letzte änderung am 30. januar 2004

sternzeit 2.422,7

mir sinn widder öfter abnds daheim, weil bei dere kält jaachste ja kein hund naus, da biste abnds froh, wenn de in deiner warmn stubn hock kannst. ich sitz jednfalls am liebstn in meim körble drinn - da isses kuschelich. draussn frierste dir ja bloss den sowieso ab .

aufm platz hamm sich die mäus alle wohin verkrochn, da kannste allawall buddl soviel wiede willst, du findst kei einziche - alle sinnse wech. auch die hasn und die karnickl. na ja ., die hasn hamm bestimmt die jäächer alle dotgschossn, vore baar wochn, wose rumgschossn hamm. da sinnse rumgelaufn mit ihre hünd und mit die schiessgewehre. seitdem habbich kein einzichn has mehr gsehn .
aber ich dörf kein jaach, näh?
kein einzichn hammse mir gegönnt, alle hammsese selber dotgemacht!

letzte woche binnich erschrockn. ich buddl - wie gsacht - so schö nach mäus, auf einmal kommt e auto aufn blatz gfahrn und e kerl steicht aus, mitm langn rotn mantl, e kabutze aufn kopf und so weisses zeuch im gsicht, dassmer des gsicht gar nimmer gsehn hat. ich bin emal hin, weil ich guck hab müss, ob ich den kerl beiss muss - aber dann habbich gemerkt, dass des gar kei kerl is, sondern e zweifüsserweible, des wo sich wie e kerl verkleid kappt hat. na ja, des hat mich dann nimmer interessiert. die is noch e ganze weile übern blatz gelaufn und hat jedn von uns hünd gstreichlt und uns bewundert, was mir doch für schöne hünd sinn. die meistn von uns hamm sich des einfach so gfall lass - wenns die zweifüsser spass macht - aber zwei von uns, die sinn so derschrockn, dasse den rotn kerl angauz hamm müss und sich gar nimmer beruich hamm könn und ich glaub, der Chad, hmmm ., freundlich hat der net geguckt. der Chad is nämlich unser scheff und der muss uns beschütz und aufbass, wer da alles auf unserm blatz rumläuft ...

mir sinn allewall auch öfters in Waldbrunn draußn, beim Onkl Manfred. weil, die alte und die Helga - die wo dem Onkl Manfred sei frau is - die wern nämlich bald . - pscht ., des dörf ich net verrat, sonst kriechich ärcher, weil die zwei mädli, die wern nämlich uuuuuuhralt, jaaa! über sexedreissichdausndfünfhundert daache wern die zusammn alt! und die Helga, die is dabei noch 18 daach älter als wie die alte, JAAAA!

ja, und weilmer des feier muss, wemmer so alt wird, drumm sinn mir e baarmal nausgfahrn nach Waldbrunn. da hammer vorher immer den Thomas abgholt, des is der altn ihr neffe. der hat kei auto mehr, weil des demm einer kaputtgemacht hat und mitm roller kanner bei dere kält nimmer so weit fahr. der Thomas hat nämlich gsacht, er macht des alles mit dere feier, der will koch und mach und du .
drum hatter auch mithelf müss, dass mir die leut alle zammkriechn und dassmer denne saachn, dasse komm solln und unser essn aufess solln, weil des wird nämlich e grosse feier mit mindesdns 10 hünd - ich glaub sogar noch mehr! und e baar leut sinn auch da - so vielleicht um die 50 rumm, aber die kennich net alle, weil da ganz viele dabei sinn, die wo nur die Helga kennt. weil mir doch en haufn geld sparn, wenn mir unser feiern zammschmeissn, weil doch sowieso leut zu unserer feier eingeladn wern, die wo auch zur Helga ihrer feier komm dätn - drumm hammerse alle auf einmal eingeladn und machen nur ei feier - und drumm kennich die net alle. aber die hünd, die kennich alle - und des is ja die hauptsach, nä?!

jetz wo kriechste soviel hünd nei und leut? des war garnet so einfach zum findn, des könnt ihr mir glaub, aber mir hamms gschafft.
und dann sinn sich die zweifüsser net einich worn, wasse denne leut schreibn, dasse auch alle kommn. geeinicht hammse sich dann auf des bild von dem Salvador, der wo die krummn uhrn gemalt hat. des hat die zweifüsser dann alln gfalln - mich hammse ja net gfraacht, leider. ich hab bloss dabeisitz müss und dumm guck könn .

hoffntlich is der monat bald rumm, überall stehn bei uns die kerzn rumm unds stinkt nach oraaschn. und ganz dunkl isses in der wohnung - bis ebn auf die kerzn und die lichtli, die aufm fensterbrett stehn .
zweimal alleins habbich abnds bleib müss, und wie die alte heimkommn is, hattse nach schlechtm gewissn gerochn .
des hattse aber auch habb könn! geht die doch datsächlich alleins nauf zu die altn leut! weil die eingeladn hamm zum essn - weihnachtsfeier nenne die zweifüsser des. UND ICH  HABB NET  MITGEDÜRFT !!! so eine frechheit!!!
es wär zu laut da bei dere feier, weil die da musik machn und zu viele leut sinn da, die dätn mich dottret, hat die alte gsacht - des scheinheiliche luder! nur damitse mir nix zum fressn abgeb hat müss!
und mitgebracht hattse mir auch nix, alles hattse alleins aufgfressn! wiese heimkommn is, hattse recht scheinheilich gedahn, aber ich hab ganz deutlich riech könn, dasse gfressn kappt hat und auch was .
dabei hätt mir der lax auch gschmeckt und die hühnli und des roustbief und der käs .
ich hab mich aber gerächt! jawoll! ich habse so ganz arch draurich angeguckt - und was sollich euch saach? heut isse fortgangn und hat mir e fleisch gholt - ganz für mich alleins!
leider hattses gekocht - ich hätts lieber roh kappt, aber na ja, rohs fleisch werich ja jetzt nimmer kriechn - leider . weil überall in die fleische so komische viehrussn drinsinn. da dätich krank wer, sacht die alte und drumm dutses jetzt immer koch, des fleisch - na ja, mer kanns auch gekocht fress, wennmer nix anders kriecht .

apropopo nix anders .
vielleicht kannich ja näxte woche was von die blätzli erwisch .
der Helga ihr tisch is ja net besonders hoch .
da kann sogar ich draufguck .
und wenn die zweifüsser emal net herguckn .

sternzeit 2.424,7

ein wind war heut! ihr könnt euch des garnet vorstell!
mich hats fast fortgeweht ...
und gereechnd hats auch, zwar net arch, abers war so richdich e wetter, wode kein hund vor die dühr jaachsd ...
und mir müssn heut in die stadt geh!
des war sogar mir zuviel und mir grausts normalerweis net, wenns kalt is und reechnd ...
mir schlappn heut übern weinachsmarkt, hat die alte gsacht und da habbich dann gewusst, dass ich widder en haufn arbeit habb ...
ich habb ja schließlich immer die aufsicht, wenn mir soviele hünd sinn, wo durch die stadt laufn, dass auch keiner sich verläuft und soo.

aaalso, mir hamm uns getroffn, nä?! zuerschd hammer widder stuundnlang wart müss, bis alle da warn und dann simmer losmarschiert. mir sinn da scho ganz arch oft gelaufn, aber heut wars aufreechnder, weil da warn überall kleine häusli gstandn mit essn drin und en haufn zweifüsser sinn auch dagewesn. die hamm viel von dem essn gessn und überall krümeli verlorn - ihr wisst scho, die zweifüsser könne nie net richdich ess und ich musses hinterher alles aufles. aber des passt der altn dann auch widder net und sie schimpft mit mir rumm, statts dasse froh is, dass einer den dreck wechbutzt ....
in die die häusli drin simmer auch rumgelaufn und die zweifüsser hamm sich alles anguck müss und auch zeuch gekauft, des wose eichndlich gar net brauchn und eichndlich auch net kauf hamm woll unds aber dann doch gekauft hamm. naja, so sinn die zweifüsser halt, da kannste nix mach ...

die eisnbahn habbich gsehn - obwohl mir die alte immer einred will, dass des e strassn- und kei eisnbahn is, aber ich weiss ja, dass die mich immer anlüücht und glaub dere sowieso kei wort mehr.
des fliechzeuch is auch widder übern marktplatz gelaufn. frech is des! des hüpft mir direkt vor der nas rum und frisst mir mei krümeli wech und wenn ichs emal schaff hinzukommn, dann fliechnse wech! einfach soo! des is gemein ...!!!

unser hünd warn alle mords aufgereecht, außerm Chris und mir, mir kenne des ja scho ... schließlich warn mir ja scho tauuuusndmal in der stadt mit der altn schul und wenn die andern hünd sich aufreech müssn, mir zwei bleibn ganz kuhl - uns reecht so leicht nix mehr auf, kei gegauz und auch des dumme gebabbl von die leut, die uns erzähl wolln, was mir für brave hünd sinn - als ob mir des net selber wissertn - und die uns immer bedatsch wolln ...

obwohl ..., heut isses gangn, swar ziemlich ruich, dafür dass mir 8 hünd warn. die warn eichndlich alle recht brav. shat net viel gegauz gebn. naja, die zweifüsser hamm scho widder geglotzt, wie wenn mir vom mond runtergfalln wärn und hamm gfraacht, was denn heut los is, so en haufn hünd. ob denn des dierheim ausgang hätt ...

naja, wenn ichs mir so recht überleech, so e gewall is ja doch recht lustich - mer kriecht en haufn guddelichs und unterweechs findmer auch immer wieder was zum fressn und intressant riechn tuts und neue hünd siehtmer immer widder. schad war, dass mer den falschn weech zurückgangn sinn. da wo mir sonst laufn, da hätts fisch gebn,  mmmmhhhh ..., aber bratwurschd is auch lecker ...

wie mir heimkommn sinn, war ich hundsmüd und hab mich erstemal in mein korb neigeleecht und e runde gschlaafn ...

des is auch gut so, weil die kommende woche is arch anstrengnd für mich - da geht die alte nur zwei daach schaffn und den rest der woche habbichse daheim hockn ...
näähh ..., da kriecht die immer so anwandlungn, da will die "üben" mit mir und so ...
oje ...! und die woche drauf isses genauso, da gehtse auch die halbe woche net fort und dann - dann hattse fast zwei wochn urlaub ...

sternzeit 2.425,7

hünd, heut hats mich doodahl derbröslt ...
ich komm aus der hausdühr naus und schon hauts mich voll auf die schnauze - soo glatt wars scho lang nimmer!
heut frühs war noch alles ganz normal und dann hats middachs en schneesturm gebn und nachmiddaachs auch nochemal ein - und dazwischn hat die sonn gschiene, stellt euch des vor ...
und abnds wars dann arschglatt, dassde ball nimmer lauf hast könn.
mir hamm ja noch glück kappt, weil eichndlich fahrn mir an die mohndaache immer nach underbleichfeld, gell?
da gehn mir dann mit der Lucky und der Lene gassi und mit der Bea. aber heut, heut hat sich die alte net nausfahr gedraut, weil mir doch am samsdaach en blattn kappt hamm. den hat uns der Thomas zwar rebariert, aber jetzt hamm mir vorne rechts aufm audo en falschn reifn drauf und desweechn hat die alte sich wie gsacht net aus würzburch nausgedraut. mir wärn da nie nimmer heil heimkommn, des kann ich euch saach! abnds hammse im radio gsacht, dass da ganz viele leut ihr audos kaputtgemacht hamm auf dere strass und wenn mir da gfahrn wärn, dann wärn mir vielleicht auch unser audo kaputtgemacht! hamm mir ein glück kappt!
jetzt hammir uns erstemal neue schuh für unsern twingo beschdellt - morchn kommn die und dann machn die uns die drauf und dann könne mir auch widder wo hinfahr wo mir hinwolln. heut war des nix, des wär ja genauso blöd gewesn, wie wenn dei rechter fuss en stiefl und dei linker e sandale anhätt ...

sternzeit 2.427,7

ja, und dann is plötzlich widder weinachtn gewesn und mir warn wie jedes jahr in Waldbrunn - weil, weil die Helga am heilichn abnd geburtsdaach hat, hattse immer die ganze familie am hals und mir müssn uns goddseidank kei gedankn mach, was mir an dem daach machn.



so um 3e nachmiddachs simmer losgfahrn, weil mir vorher nocheweng beweechung hab wollten. desweechn simmer in Waldbrunn hintn naus in die felder gangn. swar eisich kalt und windich, aber die sonn hat gschiene und schnee hat geleechn.



ich hab mich erstemal so richdich ausgerennt, weils sooo schö da draußn war und wie ich so gerennt bin, rennt mir doch diiirekt vor meiner nas e maus übern weech und schwupps in ihr loch nei. ich hinterher, aber schad, ich habse net kriecht. der bodn war einfach zu hart gfrohrn - ich hab mich geblaachd und geblaachd und die dreck-schneematsch-klumpn sinn an meine füss ghängt und nimmer rundergangn - neikommn binnich net in den mausbau und die feiche sau hat sich natürlich nimmer seh lass. ich war fix und ferdich am end wie mich die alte neis audo gschrien hat.
dann simmer beim Onkl Manfred eingelaufn ...
auweia ..., des hatt eeiinen ärcher gehm!
die alte hat garnet geguckt kappt was ich für dreckiche füss hab und ich bin die treppe nauf, in die wohnung neigsaust und hab alle freundlich begrüß woll, weil die seh ich ja net so oft ...
und scho hat die Helga gebläckt, weilich des halbe feld auf ihrm laminaad verstreut hab. DES  war der alten vielleicht beinlich!
mir net, weil was issn da dran so schlimm, hä ...? des bissle dreck ...?!
die alte hat mich gleich neis klo gezerrt und mir die füss gewaschn ...
stuuuundnlang ...
aber sie hammich dann doch ins wohnzimmer gelassn.



da war e baum gstandn ...
... und ich habn net markier dürf ...
... und den schoklad und die blätzli habbich auch net runterfress dürf ...
die zweifüsser sinn scho komische leut, stelln en baum mittn nei in ihr wohnzimmer und mer dörf den bloss anguck ...

 


der restliche daach war wie immer - ich hab aufbass müss, dass die zweifüsser net zuviel kleckern und war den ganzn abnd schwer beschäfdicht, weils racklett gebn hat und weil die den gaaaanzn abnd an dem käs gfressn ham.

am näxtn daach warn mir gleich nochemal in Waldbrunn, weil des am heilichn abnd war ja geburtsdaach, nä?! und die Helga und der Manfred müssn uns ja schließlich auchemal für weinachdn einlad.
shat e gans gebn.
e schöns lebn soll die gans kappt hab, hamm die zweifüsser derzählt. noch so richdich mit frei rumlauf dürf am bächle und die kinder beiss und nix anders wie gras und kräutli und getreid fress. da warnse richdich stolz drauf - die sinn extra nach Castell gfahrn, nur wecher dere, könnt ihr euch des vorschdell ...?
ich habse ja net gekennt, die gans, wiese noch gelebt hat, die war scho dot, wiesese gebracht ham und außerdem, wen intressiert scho, was die gans füre lebn kappt hat, mich net. mir is des wurschd - dotmach habbichse net dürf und die hauptsach is doch, dasse schmeckt, nä ...?!
... und gut warse, richdich leckerschmatz!
ich kenn die Helga ja scho lang und weiss, dasse mir immer es beste von der gans aufhebt. zuerschd dutse zwar immer so, als obbich nix kriech dät, aber ich schleich solang ummerre rum bisse mir doch was gibt. heuer wars besonders viel, weil, wiese so an dem geripp rumgepfriemlt und gepflockt hat - die braucht immer ewich, bisse was runterbringt -, habbichere des ganze ding aus die händ reiss könn und bis die mich kriecht hamm, habbich den ganzn hals und den poppo scho gfressn kappt und wenn die alte net ausm wohnzimmer raus  AUS gschrien hätt, hättich noch mehr nunterwürch könn ...

am zweitn feierdaach hammer den Beethovn und sei mamma zum kaffe besucht und zum blätzlesessn.

danach simmer gassi gangn in der au und  hamm mäus gsucht und andere hünd getroffn und sogar en klumpfuss hammer gsehn. der is aber gleich widder abghaut. der hats recht eilich kappt, weiler e frau aufm buckl mitnemm hat müss und die hat vielleicht heim gemüsst, ich weiss net ...
abnds hat sich die Anita überfressn unds warere dootschlecht - aber des kommt davon, wemmer so gierich is - sie hätt mir und dem Beethovn ja was abgeb könn und hätt net auch noch der alten ihr essn ferdichess müss ganz alleins. wiemer abnds beim Flocke zum schbieln warn, da hattse immer noch rumgejammert, dasse bestimmt niemehr so viel essn tu will ...

über die näxtn daach schweichich lieber, die warn laut und ich hab widder viel angst habb müss. nur eins, diesmal sinn mir in der nacht um 3e noch heimgfahrn und hamm net in Rimpar übernacht, wie sonst immer ...

nach oben