|
|
 |
letzte änderung am 1. mai 2007
sternzeit 3.583,10
dassich alle woch zu die altn leut geh, wisster ja scho ...
... des machich jetz scho ball vier jahr ...
reechlmähsich immer am diensdaach ...
... dann lassich mich schdreichl von die leut und fütter und dann freun sich die altn leut ...
... und die alte freut sich auch, weilich so brav bin ...
|
|
|
|
|
|
obwohl allewall isses net ganz so doll da, weil heuer scho zwei von unsere altn leut gschdorbn sinn. außerdem is die eine frau,
sooo krank, dasse nimmer komm kann und der eine mann, der kann auch nimmer in sahl komm und drum muss der Chris immer nunter zuem geh undn in seim zimmer besuch ...
... und die Frau Kühsella, die
muss immer erschd ihr zeuch aufräum und bis die kommt, binnich scho halber verhungert ...
|
|
|
|
|
... oder ich hab mir scho bei die andern altn leut was hintnrum gschnorrt. dann isse beleidicht, weilich nix mehr neibring und se mich blohs
schdreichl dürf. dann drohtse mir, dasse nimmer kommt, wennse mir nix zum essn geb dürf. ich sachs euch, hünd, mer hats net leicht, wemmer so viel zum duhn hat ...
... und da will die alte, dassich noch nach Rimbahr zu die altn leut auch noch geh, weil ...
... der Beethovn kei zeit kappt hat und die Christl die alte gfraacht hat, ob mir ausnahmsweis auchemal am
donnerschdaach mit nein Rimbahrer altnheim geh dähtn ...
eichndlich müssn mir donnerschdaachs ja zu die wehitwotschers. die alte hat nämlich die ganzn letztn jahr viel zuviel gfressn und desweechn isse jetz zu
fett, nä ... ? mehr mussich glaubich net saach, oder ... ?
... und weilse net alleins zu die wehitwotschers geh will, mussich, wie scho vore baar jahr, jede woche da mit hindapp und mir des gschwahfl anhör. zum
fressn findich da nix, die hamm kei einzichs leckerle für mich übrich. ich weiss garnet, warum ich da eichndlich jede woche mitgeh ...
aber wo warich jetz ... ?
... ach ja, im Rimbahrer altnheim ...
also, ich bin da hingfahrn mir der altn und den Flocke gsehn undn Linus. der Linus und der Flocke hamm sich gleich böhs angschdiert und der Linus hat mich aufdringlich abgschnufflt und des is dem wurscht, dassich
des net leid kann. so eine frechheit ...!
... könnt ihr euch des vorschdell ... ?!?
|
|
|
|
... mich hat die alte selber beschäftich müss und zum glück hat uns dem Linus sei mamma, die Uli, vom Linus seim fressn immer
was abgebn, sonst wärich doch glatt verhungert ... !
sonst hamm mir net soooo arch viel gemacht, weil die alte kann doch immer noch net richdich lauf weechn ihrm kabuttn fuss ...
nach oben
|
|
