letzte änderung am 28. november 2003

sternzeit 2.400,7

ich hab e neus gschirr - eins aus leder. ich hätts ja net uhnbedingt gebraucht, weil ich viiiiel lieber nackich rumlauf, aber die alte, die freut sich richdich nei wechn dem ding. e ledergschirr hattse scho immer habb woll und noch viel mehr, seit die Gina ihrns hat. aber für so kleine hünd wie mich gibts ja immer nix gscheits, bloss die puhdlgschirrli, aber von denne wollt die alte keins habb. die gfallnere nämlich net.
endlich hatse eins gfundn und drum habbich jetz halt eins ...
ein vordeil hatts, des ledergschirr sitzt. net wie die andern gschirrli, die alle viel zu kurz für mich sinn und direkt hinter meine arm ihr riemele hamm. weil des drückt halt und desweechn isses auch net gsund, weil unter die ärm, da laufn die ganzn grossn adern rum, die, die arderien heissn und wennmer die dauernd neizwickt, dann is des gar net gut. aber die alte wollt mich jetz auch net dauernd am hals durch die geechnd zerr und desweechn habbich mit denne kurzn gschirrli leb müss. e halsband kriechich nämlich nur rum, wenn mir nuntern Main fahrn, weil da hängich nie am strick und wenn ich badn geh im sommer, dann habbich mei kettnhalsband um. aber, wie gsacht, mir isses am liebstn, wennich ganzegar nackich rumlauf dürf ...
also ..., wie binnich zu dere ehr kommn, e ledergschirr gschenkt zu kriechn?

ganz einfach, mir warn widderemal am Chiemsee. ich weiss zwar net, warum des immer heißt, mir fahrn nunter ann Chiemsee, weil mir sehn den Chiemsee ja eh nie. des is wohl eins von denne rätsl, wo ich net versteh, weil ich bloss e hund bin.
naja, wie auch immer, jednfalls hat die alte widder daachelang ihrn kruusch zammgebackt und widder ausgebackt und anders zeuch widder eingebackt in die reisedasche nei - wiese des halt immer macht, ihr wissts ja. damit nervtse mich immer, wenn mir fortfahrn ...
freidaachmiddach hat uns die Bea abgholt, weil diesmal simmer net mit dem Elvis seiner mamma gfahrn, die hat net mitgewollt - hmmm ..., irchndwie habbich den Elvis scho lang nimmer gsehn, wahrscheints maach der mich nimmer ...
weil mir mit dem uhraltn bee-emm-weh von der Bea unterweechs warn, hammer kein kappt, der uns gsacht hat womer hinfahr müssn. aber mir sinn drotzdem ankommn und hamm uns kei einzichs mal verfahrn! underweechs hammer wie immer an unserm rasthof pause gemacht, womer immer anhaltn, wenmer nuntern Chiemsee fahrn. da kriechn die zweifüsser dann was zum fressn und trinkn en kaffe - saachnse, aber in wirklichkeit müssnse aufs klo - und ich dürf da auch immer naus und die geechnd erkund, weil ich ja schließlich auchemal binkl muss. diesmal simmer sogar laang gassi gangn, bis in die felder nei, weils so schönns wetter gewesn is, und dann simmer weitergfahrn.

wie mir untn am Chiemsee ankommn sinn, wars scho fast dunkl. zuerschd hammer des hotel net gfundn und wiemers gfundn hamm, da hat die alte gelacht und gemeint, dasse da immer mit der Niki dran vorbei gfahrn is, wie mer zu die letztn seminare gfahrn sinn. die warn nämlich net in Aschau wie diesmal, sondern innem nachbarort, aber von demm weiss ich nimmer wierer gheissn hat. diesmal hammer e zimmer für uns ganz alleins kappt. die Bea wollt net bei uns schlaf, weil die nachts immer des fenster aufhab will und mir dätn dann derfrier - ICH ja net, aber die alte ist doch sooo verfrohrn, die dät bloss widder krank wer ...
swar jednfalls e schönns zimmer unds war warm drin! da hattmer die heizung aufmach könn und die is auch gangn - net so wie beim letztn mal, wo mir uns den bobbo abfrier hamm müss. mir hamm unser zeuch neis zimmer gschmissn und sinn erstemal durch des kaff gebilchert und hamm uns umgeguckt wo die katzn wohne und wasmer halt sonst noch alles wiss muss.
die zweifüsser warn erschdemal frusdriert, weils in dem brosbekt gheissn kappt hat, dassmer zu dere festhalle hinlauf kann, wo des seminar sei hat soll, aber dann hat der wirt von dem hotel gsacht, dass des drei kilometer weit wech is. so weit hamm unser zweifüsser net lauf woll und sinn desweechn am näxtn früh mitm bee-emm-weh hingfahrn. mir sinn extra frühs losgfahrn, damit mir en platz kriecht hamm, wo ich auch platz habb mit meim körble,



weil beim letztn mal da sinn immer so viele leut vorbeigelaufn, wo ich gsessn war und e baarmal is fast einer über mich drübergfalln. diesmal warn aber scho die disch ganz anders gstandn und ich hab viiiiel blatz kappt.
von dem seminar selber, brauchich euch net so viel zu erzähln, weil des geht mich ja eichndlich nix an, des is ja für die zweifüsser gewesn. bloss soviel, dasses irchndwie mit aufreechnung zu tun kappt hat und wiemer dafür sorcht, dass mir hünd uns ebn net soviel aufreech müssn. irchndwie hat des gheissn -schdress und schdradegihn der sdressreduggzion, glaubich - oder so ähnlich. des war widder über des cortisolzeuchs wie bei dem seminar im frühjahr. diesmal hamm die zweifüsser sogar schaff müss. die hamm so kleine weisse zetteli kriecht und dann hammse sich zu demm was aufm zettl gschdandn is was überleech müss. mir hamm kappt: der erschde schnee und dazu hamm die zweifüsser dann drüber nachdenk müss, was uns hünd da en haufn von dem schdress macht.

viel hünd sinn diesmal net im saal gewesn - vielleicht hättn die sonst zuviel schdress kappt. in meiner näh warn nur zwei gsessn und die warn net brav. die sinn dauernd aufgschdandn und hamm rumlauf woll oder sie hamm gegauzt und rumgewinslt. also nääääh ..., die hamm einen schdress GEMACHT, net kappt!!! da hat ja kei hund dabei schlaff könn ...



in die autos warn auch hünd ghockt - wie jedesmal. des war diesmal aber net so schlimm, weils net kalt und auch net zu warm war. in eim auto warn 7 hünd auf einmal drinngsessn. die hamm alle einer einzichn frau gekört. wie mir in der middachspause spaziern gangn sinn, habbich die gsehn, aber die hamm net hergedürft, weil des fraule von dene gemeint hat, des ging net mit 7 hünd. und einer, des war e ganz arme sau, der hat in die kurzn pausn nuremal kurz raushüpf dürf ausm auto und e paar meter lauf dürf, dann hatter scho widder neigemüsst in sei box. in der middachspause sinn sei leut sogar ohne ihn spaziern gangn. stellt euch des doch emal vor, zwei daach lang, war der den ganzn daach in dere engn box im auto ghockt! nääh, nääh, nääh ...
überhaupt habbich kaum en andern hund beschnuffl dürf. die sinn immer alle wechgezerrt worn, oder die herrli von dene hamm gsacht, dass ich net hindürf, weil die sonst bös wern . bloß die 3 schwarzn mädli, die mir jetz scho aufm drittn seminar getroffn hamm, die sinn sogar mit uns schbaziern gangn. des mädle von dere frau, die auch mit vorne gschdandn is und immer alles nochemal gsacht hat, was die andern scho gsacht kappt hamm - die übersetzerin, sacht mir die alte grad - die hammer underweechs getroffn. die wollt mit mir schbiel, aber da war ich grad beschäfdicht, sonst wär ich net ferdich worn, weil die middachspause war ja vieeel zu kurz. ich habb mir eh bloss eine einziche maus fang könn. wenn ich jetzt mit dere gschbielt hätt, hättich noch netemal die kricht ...



ach ja, a anders mädle, e kleins, die wollt auch mit mir schbiel und hat mich richdich angemacht, aber wie ich dann mitspiel habb woll, hatse blötzlich angst vor mir kappt - weiber halt! wennde als kerl EINMAL eweng grob wirst, dann spielnse die empfindlichn pflänzli ...
dabei habbich doch jetz e ledergschirr und die alte hat gsacht dasse mir jetz noch e tüchle für ummen kopf sucht, dann is der Rambo ferdich - siehste, also ...!!!

ach ja, des ledergschirr ...
in einer von denne pausn is die alte zu die ständ gangn, womer was kauf kann und da hattse des ledergschirr gsehn und auf dem ledergschirr, da war widder ihr name draufgschdandn und drumm hattse des uuunbedingt habb müss - ein schweinegeld hattse dafür ausgebn. zwei bücher und en haufn guddelichs und so e blöds schbiel hattse mir auch noch gekauft - des schbiel hättich ja net unbedingt habb müss!. da tutse nämlich immer guddelichs nei und ich muss die dann rauspfrieml. aber net dass des so einfach geht, näääh ..., des is e indelligenzsbiel für hünd. da muss ich mich richdich blaach für jedes einzelne guddelich! und dabei habbich immer gedacht, dass hundearbeit verbotn is! die Bea hat der Lucky und der Lene auch so e ding gekauft, e anders wie meins, bei denne ihrm mussmer dreh und net kratz und scharr wie ich bei meim ...

des seminar war desmal viel schöner wie die andern, wo mir vorher warn. in Aschau kammer nämlich stuuundnlang spaziern geh. da gibts en weech, der "grenznlos" heisst und an dem sinn mir früh und in die großn pausn langgelaufn und abnds da simmer en andern gangen, der auch schö war. an alle zwei hattmer mäus buddl könn und klumpfüss hats auch da gebn. hingedürft habbich aber net zu dene, weil die alte angst hat, dass die mich an kopf haun und ich dann dot wär.
die dätn mich doch garnet kriech, die klumpfüss!
naja ..., vielleicht muss ich doch net grad zu denne hin ...,
die sinn mir doch sowieso viieel zu doof ...
die renne net wech, wenn ich komm ...
nääh ..., die bleibn einfach stehn und strampfn mit die füss. und wenn ich net wechgeh, dann pfludern die mir neis gsicht, dassich ganz nass bin, nacher ...
nääh ..., wen interessiern denn scho die klumpfüss ...?





die entn warn viel interessanter - und die renne auch davon, wenn ich komm. bloss, dass die fliech könne, des findich immer noch gemein ...
viele, viele spurn von andere viecher habbich gfundn und ...
- ICH  HAB ALLEINS  LAUF  DÜRF, ohne dass ich die alte an der leine hätt führ müss.
des alleins war scho die ganze fahrt wert, sachicheuch!






die zweifüsser warn auch begeistert. die hattn doch des letzte seminar im frühjahr net sooo ganz interessant gfundn kappt, nä? jetz, nach demm seminar hammse auch des erschde verstandn, hammse gsacht. stellt euch des vor - soo blöd sinn die!
die zwei seminare greifen ineinander, hat die alte gsacht und ohne des eine verstehtmer des andere net und dann hattse sich hingsetzt und e brotokoll gschriebn über des seminar, des wo 22 seitn lang is ...
so begeistert war die von dem seminar!
und fürs näxte jahr hattse sich scho widder für 3 neue angemeld ...
da muss ich dann auch widder mit "nuntern Chiemsee" fahr und wahrscheinlich sehichn Chiemsee dann auch widder net ...

___________________________________________________________________


e woche später warmer dann scho widder unterweechs - aufm wörkschopp. da sinn mir, der Chris mit der Edith und der Jobo mit der Anja nach Blanknbach gfahrn und hamm uns die Märri Räi angeguckt. die is  DIE konifere im dogdänzing hat die alte gsacht und dasse die uuunbedingt seh muss.
swar ganz lustich dort. mittn im wald - blöd war nur, dass ich DA net alleins lauf hab dürf, sondern die gaaanze zeit die alte an der leine hinter mir herschlepp hab müss. en fux habbich gsehn - der is fast direkt vor meiner nas übern weech glaufn und was da sonst noch alles gewesn wär ...
der wörkschopp war anschdrengnd - für die andern, hähähä. die alte und ich, mir hamm uns gemütlich hinghockt und zugeguckt wie die andern sich blaachn. ich habb mich in den Jobo sei hüttle neigschmugglt und die alte hat rumfottografiert. die andern hamm schwer schaff müss. weil die Märri Räi seh hat woll, was die scho alles könne. nur einmal, da hammse uns drankriecht und hamm gemeint, dass mir ja schließlich en haufn geld bezahlt hättn und desweechn ruhich auch mitmach solln. weil die alte natürlich zu blöd fürs dogdänzing is, habbich halt mit der Märri Räi gschafft, wie ihr auf die fottos seht. stinkefisch hats gebn - dafür kannich dann schonemal rückwärts lauf. wenn die bloß net so gemein gewesn wär, die Märri! grad habbich lauf müss, sonst hätts nix gebn ...



wer muss scho grad rückwärts lauf könn, hä? also mir däts lang, wenns eweng krumm wär, aber nein, sie musses grad hab woll!



middachs hamm sich die zweifüsser bizza komm lass. des war gut - gut für mich, weil die bizza der altn net gschmeckt hat. der bodn war soo hart, dassmern net schneid hat könn und beiss auch fast net und scharf war die bizza - die alte hat natürlich noch extra sardelln drauf habb müss, damits noch schärfer wird. unser zweifüsser hamm gemeint, dass eim die die ganze maachnschleimhaut wechfrisst! ich hab den rand aber doch ess könn, der war net scharf, bloss bucklhart ...

nachmiddaachs hamm die leut mit musik danz müss. des hat dann gar nimmer geklappt, weil die alle irchndwie zu blöd warn zum zähln. die Märri Räi hat gsacht, die solln lauf mitm hund und zähl - eins, zwei, drei, vier, fünf, sechs und bei siebn und acht hat e twist komm soll. aber glaubt ihr, die hättn des gschafft? die meistn hamm sich dootal verzählt ...
mir hamm da garnet mitgemacht, weildes ja sowieso nix worn wär, aber der Chris und der Jobo hamms gut gemacht und unser ehre gerettet ...
irchndwann wars dann rumm und mir sinn widder heimgfahrn. ein nebl war! und gereechnd hats auch. und weils scho dunkl war, hat die Edith fast net gsehn, wose hinfährt. des war fei anschdrengend!
und weils so anschdrengend gewesn war und weil der Thomas hunger kappt hat - der war ja den ganzn daach alleins daheim gsetzn und hat nix zum essn kriecht, weil ja der Chris mit der Edith net da war, simmer zu unserm griechn gangen und - ihr werds ja nie derratn - die zweifüsser hamm sich die bäuch vollgschlaachn und uns zwei arme hünd bloß widder trockns brot und e baar scheible knoblauchkardoffln abgebn ...
so sinnse, die zweifüsser ...
___________________________________________________________________


an dem daach wo mir bei der Märri Räi warn, hat die Christl geburtsdaach kappt kappt, aber weil mir net da warn, hatse erst die woche drauf gfeiert. swar aber net so lusdich wie sonst, weil der Sputnik net lauf hat könn. der hat sich wehgetan kappt und die Anke war desweechn ganz unruich und net so lusdich wie sonst. und drum sinn die Sputniks dann auch ganz früh heimgangn ...
die Christl hat en selbstgebastltn ballong kriecht, weil mirere en teil vonnere ballongfahrt gschenkt hamm. und außerdem hatse noch von meim stinkefisch kriecht fürn Flocke - des hät jetz aber net sei müss, find ich ...!

___________________________________________________________________


ansonstn warn mir widder jede woche bei die altn leut. mittlerweile hammer da ja scho echt ruhtine ...
in Rimpar wirste jetz immer größer, wennde aufm platz rumläufst, so ein matsch is da. mir müssn fast immer untn vor der halle üb ...
dem Lucky sei oppa hat anfang könn zu baun, weiler endlich holz kriecht hat ...
und der Chris und der Flocke hammen test beim dokter mitgemacht. der Chris war da ganz cool - den kann ja fast garnix erschütter - aber beim Flocke hat die tante dokter festgschdellt, dass, wenn die Christl ne mit guddelichs füttert, sei herz viel langsamer schlächt, er schnauft auch net so und reecht sich überhaupt net so auf, wie ohne guddelichs. weil einmal hatsene neigerufn in ihr zimmer und die Christl hatn nix geb dürf und beim zweitn mal hatsem was geb dürf. ich saachs ja immer widder - essn beruicht die seele, da haste viel wenicher schdress ...
appropopo essn ...
unser zweifüsser dürfn auf die weihnachtsfeier von die altn leut geh, weilse so gut schaffn mit dene - und? was is mit uns hünd? uns nemme se net mit!
des wär zu anschdrengend für uns, weils da so eng is und weil so viele leut da sinn und weils ja soo laut is. da hättn mir hünd bloss en haufn von dem schdress - sachnse!
die sinn ja sooo gemein, sinn die ...!

nach oben