|
letzte änderung am 5. april 2003
sternzeit 2.141,6
am sonndaach sinn mir dahin gfahrn, wo der Jobo und der Dschalba immer ihr geräteturnen machn (eichntlich
schreibt sich der Dschalba ja "Gyal-pa", aber des könnt doch kei sau lees, nä?!?). diesmal hat sich des net seminar gschimpft, sondern wörkschopp. was da jetz der unterschied is, weiss ich net so genau, mir hamm
halt mehr gschafft diesmal, vielleicht is des der unterschied.
der Chris hat uns nachmiddaachs mit der Edith abgholt und mir sinn e stund lang mitm auto gfahrn. swar noch e andere frau dabei, die Ute
gheissn hat. die muss auchn hund hab, des habbich gerochn, aber sie hatn, wie letzts jahr auch, wie mer beim kässuchn warn, auch desmal net dabeikappt. der is zu gross und braucht zuviel platz, hattse gemeint. die
alte sacht aber, dass des logisch is, weil die leut in dem verein, in dem die Ute is, ihr hünd noch netemal zu der weihnachtsfeier letztes jahr mitgenommen hamm. also, warum hättsene denn dann zu em wörkschopp
mitnemm soll, häh?
unterwechs is der altn eingfalln, dasse kei geld dabei hat und dasse da obn unbedingt zuerst e bank überfall muss. sie hat rummgejammert,
dassere der mann nachrennt, ihr wisst scho, der, der früher in Marktbreit gewohnt hat, der Alzheimer, sie hat garnimmer aufhör woll damit. die Edith und die Ute hammse scho ausgelacht deswechn, aber die Edith
hattere doch e sparkass gsucht, wo die zwei rumgelästert hamm, dass der automat vielleicht jetz kaputt is und die alte dann ganz ohne geld dasitzt und dasse vielleicht den saal putz muss . aber der automat war net
kaputt und mir hamm unser geld gekricht.
in dere wirtschaft, wo der wörkschopp sei hat soll, warn mir die erstn und mir hamm uns die bestn plätz aussuch könn. so nach und nach sinn
dann noch 3 andere hünd kommen. typisch war, dass widderemal kei einzchs männle von die zweifüsser dabei war, nur lauter weibli - na ja, bei uns hünd war dann dafür bloß ei einzichs weible - nämlich die Linda -
dabei. die zweifüssermännli wolln halt kei doggdänzing mach, des is dene viel zu blöd. die machn lieber des andere, wo sich einer verkleid und der muss dann die hünd ärcher, mitm stock und anschrei tuterse, und die
hünd dürfn dann in den mann neibeiss. sowas gfällt dene besser wie es doggdänzing.
die frau, die uns was erzähl hat woll, hat erst e ganze viertlstund zu spät anfang könn, weil der Jobo mit der Anja und die Linda mit der
Mary net beikommen sinn. na ja, da hamm mir hünd wenichstns noch zeit kappt uns gechnseitich anzugauzn - des hat mich vielleicht genervt, weil ich ja kein angauz, wie ihr wisst.
der wörkschopp war recht lustich. shat ganz arch viel zum essn gebn, damit mir auch des ganze schwieriche zeuch mach hamm könn. des war aber
auch des einziche, denn des war vielleicht ein gewerch, sachicheuch! mir sinn abwexslnd mit unsere zweifüsser rumghüpft. die alte hat sich vielleicht aaangschdellt! ich armer kerl! mir is oft nix anders
übrichgebliebn als dumm zu guckn, weilse rumgfuchtlt hat und rumgschtolpert is und mir jedes mal auf die füss drauf und ich hab garnet gewusst, wasse eichntlich will von mir.
der beste von uns war e jäcki - der Toby. der hat scho was gekönnt und is mit seim fraule mit musik rumghüpft.
einer von die
schwarzweissn, die wo immer überall dabei sinn, und die uns andern immer die schau stehln - der Speedy - der hat auch scho viel gekönnt. aber dem sei musik hat uns net gfalln.
e kuhhund (naja, die hamm net
kuhhund, sondern "austräliän kättldogg" gsacht), wie der gheissn hat, weiss ich nimmer, der hat noch net soviel gekönnt, nur e paar twists.
von uns Würzburcher war diesmal (ich sachs ja net gern) der Chris
der beste und dann is der Jobo kommen. die Linda und ich, mir könne noch net viel - aber mir gebn uns müh! schließlich will ich mir auch was dazuverdien. es hat zwar diesmal kein käs und auch kei würschtli gebn,
aber mei normals essn nemmich auch ganz gern ausser der reihe emal. später habbich von dem Chris seim käs kricht und von seim brot - habbich euch eichntlich scho erzählt, dass der Chris für trockns brot schafft und
für nackichn pizzadeich .?
swar jednfalls ein bild für die götter - ihr müsst euch des emal bildlich vorstell - wie die alte elfngleich durch den saal gschwebt is .
abers sieht auch nur immer so einfach und
leicht aus, wenns fertich is. dabei is des richtiche arbeit, harte arbeit und mer muss als hund wie gsacht noch dazu ständich aufbass, dass eim die alte net aufn fuss dappt, oder ein sonstwie übern haufn rennt denn
da isse nämlich recht gut drin.
swar scho dunkl, wiemer heimgfahrn sinn. wiemer fast scho in Würzburch warn, is der Ute schlecht worn. die hat wahrscheinlich des essn von
da obn net vertraachn und die alte hat angst kappt, dass die Ute ihr von hintn ins genick kotzt. die Edith hat lieber nochemal anghaltn und hattse naus an die frische luft gelassn, danach warsere eweng besser und
sie hat gemeint, bis heim schafftses jetz noch und dann stecktse sichn finger nein hals ...
hundsmüd warich am näxtn daach vom vieln nachdenkn, weil des mit dem steckn habbich net kapiert. einmal will die alte, dass ichn mit der nas
anstchtups und es andere mal ziehtsene mir vor der nas wech und sacht "falsch". was will die eichntlich von mir? einmal sachtse "datsch" und dann widder "follou". sollse sich dochemal entscheid .
vereinnsitzung hammer auch kappt, .
. weil mir unsere mitglieder saach hamm müss, dassmer uns eintraach lass könne weil
mir jetz gemeinnützich sinn. GEMEINnützich, hmmm ..., ob unsere zweifüsser desweechn immer kichern und saachn, dass der verein eichntlich "linkevöchlevau" heiß müsst ...? wie
auch immer, des muss was ganz tolls sei des gemeinnützich, weil unser vorstand da lang mit rumgemacht hat und jetz ganz stolz is und ...
... weil der Thomas leut braucht, die wo schaffn, wenns jetz warm genuch is - den zaun zieh und bäum pflanz und bastl und streich und so uuuuund ...
... die hompätsch auch fertich is - soweit e hompätsch halt fetich sei kann, aber mer kann jetz neiguck und ...
... dassmer angfangt hamm zu schaffn, des hammer auch saach müss. die alte hat nämlich
ihr mittwochsgruppe von dere andern hundeschul zugemacht, weil da keiner mehr kommen is und weilse net immer alleins rumsteh wollt mit der Edith. des is jetz unser
neue "fann- und schbielgruppe". da wird aber immer noch mitm clicker gschafft, kei sorch, weil mir da so ganz schwieriche sachn machen. die dätn mir doch ohne den clicker gar net
hinkriech. so zeuch wie rückwärtslauf und durch die bein von unsere zweifüsser und die pfote heb, wenn unser leut ihr hinterpfote hebn. so was halt. des is immer unheimlich
lustich, weils mehr spass macht wie des normale, was mer sonst immer machn - des nenntmer "doggdänzing".
des normale machen mir auch scho aber freidaachs. weil mir noch net aufn neuen platz
naufkönne, müssn mirs halt aufm parkplatz mach - hauptsach endlich emal angfangt. es warn auch scho leut da und hamm sichs angeguckt. die hamm zwar eweng langsam
geguckt, weil der platz ja wirklich net schö is. mir hammse halt jetz erstemal rumgführt und ne gsacht, wasmer alles vorhamm und dann hammse gemeint, sie könntn sich des
scho vorstell, dasses emal recht schö wird, wenn alles gericht is, angsäät und eingezäunt und so .
gfreut habbich mich, weil der Kurt und die Hanni da warn. den Floy hammse aber net
mitgebracht, weil der Floy gschtorbn is - schad! - die hamm jetzt en andern hund, den Axel. der is viel kleiner wie der Floy und grau, aber auch e schnauzer. der is in der zeitung gstandn.
weil sei leut in e neue hütte gezoochn sinn und der Axel net alleins bleib kann hatter fortgemüsst. und weil der Kurt und die Hanni eichntlich scho immer en normaln schnauzer habb hamm woll, hammsen sich gholt.
der Axel is noch eweng durchenander, weiler jetz woanders bleib muss und hat gleich am erstn daach den Kurt gebissn. aber der Kurt hatn deswechn net widder fortgschickt,
sondern is zu uns kommen, dass der Axel was gscheits lernt. der kann nämlich gar nix, obwohler scho 6 jahr alt is. könnt ihr euch des vorstell? der kerl is 6 jahr alt und sei leut
hammen garnix gelernt??? nääähhh, näähh ..., leut gibt's! und jetz muss der Kurt dem Axel alles erst lern. des is fei nett von dem Kurt, nä?
ich hab jednfalls die zwei gleich wiedererkannt und habse begrüßt und die hamm mich auch sofort wiedererkannt und mir hamm mitenander gschmust und uns gfreut.
mit dem Axel komm ich soweit recht gut aus. der bläst sich zwar eweng auf, weiler sei eier noch hat und meint, er is was bessers desweechn. aber es geht scho. er war zuerst
uuunheimlich aufdringlich, hat mich ewich lang beschnufflt und wollt mir doch datsächlich sein kopf aufn buckl leech, obwohl ichn scho bös angeguckt hab! aber wie ichn emal kurz
angschnauzt habb wars gut. seitdem verstehn mir uns.
sternzeit 2.144,6
stellt euch vor, heut habbich die katz von der Edith anlang dürf!
des muuss ich euch erzähl:
also, mir warn beim Chris daheim. wie mer hinkommen sinn, war die Teiny scho hinter der
glastür ghockt und hat mich ganz frech angeglotzt. weil die weiss ja, dass ich net durch die glastür lang kann, nä?
die Edith hattse dann wechgetan und mir warn scho e stund dringsessn in der küch, da
geht die tür auf und die katz kommt rei. die Edith tutn schrei, die alte fällt fast tot um vor schreck und plötzlich steht die katz ganz dicht vor mir! da hättste kei hand dazwischn halt
könn! ich bin selber derschrockn - so e freche katz! dabei hat die doch angst zu hamm vor mir!
hatse aber net!!!
jednfalls hat mich die alte gschrien und mich festhalt woll, aber die Edith hat gsacht, sie
soll mich dochemal lass, weil se net glaubt, dass ich dere katz was tu, weil ichse ja sonst gleich beiss hätt könn. die Edith hat mich dann an meim gschirrle festghaltn und mich
ganz nah zu der Teiny hingelassn. ach gott, war ich aufgereecht. ich haben ganz langen hals gemacht und annere rumgschnufflt und se e paarmal gschtumpt. die hat getan, als
ob mir uns scho lang kenn dätn und is mir immer vorm maul rumgelaufn - die is net wech, wie des e anschdändiche katz mach dät, näääh! der Chris hat scho ganz komisch geguckt, so wie: ich soll ja seinere katz nix tu.
dann habbichse wahrscheinlich aber mal zu arch schrumpt und da hattse mir eine gschmiert, aber ohne kralln. die hattse dringelassn. da bin ich dann e bissle weiter wech
und habse mir von da angeguckt. des war dere katz aber zu langweilich und sie is widder nausgangn in ihrn wintergartn ...
ja, was war noch los .? ach ja, mir hamm jetz e fidiokamera und des kam so:
mir warn am sonndaach aufm platz - aufm altn. und da war der Jämmibabba und der hatsich e fidiokamera gekauft kappt und hat rumgschpielt mitere. des hat die alte gsehn
und jetz hat die alte auch eine habb müss - des könnt ihr euch doch denk, weil so e ding will die alte ja scho lang habb und bisher hattses sich net gekauft, weil die so teuer sinn
und weil mir eichntlich kei fidiokamera brauchn, nä?! aber jetz isses unglück halt passiert, weil auf dem Jämmibabba seiner fidiokamara der altn ihr name draufgschtandn is, so
sacht die alte immer (wasse damit wohl meint?) ... eichntlich wolltmerse beim Steffen kauf, weil der viel ahnung hat von die fidiokameras, aber der war net da und weil mir immer
alles gleich habb wolln, wenn mirs habb wolln, simmer am näxtn daach los und hamm uns eine gekauft. weil wenn mir des net soo machn, dann würcht uns der geiz widder und mir
kaufns dann doch net - sacht die alte - JAAAA, des sacht die immer! vielleicht zeichich euch den geiz ja noch, wenn ichn selber emal kennenlern .
jetz werdich wohl noch mehr leid müssn, weil jetz rennt mir die net nur mitm fottoapperat nach, sondern auch noch mit dere fidiokamera. gestern hatse scho angfangt damit. ich
habb mich nur noch nei mei haus verkriech könn, weilse mir ständich nachgelaufn is mit dem ding . *stöhn*
ja, und dann muss ich noch erzähl, dass der Christl ihr mamma gschtorbn is und des is
arch schlimm und traurich. und mir fällt gar nix ein, womit mer die Christl und den Detlev tröst könnt .
aber es is auch was erfreulichs zu berichtn - gottseidank!
ich hab euch doch erzählt kappt, dass der Dr. Schober mir mei blut wechgenommen hat, nä? und des hammer dann selber zum briefkastn gfahrn und neigschmissn.
jetz hamm die uns en brief gschriebn, dass in meim blut garnix drin is, was net neighört. is des net schöö? da müssn die mich jetz nach Norweechn neilass, da bleibt dene gar nix
anders übrich. und dass "meine blutwerte alle in ordnung sind" - wie die alte mir des vorgelesn hat, is doch auch schö, oder? GOTTSEIDANK, sachicheuch. wer weiss, auf was für ideen die sonst kommt ...
hmmm ..., geburtsdaache hammer auch widder gfeiert, aber des wisst ihr ja scho, dass
mir im märz e baar zu feiern hamm. es is auch nix besonders dabei passiert ...
sternzeit 2.153,6
ich weiss jetz auch widder, wie die rote gheissn hat - Lucky heisst die. mir hamm die nämlich getroffn und sinn gassi mitenander gangn. die hat noch ihr schwesterle dabeikappt.
eichntlich is die Lene ja net die schwester von der Lucky, aber weilse auch e griechin is - und auch e wechwerfhund -, sachn mir halt so. übrichens is die Lene vieeel kleiner als wie
die Lucky - die is sogar kleiner wie ich, eichntlich, sie hat bloß längere füss, aber sonst - ich glaub die wiecht netemal 10 kilo.
zuerst, wie die ausm auto ausgschtiechn sinn und ich hin zune bin, hammse mich recht angegauzt. aber wie mich die Lucky dann erkannt hat, da warse widder lieb und die Lene
hat auch aufghört zu gauzn. mir hamm uns begrüßt und sinn jeder seiner weeche gangn. schbiel tun mir nämlich net mitenander. die klee, die läuft mir zwar immer nach, wie wenn
ich schbeck in der tasche hätt und wollt auch schonemal mit mir schbiel. aber mir is des eweng beinlich, mit die kleine mädli zu schbieln ... und die Lucky die schbielt sowieso nur mit der Lene.
es is net so ganz einfach mit die zwei, sacht dene ihr mamma, die Bea, weil die manchmal andere hünd anmachn und bsssschhhhhht ..., manchmal machn die auch die zweifüsser
an! näääähh, nääähhh! des gibt fei einen ärcher! da schaffn die momentan dran, dass die zwei des nimmer machn. zwei hünd sinn halt e ruudl und e ruudl will nix mit andere zu tun
habb und außerdem sinn mir hünd immer stark, wenn mir e ruudl sinn, jaaaa!
auf jedn fall gehen mir jetz wahrscheinlich öfter mit die zwei spaziern und die Bea nehmn mir dann auch mit.
hinterher sinn die zweifüsser essn gangn. die Lucky hat öfters emal aufsteh müss, wenn die zweifüsser laut mit die stühl geraatscht hamm, weil des maach die Lucky net, da willse
dann immer flücht, weilse ganz viel angst vor stühl hat, wenn die geraatscht wern.
beim letztn spaziergang hat mir die Bea herzli mitgebracht aus leber, die hatse mir extra
gebackn kappt - ganz alleins für mich!! DIE hamm gut gschmeckt! bei der altn kriech ich ja kei so guts zeuch. aber die Bea, die kocht und bäckt für ihr hünd. nääähhh, eichntlich
kochtse net, weil des zeuch net gekocht wer dürf. des is alles roh, was die Lucky und die Lene zu essn kriechn, jetz außer dene herzli, weil die warn wie gesacht gebackn.
weil sonst die vitaminer kapputt gehen, sacht die Bea. und desweechn kriechn die zwei sogar des fleisch roh und dürfn sogar hüühnerflüücheli ess - mit die knochn! und rohs
gemüüs kriechn die und eier und obst und quark und haferflockn und nudln. und dann kriechnse noch so anders grüns zeuch nei in ihr essn und fischöl kriechnse drübergschütt .
.. könnt ihr euch des vorstell? fischöl - leckerschmatz!!!
barf nennt die Bea des; des is englisch und heisst bouns änd rooaahh fuuhd, sacht die alte - oder übersetzt heißts dann knochn und rohs essn.
von der alten kriech ich kei sowas, weilse zu faul is und dann einfach behaupt, dass des zu kompliziert fürse wär. dasse zu blöd dazu is und angst hat, ich kriech net genuch von
die vitaminer und von dem andern zeuch und dann meintse ich werd krank - dabei habbich im lebn net noch kei vitaminer gessn .
des sinn bestimmt bloß dumme ausredn von der alten. ich dätere scho saach, was ich von dem zeuch ess will und was net, ich kann des ungeniesbare ja rausfiesl, nä? auf des rohe
gemüs binnich gar net so scharf und die haferflockn, aber so ab und zu en apfl oder e baar erdbeern .
aufm platz hammer auch widder gschafft - eine arbeit is des jetz, wos anfängt warm zu
wern! stein hammer gelesn und ich hab die aufgab kappt, überall nachzuguckn, wo die löcher im zaun sinn. des war vielleicht widder e harte arbeit, sachicheuch. naja, und den
misthaufn kontrollier habbich gemüsst und die mäuslöcher such, damit da niemand neitritt und sich vielleicht gar noch die füss bricht.
naja, ihr sehts ja, wie mir uns geblaacht hamm. und außerdem hamm mir hünd auch noch
wachesteh müss und andere hamm helf müss, die großn stein auszubuddln, wenn die zweifüsser die net rausgekriecht hamm. dabei habbich immer gedacht, dass hundearbeit verbootn is ...
nach oben
|
