letzte änderung am 19. oktober 2003

sternzeit 2.342,7

bei uns gibts nix neus zu berichdn, weil sis eichndlich net viel bassiert in demm monat ... des heisst, bassiert is scho was, aber nix, was euch intressier dät oder was ich euch noch net erzählt hätt - des übliche halt - bissness äs juschuäll, sacht die alte. mir sinn viel underweechs, wie immer ... - eichndlich simmer jedn daach beschäfdichd und kommn erschd nachts um 10e oder 11e heim ...
und dann kann die alte kei wäsch mehr wasch und muss dauernd neue kauf ...
aber - wie gsacht - ihr wisst ja, was mir so alles machn ...

aufm floomarkt warmer widderemal und hamm alts gerümpl verkauft. dem Chris und mei aufgab war, hindn im beemmweh zu sitzn und brav zu guckn, damit die leut zu uns kommn - wasse dann ja auch gemacht hamm, weil da sinn mir richdich gut, der Chris und ich. und im beemmweh drin warn noch der Beethoven und der Cento gsessn, wenn die leut noch mehr hünd seh hamm woll ...
was die sich gewundert hamm, dass mir zu viert in eim auto sitz könne und uns net dotbeissn! also nääh ..., was denkn die leut eichndlich von uns hünd, hä?



ja, und en wörkschopp hammer auch widder kappt.
swar ja scho von anfang an vielversprechnd. mir hamm direkt nebnm wildpark unser auto hingschdellt da wo die viecher rumgelaufn sinn. die hamm komische küh da, die net küh heissn, sondern "schottische hochlandrinder" und die noch netemal so ausehn wie küh eichndlich auszusehn hamm ...
dann hammse noch esl - die hatmer scho von weitm schrein ghört - und schafe und ganz viel anders viechzeuch, des wo sonst im wald wohnt uund ...
JAAAA, die hamm auch klumpfüß kappt! gaaanz viele!
die sinn e baarmal direkt an mir vorbeigelaufn, so dicht, dass ich fast neibeiss hätt könn und einer von die klumpfüß hat mir direkt ins gsicht neigepfluderd, ein frecher kerl, der hat sich garnet vor mir gfürcht, worer doch garnetemal sooo viel größer is als wie ich ...

die Lene hat net mitgedürft zu dem wörkschopp, weil der Bea des sonst zu schdressich gewesn wär mit zwei hünd (sie hat ja schließlich nur zwei händ zum datschn) und drum hatse die Lucky alleins dabeikappt und die Edith hat nur den Chris mitgenommn und den Thomas hatse daheimgelassn. der Chris hatt noch die scheisserei kappt, von seiner narkose und die Lucky is zu spät kommn, weil sich die Bea verfranzt kappt hat, aber wie mir dann endlich alle unser siebn zwetschgn zammhattn hammer uns in die große halle gsetzt, wo normalerweis die klumpfüss drin im kreis renne, wenns reechnd. ganz arch hats nachne gerochn ... der bodn war ganzegar mit sand ausgschdreut, damit mir hünd wenichstns weich liech könne. naja, ich gebs zu, eichntlich machen des die zweifüsser, damit die klumpfüss weich lauf könne, weil die wehe füss kriechn, wenn der bodn zu hart is ...
unser zweifüsser hamms net so gemütlich kappt wie mir, die hamm auf holzstühl und -bänk im kreis sitz müss.
es warn natürlich widderemal nur lauter zweifüsserweibli da - gott, war des beinlich - den ganzn daach musste bei die weiber rummsitz. also ich weissnet, warum die zweifüssermännli so feiche säu sinn ...
zuerst hats mir in der halle garnet gfalln und ich hab mir gschworn zu soem quatsch geh ich nimmer. aber dann wars total gut. den ganzn daach lang hammse an uns hünd und an sich selber rumgfummlt - tellingdn datsch nenn die des und des is was ganz was besonders, sachnse. des is net bloss e einfache massaasche, näää ..., des reecht des nervnsystem an und mir hünd schbürn dann unser füss und unsern körper. habt ihr sowas schonemal ghört?
also ich, nä? ICH schbür mei füss immer!
naja, swar wie gsacht recht angenehm, wie die so an mir rumgfummlt hamm mit ihre diechergralle oder mitm leobard oder wie des sonst noch heißt. eichntlich sinns ja nur immer kreisli mit die finger, aber wenn mer des so e zeitlang gemacht kriecht, dann kribblt hinterher die ganze haut unds wird ganz warm an dere stell.
am popo oder am maul lass ICH mir aber net rummdatsch, nääää ..., des kommt gar nicht in fraache! ich bin doch net die Pippa, dere hat die frau (die, die angebn hat, was gemacht wird) sogar IM maul rumgfummlt und an der lippe gezoochn hattsese, tztztz ..., weil die aaaangeblich so hibbelich is und dann ruicher wird ...

unser zweifüsser warn begeistert und hamm sich geechnseidich massiert und dann widder uns und dann widder sich geechnseidich ...
die ohrn hammse uns hünd langezoochn, immer widder ...
und dann hat mich die alte ganz leicht hochghobn und nachere zeit widder nuntergelassn. wisster, nur ganz wenich - die füss müssn noch aufm bodn stehnbleib - gaaaanz langsam und nachere zeit dann widder gaaaanz sachte nunterlass. des kann die alte jedn daach mit mir mach! des dut richdich gut! des entlastet die muskln und die wirblsäule und is ganz besonders gut für krohnische krankheitn, wie schbonndilohse oder artroose oder für hadee - hat die Peggy (ihr wisst scho, die, die angebn hatt, was gemacht wird) gsacht.
und wennde e hund bist, der gaaanz viel angst hat und sich net anfass lass will von die zweifüsser, dann nemme die zwei dünne weisse steckn und streichln dich damit überal. "reitgerte" heissn die steckn und "abstreichn" des, was die zweifüsser damit machn.
zum schluss kriechste dann noch sfell glattgschdrichn mit die händ, weilse dann widder "en ganzn hund aus dir mach müssn", net dassde zum schluss einseidich bist. gaaanz langsam wirste gstreichld, bis in alle vier füss nei undn buckl nunter bis in die schwanzspitze. des is gaaanz wichdich, weil im popo und im schwanz des selbstbildnis sitzt und das selbstwertgefühl - JAAAA, lacht nur ...!

einiche von die andern hünd hammse verbackt, richdich eingewicklt mit bindn ummen bauch, unter die bein durch und unterm schwanz und dann hamm die über stangn lauf müss und zickzack durch hütli. und zwei zweifüsser hammse gführt mitm reifn um die brust oder die leine vornrumm. des machtmer auch, dass die hünd ihrn körper schbürn. und drum haltn dir die zweifüsser auch die dünnn weissn steckn vor die brust und du darfste net an der leine zieh, sondern musst schö langsam und sachte lauf ...
hmmm ..., swar haltemal was gaaanz anders, wie die andern sachn, die mir scho gemacht hamm ...
des war also unser wörkschopp und was war noch?



ach ja, e buch hat die alte sich widder schick lass - des is aber auch nix neus, davon hammir ja scho 100 stück und außerdem hattse sich net nur ei buch bestellt, sonder 4 ...
in dem eine buch jednfalls, da steht lauter zeuch übers schnüffln drin und da sinn mir jetz eifrich dabei, des nachzumachn. da is fei manches davon ganz arch schwer, aber ich find des zeuch scho, und wenn ich stundnlang such muss! manchmal is die alte so gemein und lässt mich such, obwohl garnix zu findn da is. IIICH  suuch und such und wenn ich dann aufgeb, dann lobtse mich und meint, dass ich des "gaaanz feiiiin" gemacht hätt - wennses glücklich macht und ich mein käs kriech ...
gemein is auch, dasse mir gar nimmer hilft beim suchn wie früher. weil in dem buch steht drin, dasse mir net helf dürf, dass ich mein dreck ganz alleins mach muss - behauptet  SIE jednfalls ...
weil sonst könnt ich ja denk, die alte hätt e bessere nas als wie ich. sachtemal, denkn eichndlich alle dass ich blöhd bin???



findwoderhingelaufnis hammer auch widder gschbielt, draußn in unterbleichfeld, auf die abgeerntn felder. zweimal hammer des jetzt scho gemacht, mit der Lucky und der Lene. die Lene stellt sich ja dabei e kleins bissele doof an, weil die immer in der luft rumguckt, ob net offn irchndwo was rumlicht. aber die Lucky (des ärchert mich eweng) die kann des besser als wie ich, des käsespursuchn ...
einmal, da hamer den Volker such müss. der war kreuz und quer übern acker gelaufn. der Volker, der hat noch nie kei fährte gemacht und kann des noch net so richdich. unser zwei weiber hamm sich recht schwer gedahn, weil die fischli, die der  Volker verlorn kappt hat, hat mer unter die vieln kleinen maisblättli net gsehn. da wars dann widder ganz deutlich zu sehn, WER  hier eichndlich die gute nas hat und wer total hilflos durch die geechnd dappt ...  ICH jednfalls - und ich glaub, die Lucky auch - habb alles gfundn, was der Volker verlorn hat - bloss den Volker, den hammer nimmer find könn, der war schon wech ...
mit die ohrn isses doch genauso!
nachts, nä? da will mir die alte immer erzähl, dass da gar nix is und dabei kann ich ganz deutlich den iichl im gras rumrenne hör. oder ich hör wen hinter uns herschleichn und brumm in die richtung - schließlich fürcht die alte sich nachts im dunkln -  ICH net. aber wenn ich ihr zeich, dass da einer rumschleicht, dann isses auch widder net recht ...

nach oben