .
. und hat mich net gfundn .
. und is am zaun entlang, ob da e loch drin is, wo ich naus und fort bin .
. und war  ANGEBLICH scho ganz verzweiflt .
. und die andern zweifüsser hamm uns ausgelacht - des war mir sooooowas von beinlich .
. aber na ja, sie war ja widder da und drum habbich mich gleich widder verdrückt und bin draußn rumgelaufn .
ich muss doch die zeit nütz, die wo ich auf so em schöne grundschdück rumrenn kann .

unser audoh war a scho widderemal verreckt .
des hat kein zuckerer merr gemacht. dann hammses gholt und dran rumgemacht und mir hamm zwei daach kei audoh kappt .
. des is fei scheisse, sachich euch . !
. da kommich garnet viel naus, weil mir ja net fortfahr könne, nei die wiesn und bei uns obn, des kannste ja vergess .
. da is ja nix, womer schnuffl könnert oder buddl .
. na ja jednfalls war  ICH dir vielleicht froh, wie ich mei audoh widder hol hab könn - scho weilich in demm daxi auch noch aufm bodn hock hab müss .
. näh, näh, näh .

ja, was war denn noch so los . ?
ädschillidi hats gebn, aufm blatz. ädschillidi gibt's eichntlich bei uns ja immer, aber diesmal war des e anders ädschillidi, des war für leut, die sich des emal anguck wolln, wies der Lucky und der Willow machen und die andern und drum hats en sogenanntn "ädschillitifanndaach" gebn, wie die zweifüsser des nenne .
ich hab da net mitgemacht, näh .
 

. oder könnt ihr euch die alte vorschdell, wiese durch den parkuuhr rennt .? ICH maach mir des net vorschdell, weil ICH müssert ja da mitrenn und ICH müssert mich blahmiehr .
. aber angeguckt hammersch uns und die alte hat fottografiert .
es warn en ganzn haufn fremde hünd da mit ihre zweifüsser und sinn bei uns übern blatz ghüpft .
die Livia habbich noch gekennt von früher von der altn hundeschul, aber sonst eichndlich kein .

. na ja, für mich war des jetzt net soooo bricklnd, die fremdn hünd hamm bei uns alles angebieslt und ich hab dann bloß widder zum duhn kappt, dass ich da überall drübermarkier .
. und auch jaaa nix vergess und kaum biste rum mit drüberbinkln, bieslt doch scho widder einer wo hin - so ein schdress . !
der eine von die hünd hat mich net leid könn und is mich angangn! weiss der eichndlich net, wassich ghört . !
. den scheff beiss woll, häh . ? so was . ! mechtmerdes . ?!?!
ich hättm gern bescheid gsacht, aber die alte hat mich - nadührlich - widder fortgschickt .
. des sin gäst und die wern net gebissn . ! hat die eine ahnung . !
also so was, was mer sich als alter gschdandner hund alles von dem grüngemüs - und fremds auch noch - gfall lass muss . !
na ja, wartner, du kommst scho widder, bürschle . !
. DICH merkichmir . !

sternzeit 3.327,10

heut früh simmer aufgschdandn, weil mir mit die andern hünd nach Einsiedl lauf hamm woll .
. und wie mir uns nei unser audoh setzn und die alte den schlüssl rumdreht .
. nix . !
. kein zuckerer! wars scho widder verreckt unddesselbe widder .
die alte hat gleich den Willibald angerufn, net dass der scho fort gewesn wär, aber der hat grad losfahr woll und hat uns dann mitgenommn .
. sonst hättn mir garnet nach Einsiedl gekönnt .
mitgelaufn sinn mir zwar net, weil die alte doch mit ihrm kreuz kei zwei schdund wander kann, aber mir hamm uns mitm Monello gedroffn und seiner mamma und mit der Anka ihrer mamma - die Anka is ja mitgewandert -, sinn nach Einsiedl mitm audoh gfahrn und dort rumgelaufn im wald - des war auch schö .
. und net so anschdrengnd .
wie die andern dann auch von ihrm wandern da warn, hammer im biergartn ghockt, die zweifüsser hamm gessn und getrunkn und geraatscht .
. und mir hünd warn unter die disch geleechn und warn brav - na ja, die meistn von uns warn meistns jednfalls brav .

. mir warn ja auch alle mühd unds war so heiss - über 33 grahd solls ghabt hab, hat e mann erzählt .
. und außerdem hamm die meistn ja hinterher widder die selbe schdreck zu die audohs zurücklauf müss .
. hünd, ich war dohtfroh, dass ICH net lauf hab müss, sondern widder mit der Anka ihrm audoh mitfahr hab könn .

aufm barkblatz hammer gewart, bis die andern auch ausgewandert kappt hamm und dann habbich mitm der mamma vom Rosso undm Monello in ihrm audoh mitfahr müss und die alte is bei denne zwei eingschdiechn und mir sinn alle mitenander zum Flocke gfahrn und hamm da nochemal en kaffee getrunkn .
abnds hat uns dann der Detlev heimgfahrn .
ein umschdand warderdes vielleicht . !
. aber jetz hammer zum glück unser audoh ja widder - hoffentlich hälts jetzt eweng länger wie e baar daach .
. ohne audoh is des nähmlich alles nix .

sternzeit 3.331,10

weil mir mitm Barry in urlaub fahr wolln, hammer uns heut getroffn und sinn mitenander fortgfahrn ...
net weit .
. die zweifüsser hamm blohs ausbrobier woll, ob mir zweis, der Barry und ich, uns verdraachn, vor allem, wenn mir im audoh sitzn. also simmer eweng rumgfahrn und sinn dann neis kaffee gangn, weil mir des ja auch ausbrobiehr hamm woll. die zweifüsser warn recht zufriedn und drum simmer widder heimgfahrn und warn noch beim Barry im gartn ghockt. meistns habbich da brav unterm disch sitz müss, aber einmal binnich doch rumgelaufn und hab alles abgschnufflt. der Barry hat da nix dageechn, der hat mich sogar aus seim napf sauf lass, ohne dasser gemeckert hat ...
die woche drauf simmer dann in wirklich in uhrlaub gfahrn ...
... aber vorher hammir noch e nachtwache gschobn ...
ja, hünd ... !
... ihr habt richdich geleesn ...!
... mir hamm nochemal nachts durch die geechnd schleich müss, weil der Detlev net zughört kappt hat. und weil die andern zweifüsser auf die arbeit gemüsst hamm, weil sonst ihrne hünd nix zum essn kappt hättn ...
... und weil die alte ja scho daheim bleib hat dürf und net schaff hat müss ...
... drum hattse dem Detlev angebootn, dass mir einschbringn und nochemal wachn ...
.  MICH  duht die da net fraach . ! näääh ., mit MIR  kammers ja mach . !
 

swar aber net so anschdrengnd wie sonst.
weils die halbe nacht gereechnt hat undmder da ja kein hund vor die dühr jaachd, warnmir die meiste zeit in der durrnhalle gsetztn und hamm gschlaafn - der Barry und ich ...
... und sinn blohs zwischndurch emal um die halle gelaufn ...
der Flocke hat - nadührlich - net gschlafn und drum hammern naus gschmissn, dasser drausn rumläuft und aufbasst ...
... wenner eh blohs rumläuft und nervt ...
... des war genauso, wie wenn mir mit die zweifüsser um die halle gschlichn wärn - odder sogar noch besser, weil vor mir undm Barry hat ja eh kenner angst, aber ...
... dem Flocke nachts alleins begeechn, des däht kei freud mach, glaubich ., nääh ... !
... und dass der en jedn blohs allerhöchstns dohtschleck däht, des wissn die ja net, die einbrecher ...
... weil gauz duht der Flocke scho, wenner was hört ...
. oder ein schdellt .
. nachts .
... naja, jednfalls is der da draußn im reechn und im dunkln rumgerennt ...
... und der Barry und ich, mir hamm unser ruh kappt und warn gemühdlich im drockene gsetzn.

die zweifüsser hats auch gfalln, die hamm dauernd gelacht und gegigglt, dassde garnet schlaf hast könn ...
... und außerdem is ja der Flocke immer widder reikommn und hat genervt, weil  ER  schbiel hat woll ...
... mer meint, der hät net genuch draußn rummschbiel könn ...
... hätter sich halt en einbrecher beschdellt, mit dem hätter dann schbiel könn ...

die alte hat hinterher gemeint, dass des die allerlusdichste nachtwache war, die wo mir je gemacht hamm - und mir hamm jetzt ja scho einiche gemacht ...
... aber sie war auch noch nie soo mühd gewesn, wie nach dere nachtwache ...
. und wie mir im "morchngrausn" heimgfahrn sinn, hammer uns gleich neis bett geleecht und hamm gschlaafn ...

...  MICH  hat DIE  net angelangt ...
...  ICH bin gar net ersch zuere hingangn, da hatse mich löcker gekönnt, wiese gewollt hat ...
... ich bin doch net blööhd ... !

und dann sinn mir in uhrlaub gfahrn ...
... des war widder eiiiin geduh, bis mir underweechs warn, weil die alte ja immer einbackt und widder ausbackt und dann widder anders zeuch einbackt ...
... unser audoh hammer in Rottndorf stehn gelassn und sinn mit im Barry seim mitgfahrn ...
secks schdundn warn mir underweechs - mit drei bausn, wo mir hünd rausgedürft und rumlauf hamm dürf ...
... dann warnmir endlich da, wo mir hingewollt hamm ...
 
eichndlich hammir ja heuer nach schoddland fahr woll, aber des hat net hinghaut, weil mir uns net einich worn sinn, wann alle zeit hamm ...
... an eim daach hat der eine kei zeit kappt ...
... und annem andern daach hat widder e anderer net gekönnt ...
und weil mir doch schon e halbs jahr früher zum dokter gemüsst hättn und der unser bluhd raussauch und undersuhch hätt müss ...
... simmer halt net nach schoddland gfahrn, sondern nein bairischn wald ...
die alte sacht, mir gewinne heuer im loddoh und dann kaufn mir unser neus audoh ...
... und dann fahrn mir näxts jahr nach schoddland ...
... oder nach dexl ...
... genau kammer des jetz noch net saach ...
mit unserm altn audohle kömmer nähmlich nimmer so weit fahr, des is scho vieeel zu alt und zu krank und manchmal heults, wie e fluuchzeuch ...
... oder es duht schlääch, wenn mir aufn blatz fahrn, weil da sinn so diefe löcher, da wos nei auf unsern blatz geht und dann kratzt immer irchndwas von untn an unserm audoh rumm und des duht dann schlääch ... !

ähhh ..., wo warichn jetz ... ?
... ach ja, im bairischn wald ...
da isses auch schö gewesn ...
 

eiiine angst hat die scho widder kappt. hoffntlich is des kei kreuzotter geweesn und hoffntlich hat die den Freddie net gebissn, hatse gejammert, den gaanzn weech lang, bis hin zum audoh. und so komisch angeguckt hatse mich immer widder, so als dähtse wart, dassich jedn mohment doht umfall. dabei hat mich des gschlängl garnet derwisch könn, ich bin doch viieeel zu schnell für so e dumms kreuchzeuch ...

eimal simmer ummen großn arbersee rumgelaufn ...

... und annem andern daach simmer mitm bähnle nauf zum kleinen arbersee gfahrn und sinn um dehn rumgelaufn ...
... an demm daach hamm mir eiiiin glück kappt, weil, wie mir grad ferdich warn mit ummenseerumlauf, hats angfangt zum schüddn ...
... wie aus kühbl ...
... mer hatt garnix mehr gsehn, vor lauder reechn und aufm klein arber warn lauter wolkn ghängt, dassmer den fast garnimmer gsehn hat ...
... naja, zum glück warnmir da scho im trockene ghockt, in der wirdschaft, und sinn desweechn net nass worn ...

wie mir mitm bähnle widder nuntergfahrn sinn hats immer noch so gschütt, aber mir hamm nunter gemüsst, weil sonst hätt uns des bähnle nimmer mitgenommn. weils so gereechnd hat, war des bähnle ganz vollgepfropft mit leut und die hamm sogar ihr schirm zum fenster naus aufgschbannt, damits net neis bähnle neigereechnt hat. es bähnle is ausn rumm nähmlich offn auf einer seite und da hats neigereechnt und die zweifüsser, die wo auf dere seite gsetzn sinn, sinn nass worn.

eiiiinen krach hamm die gemacht, die leut mit ihrm gelach und gschrei, weil da warnse dann scho nimmer alle ganz nüchdern und hünd, ihr wisst ja, wie die zweifüsser sinn, wennse so komisch schdinkn und rummdaumln, weilse e biehr gedrunkn hamm ...
... dann müssnse über alles lach, obs jetz lusdich is oder net ...

fremde hünd habbich im bairischn wald nur ganz wenige gedroffn ...
... einer war ganz nett, der hat da obn aber gewohnt - so einer wie der Moritz ...
... und drum habbich zuerschd auch gedacht, dass der mich haut ...
... aber der hatsich gfreut, wierer mich gsehn hat und hat geweedlt ...
. dafür hat mich e langhaariche angfalln und ich hab grad noch die flucht neihau könn, sonst hättse mich derwischt ...
... weiber halt ... !

naja, was soll ich euch erzähl ... ?
... rumgelaufn simmer viel und vieeel ausgeruht hammer uns ...
... sonst hammer eichndlich gar nix gemacht ...
doch . ! halt . ! em Barry sei audoh waremal kabutt. da hat immer e lichdle gebrennt und weil des nimmer ausgeh hat woll, simmer nach Kaahm gfahrn, ins kranknhaus nei .
. und dort hat sich e mann des audohle angeguckt und is mitm fortgfahrn und hat eweng an die käbeli rumgerucklt .
. und dann wars lichtle aus .
. und mir hammen ganzn daach verdummt kappt von unserm uhrlaub, weil bissmer des kranknhaus gfundn kappt hamm .
. näh, näh ., ich sachs euch . !
. des war dir vielleicht ein geduh .
des eine kranknhaus war nimmer da und des andere hammer zuerschd net gfundn und sinn rumgfahrn .
. gsehn hammers scho vo weitm, aber hinfahr hatmer net gekönnt, weil da is kei straahs hingangn, zu demm kranknhaus .
. und weilmer ja net einfach in e beehemmweh-kranknhaus kann oder in eins von die vauwehs .
. drumm hammir rumsuch und rumfahr müss, bismers gfundn kappt hamm, wie mer zu dem fortkranknhaus kommt .
naja, shat dann nix gekost und e schüssl wasser hammer kriecht, der Barry und ich .
. und auf die heimfahrt hammer ganz zuhfällich en großn, uhraltn baum gsehn .

. den hat die alte nadührlich widder foddogravier müss von alle seitn .
... der is scho soooo uhralt, noch älter als wie die bawaria buuche, die wo mir letztes jahr besucht hamm ...
... und scho ganz kabutt ...
die alte hat sich gfreut, wie e kleins kind, weil die maach alte bäum arch gern und wennse ein find, dann hüpftse drum rumm und foddograviertne. alleins dafür hat sich der uhrlaub gelohnt, hattse gsacht, alleins weechn der "wolframs linde", wie der baum gheissn hat .

und den Barry hammse nochemal gschert, die zweifüsser .
. zu dritt hammse an dem armn kerl rumgemacht und einmal hatt die alte sogar innen neigschnittn unds hat gebluuhd .
. tztztz ., aber jetz muss der Barry wenichstns auch nimmer schwitz wie mit seine langn lockn .

ja, so sinn die zeen daach auch rumgangn .
. und manches von dem zeuch, was mir eichndlich mach hättn woll, hammer scho garnimmer gschafft .
. weil mir frühs ja immer erschd um neune fortkommn sinn, weil die zweifüsser erschd des büffeeh auffress hamm müss und gessn hamm und gessn und gessn .

ach ja .
. der Barry und ich, nä . ?
. mir warn ei herz und eine seele .
. da hats gar nie was gebn .
im audoh warn mir ball aufenander ghockt, weil so wenich blatz in dem audoh geweesn is .
. und da hats drotzdem nix gebn, kein einzichn zahn haste gsehn bei uns zwei und kei gebrumml ghört und auch sonst, egal ob im hodell oder in die wirtschaft, oder underweechs .
. mir warn nie böhs mitenander .
die zweifüsser warn jednfalls ganz begeistert von uns zwei "altn herrn" .

nach oben