|
|
 |
|
|
 |
|
letzte änderung am 10. februar 2008
sternzeit 3.809,11
ICH hab mich scho gfreut, weils gheissn hat, mir fahrn aufe seminahr zur Silvia …
… ihr wisst scho –
schö auf dere ihrm gelände rumschbring und buddl und schnuffl und mäus such und …
… NIX … !
… die Silvia is umgezoochn und jetzt machtse ihr seminahre in ihrm neun haus, untn im keller und
ausn um ihr haus rum is kei gartn und mer kann blohs eweng auf die gass rumlauf …
… und middachs vielleicht nein wald gassi geh …
… und weil einiche hünd bei dem seminahr dabei warn, die sich net
benemm könne habbich ganz schö lang im audoh sitz müss …
… SO habbich mir des net gedacht, wenn ich des gewisst hätt, wärich doch garnet mitgfahrn …
naja, die alte und die andern zweifüsser
hamm sich scheints amüsiert und wennich mit nein keller gekönnt hab, dann habbich wenichstns guddelichs in massn abgschdaubt. des seminahr hat zwei daach gedauert, aber mir sinn abnds immer widder heimgfahrn und
hamm in unserm eichene bett gschlaafn.
sternzeit 3.829,11
mir hamm uns mit der Lara undm Felix beim Flocke gedroffn. der Chris und die Schanett
warn auch dabei. war ganz lusdich, weil, wenn die Schanett dabei is, isses ja immer lusdich, die misch immer alles auf – ganz wursch, obs zwei oder vier füss hat …
mir altn – ich und der Chris und die Lara, mir hamm uns die meiste zeit untern disch geleecht und hamm beobacht, wie der Flocke mit der Schanett gschbielt hat und der Felix
is rumgelaufn, der weiss immer net so recht, obber ein verhau will, oder obber sich brav hinleech soll.
geraatscht hamm die zweifüsser und gessn und gedrunkn und widder geraatscht und
beschlossn, dasse sich ball widder dreffn …
… sonst kannich euch jetzt nix neus erzähl, swar halt wie immer …
sternzeit 3.831,11
was neus hammer aber auch angfangt …
… es geokäschn …!
des is fei schö, weil da kannich auch mitmach und sdundnlang laufn mir da rum und suchn nach demm käsch.
also, ich erklähr euch des jetztemahl, gell … ?!
|
|
|
|
|
|
irchnde zweifüsser der denkt sich „och, ich könnert widderemahl en käsch verschdeckl“ …
… und dann denkter sich
aus, worern verschdeckl will und überleecht, wasser neiduht in den käsch und waser draufschreib soll. manche machen auch richdiche rähdsl, die wo die andern zweifüsser – die wo den verschdeckltn
käsch such müssn, dann mach müssn – da heisst zum bleischdift, dassmer die buschschdahbn zähl müssn, die wo irchndwo draufschdehn und die dann muldiblizier muss mittere jahreszahl, die wo woanders
schdeht. und dann mussmer noch die schuhgröhs abzieh und dann kriechtmer die ko ordinahdn.
|
|
|
|
|
andere ko ordinahdn hat der verschdecklzweifüsser scho in der alten ihrn kombuhder neigschriebn und nocheweng e rähdsl, dasses die alte
net so leicht find und da sucht die dann die ko ordinahdn und schreibtse in unser gerähdle nei, des wo uns den weech erklährt, wenn mir mitmm audoh underweechs sinn. und wenn die frau sacht: „Sie haben ihr Ziel
erreicht“, dann schdeichn mir ausm audoh aus und fangn an zum suchn …
… und suchn …
… und suchn …
… oft suchmer schdundnlang … !
… und manchmahl findn mir noch netemahl was … !
… und müssn so widder heimfahr …
aber manchmahl findn mir den käsch – meistns, wenn mir net alleins suchn – und dann freutsich die alte ganz arch nei und grabblt in dem schächtele rum und guckt,
was drin is und zum schluss schreiben sich alle auf des babier drauf, dass dann jeder weiss – MIR hamm den käsch gfundn … !
… und wenn mir abnds heimkommn dann schreibt die alte in ihrn kombuhder auch nochemahl nei, dass mir den käsch gfundn hamm …
… und meistns suchtse dann schon en neun raus, den wo mir mach könne …
mir isses eichndlich wurscht, ob mir den käsch findn oder net …
… weil ICH bin doch net so blöhd und such e schächdele, in
dem wo nix drin is zum essn, blohs babier oder irchndwelchs alts zeuch …
… nä … !
… ICH such mei mäus und manchmahl findich auch, wo e has gelaufn is, oder anders viechzeuchs …
… oder ich buddl mich nach Austrahlien durch, wie die alte sacht …
am schönstn isses, wenn die ko ordinahdn net ganz schdimmn … *hähähä*
… weil dann suchn sich unser zweifüsser en wolf …
... und ICH kann gaanz lang drausn rumschnuffl …
nach oben
|
|
