Mai 2007

letzte änderung am 02. August 2007

sternzeit 3.651,10

schbarchl hammer kein kriecht ...
... weil am feierdaach halt keiner aufhat, noch netemal in Randersacker ...
... aber dafür hammer uns in Randersacker verfahrn und hamm nimmer nausgfundn aus die kleine, enge gässli. nirchndwo hat mer rumdreh könn und mir hamm immer weiterfahr müss und weiter ...
... und blötzlich warn mir gaanz drohbn, in die weinberch ...
... und weil da e barkblatz war, hat die alte beschlossn, da könne mir doch nocheweng rumlauf, mir zwei ...
... und des hamm mir dann auch gemacht ...

zwei schdund sinn mir da obn rumgelaufn. des war dodahl schö, da drohbn, weil da warich noch nie.
einen haufn schbuhrn habbich gfundn und drei hasn habbich gsehn ...
... kei lumbiche karnickeli ...
... näääh ..., richdiche hasn ...
... die sinn mir einfach so vor die fühs rumgelaufn – einer war kei zwei meter von mir wech ...
... war daghockt und hat mich ganz frech angeglotzt und sei hälmle gemümmlt ...
... und is dann ganz langsam davonghopplt.
hünd, wenn ich die alte net am schdrick kappt hätt ...! ich hätt den kriecht ...
... ganz beschdimmt, des könnt ihr mir glaub - DEN has hättich kriecht! und den hätt mir die alte nimmer wechnemm könn! aber so ...

näh ..., näh ..., näh ... !!!
... und kei halbe schdund drauf ...
... rennt mich ball e reh übern haufn ...
... kommt ausm wald rausgerennt ...
... guckt net rechts und guckt net links ...
... und wär ball noch auf mich draufgetretn. reisst der altn die leine aus der hand. naja, ich bin ja auch nimmer der jüngste, ähem ..., naja ..., äham ..., bissich lang geguckt hab ...
... wars fort und die alte hat ihrn fuss auf die leine gschdellt kappt.
naja, da habbich dann nimmer hinterher gekönnt ...
... schad ...

mensch, war des aufreechnd, da obn in die weinberch vo Randersacker ...
... da willich widder hin ... !

nachmiddaachs warn mir noch auf unserm blatz in Rimbahr.
ich hab geguckt, ob ich des häsle net doch noch find ...
... und die alte hat an die büsch rumgschnipplt.

vorher warn mir in Berchtheim aufm flohmarkt und wiemer durch Unterbleichfeld kommn sinn ...
... hats da doch dahtsächlich schbarchl gebn ...
... und den hammer dann abnds mitenander aufgfressn, mit kardoffl und schinkn und eier ....

... und am näxtn daach ...
scho widder en has aufm blatz gsehn, aber die feiche sau war so schnell wech, dassichm blohs nachguck hab könn …
… dann warer scho unter dem haufn gerümpl verschwundn und is nadührlich nimmer rauskommn, des könnter euch ja gedenk …
allewall sinn scho arch viele hasn unterweechs, die hüpfn ganz frech auf die straas rum und bei uns aufm blatz, da warn einmahl scho gleich drei schdück ghockt …
… und ich hab net naus gekönnt … !

sternzeit 3.653,11

die alte übt mahl widder öftersch mit mir …
… ob des was damit zum duhn hat, dass mir heut genau aufn daach 10 jahr lang mitenander leben … ?


	mensch, hünd, 10 jahr … ! … eichndlich, wemmersch richtich nimmt, mein ganzes leben – oder wenichstns fast …


	… und sooooviel mitenander erlebt und durchgemacht ...


	und immer noch macht mir die alte so mei broblehme! aber naja, ich will net klaachen, shätt mich schlimmer treff könn. wennich so die gschichtn von andere hünd hör, dann denkich mir ...,

... es hätt schlimmer komm könn, damahls …

… eichndlich lässt mich die alte mach, wasich will.
ab und zu schreitse mich und dann guckich hin zuere und sie is scho zufriedn – blohs mäus aufm blatz lässtse mich net buddl, dann kommtse her und verscheucht mich – „ich muss mal grad den Herrn Krueger disziplinieren“ nenntse des. des hörich aber meistns scho, wennses sacht und dann setzich mich ganz brav auf mein belzbobbo und guck neis mauseloch nei …
… dann kannse mich net schimpf, hähähä …

hmmm …, jetz habbich mich widder vergalloppiert …
… beim übn warich, gell … ?
... jedesmahl, wenn mir naufn blatz kommn, dann übn mir, bevor die andern hünd alle kommn und die alte dann mit denne übt …
… und der Flocke macht auch mit, wenner da is …
… dann wird abgewexlt. erscht üb ich und dann der Flocke und dann widder ich und dann widder der Flocke …
des macht fei schbass und essn gibt’s auch en haufn. es einziche plöhde is, dassder Flocke des immer so schnell alles kabbiert und dann frisster vieeel mehr guddelichs als wie ich in der gleichn zeit. gemein is des! die alte sacht, dass der Flocke viel schlauer is, als wie ich, aber des glaubich net …
… des is die alte selber, die macht mich immer ganz wuschich und ich weiss net, wasse jetz eichndlich will, weil einmal machts klick-klack so und dann widder net so, sondern ganz anders. da sollsich e hund noch auskenn …
näh …! des is net, weilich so plöht bin, des is die alte, die wo so plöht is …!
… ganz beschtimmt … !!!

heut warich aufm maimarkt mitm Chris …
… war net schlecht, weil der Chris, näh?, der Chris hatte gschäfft – eichndlich hat sei mamma des gschäfft, aber des is ja wurscht, hauptsach ICH hab auch was von dem gschäfft. in dem gschäfft gibts sooooviele guddelichs auf eim haufn, wie ihr beschdimmt noch nie gsehn habt.
lauter verschiedene!
so viele, dassichse garnet alle brobiehr hab könn.
ich hab mir aber fei wirklich viel müh gebn und hab alles aufgfressn, was mir die zweifüsser vom Chris gebn hamm, undm Chris.
hamm ich und der Chris wenichstns auch was zum duhn kappt und warn net blohs rummghockt.
swar net viel so viel los, wie sonst. ab und zu hamm irchndwelche zweifüsser sich hergschdellt und hamm mit unsere zweifüsser geredd und hamm sich alles angeguckt und manche hamm auch was gekauft für ihrene hünd …
… und die Josie is auchemahl vorbeikommn mit ihrm babba. und vorher warn ihr mamma und ihr babba alleins da und dem Chad sei leut sinn dagewesn undm Paddy sei leut – aber ohnen Chad und ohnen Paddy und Bonny …
… und – bscht – verratsm net …
… em Linus sei omma und sei obba warn da und hamm fürn guddelichs gekauft …

wiemer aufm maimarkt fertich warn, simmer noch zum Chris heim und da binnich im gartn rumgschbrungn und hab katz geguckt …
… und in deich binnich neighüpft …

ach ja, gestern warich ja im Flocke seim deich und hab hasn geguckt …
… und wenn da net so e plöhts gitter wär, hättich mir die alle gfangt. die kommn immer ganz nah ans gitter her, dassichne über die nas schleck kann und der eine has, der bleibt dann immer sitzn und glotzt mich frech an.

sternzeit 3663,11

ojhe, ohje …
… mir bleibt aber auch nix erschbahrt …
… frühs um 4e ausm korb gerissn wer und ins audoh gschdopft …
… des kann doch net wahr sei … !

… und dann simmer mitm Chris widder emal nuntern Kiehmseh gfahrn, weil die alte und die Edith und die Christl e semminahr mach hamm müss …
… der Flocke war net dabei, der hat daheim bleib dürf, dabei wär des egrad für den was gewesn, weils über leinenackression gangn is …
… aber den Chris hammse auch ausm bett gezerrt, der hat auch mitgemüsst …

wenn ich euch derzähl, dass der Thomas gfahrn ist, dann wisst ihr glaubich scho bescheid, oder … ?
… demm Thomas hat nämlich immer noch keiner gsacht, dass der beeemmweh kei fluchzeuch is …
… und drum warn mir auch blohs dreiehalb schdundn underweechs – immer im „dieffluuch, in landehöhe“, wie die alte sacht …
… und dafür warn mir dann vieeeel zu frühs da und alle lähdn hamm noch zukappt und des hodell, wo des semminahr sei hat soll, war auch noch zu. dabei hamm unser zweifüsser doch noch en kaffe drink woll. durchs halbe dorf simmer gewallt, bissmer e bäckerei gfundn hamm, die wo scho kaffe verkauft hat …

des semminahr hat dann erschd um halber 11e angfangt, weil e bahr von die andern deilnehmer net hingfund hamm und noch auf der audohbaan rumgschdandn sinn …


	der Chris hat net dableib müss, der hat mit seim babba en „männerdaach“ gemacht und is mitm am Kiehmseh rumgschlichn und mitm schiffle auf die insln gfahrn und dort sinnse rumschdrolchd und hamm gebaadn, weils so warm war …


	und ich … ? … naja, was scho …?!?! … ICH war widder im saal rumgeleechn und hab die andern hünd beobacht und immer widderemahl e guddelich abschdaubt, wenn die Clarissa vorne zu arch rumghüpft is … … MIR mecht des ja nix aus, ich guck dann blohs, weilich ja weiss, wenn ich guck und emahl mit die ohrn wackl, dann griechich e guddelich fürs bravsein … … schlau, nä … ?


	einer von die andern hünd hat sich zu arch aufgereecht und drum hatter dann spähder mit seim babba ganz hintn sitz müss, wone die Clarissa nimmer gschdöhrt hat.


	middachs is der Chris kurz kommn. die zweifüsser hamm mitenander gessn und dann sinn mir widder nein saal und der Chris und der Thomas sinn weiter in der geechnd rumschtromert und hamm sich alts zeuch angeguckt.

wies semminahr aus war, simmer widder heimgfloochn, ähh …, -gfahrn …
ein guts hats aber doch noch kappt: die zweifüsser hamm alle mitenander gsacht, dasse soe gewaltkur nimmer machn – an eim daach nuntern Kiehmseh düs und widder nauf und weil unser dwingo jetzt ja dauernd krank is, könne ich und die alte heuer sowieso garnimmer nuntern Kiehmseh fahr – gottseidank … !


	es wochenend drauf hat der Chris sei erschts obidjenzdurniehr kabbt … … und sei mamma war ganz aufgereecht … simmer halt wiieeeder ganz frühs aufgschdandn und losgedühst … … diesmahl in die andere richtung …


	naja, ganz so e verlust wars net, weil des war net so weit wech und mir warn scho nachere schdund da, oder so. und weil die zeit noch gelangt hat, simmer erschdemahl gepfleecht rumgelaufn und hamm nach die mäus und karnickl geguckt. des hammer dann zwischndurch auch immer widderemahl gemacht, weil der Chris erschd schbähter drankommn is und mir uns gelangerweilt hamm, ich und die alte.

der Chris hat irchndwann zweimal was mach dürf. zuerscht isser aufm blatz rumgeleechn und schbähter isser rumgelaufn und mir hammem zugeguckt, wierer rumgelaufn is mit die Edith und mitm schduuard …
…ghört hatmern auch, weiler nadührlich beim rumliechn gauz hat müss. aber aufgschdandn is e anderer hund und davongelaufn …
… des war gut, dass der Chris dann net mit aufgschdandn und davongelaufn is …

für sei erschdes durniehr und dafür, dasser e blasnentzündung kappt hat vom Kiehmseh und antibioticka nemm hat müss, hatters gut gemacht und die Edith war danach ganz schdolz auf ihrn bubn! danach simmer widder heimgfahrn …

sternzeit 3.678,11

nass simmer auch worn …
… bis auf die haut …
… und dabei simmer bei schdraaaaahlendem sonnschein losgfahrn unds war warm, dassmer nur so gschwitzt hat!
mir sinn nei die Rööhn gfahrn mit die Flocke undm Chris, zum schwimmn - also mir hünd hamm schwimm woll, net die zweifüsser - aber erschd simmer in die geechnd rumgelaufn und hamm gschnufflt und nach hasn gsucht …
… und dann simmer in der Saale gschwommn, aber blohs ganz kurz, weil ...
… auf einmahl hat des des reechne angfangt …!
… wie wenn einer en kühbl wasser über dich drüberschütt und geblitzt und gedonnert hats! ich sachs euch …
… MIR mittn in die brährie gschdandn …!
… und dabei hat der Werner scho die ganze zeit gsacht, dassm der himml garnet gfällt und dass mir beschdimmt nass wern - ich fraach mich sowieso, warum die zweifüsser net gleich zum audoh zurück sinn, wenn der Werner scho gewusst hat, dasses reechnt … ?!?
… naja, wie gsacht, nass simmer dann auch worn, aber wie … !
… und die audohs miiindesdens e halbs jahr entfernt … !

so ein scheiss … !
… und nass, wie mir warn, hamm mir auch noch die ganze schdreck widder nach Rimbahr fahr müss. in Rimbahr da hat die alte sich von der Edith was zum anziehn geliehn und dann simmer halt in Rimbahr essn gangn und net in dere altn burch, wies vorher geblahnt war …

schad, dass keiner en foddoapperat dabei kappt hat, weil die alte hat scho gediechn ausgschaut: e hoose vom Thomas, weilere sonst von keim eine basst unds hemd von der Edith und auch die schuh warn von der Edith und vieeeel zu groß … *kicher*
… aber leider gibt’s halt gar kei foddos von demm ausfluuch …
… schad, ich glaub, ihr hätt euch über die „gebadene mäus“ kringelich gelacht …

nach oben

replica uhren