letzte änderung am 13. november 2003

sternzeit 2.370,7

kalt isses worn.
des hattmer sich nach dem sommer eichndlich garnet vorstell könn. die Christl hat ja scho die ganze zeit gsacht kappt, wenn mir in demm winter soo frier müssn, wiemer im sommer gschwitzt hamm, dann gehts uns schlecht ...
jetz kommt widder die zeit, wo ich "zu dreckich bin, um gleich neis wohnzimmer zu dürfn". da muss ich  erschd ins klo, damit die alte mir die füss undn bauch wäscht. dadrauf könnt ich ja verzichd, glaubts mir. und andauernd muss ich die dühr zumach - den ganzn sommer habbich des net gebraucht. da warn alle dührn aufgschdandn. da isses jetzt aber zu kalt dafür - die alte lässt die heizung sogar scho für mich lauf daachsüber, wennse schaffn geht, damit ich net frier muss. des findich jetz aber widder nett ...

unser platz is "dicht" - schad, da kammer nimmer naus, jetz wose des neue döhrle eingebaut hamm. e schönns döhrle, hat uns der Peter gebaut. aber leider kammer nimmer nausrenn, wiemer will und die karnickl könne nimmer nei. sogar die "grossn jäächer" dürfn jetz ohne leine aufn platz nauf. da mussmer auch kei angst mehr habb, dassmer die blöde schleppleine zwischn die füss kriecht. des war aufn altn platz schlimm - auch für uns hünd. des war sogar gfährlich. es hat scho einiche unfäll gebn mit denne schleppleine. ich hab manchesmal e macke am bauch kappt, wenn mir die lange leine zwischn die füss kommn is. was mir bassier hätt könn, wenn ich die richdich um ein fuss gewicklt kricht hätt ... desweechn hamm mir auf UNSERM platz kei so lange leinen mehr. bei uns gibts höchstns dreimeterleinen. außerdem sacht die alte, dass die schleppleinen auf dauer gar nix bringen, genauso wenich wie des halti. die Anke zum beischbiel, die verflucht heut den daach, an demse den Sputnik an die schleppleine ghängt hat und kämpft immer noch, dassen widder runterlässt. irchndwie sinn des alles nur krückn, die e drüücherische sicherheit gebn und von dene mer dann nimmer wechkommt. und mit jeedm daach wird die angst größer ...
mir isses doch auch net anders gangn!
wenn mir die Frau Dahl net kappt hättn, letztes jahr, dann däd ich bestimmt auch immer noch am strick häng. des maachich mir gar net vorschdell ...!

krank is die alte auch gewesn - odder vielmehr, sie isses immer noch, bloss schaffn tutse widder. e ganze woch is die mir aufn geist gangn, is daheim rumghockt und hat gejammert, des hat mir grad noch gfehlt ...

und jetz - wenn die alte abnds vom schaffn heimkommt - isses scho dunkl und mir müssn widder da gassi geh, wos hell is. weil, des wisst ihr ja, die hat eine angst, wennse im dunkln irchndwo lauf soll. mer meint, es dät einer die alte klau woll ...
die dätnse doch an der näxtn ecke widder lauflass, nä ... ?!?!
 

nach oben