Juli 2007

letzte änderung am 2. august 2007

sternzeit 3.718,11

gestern und heut hammer dem Thomas sein geburtstag gfeiert.
… da simmer im gartn rumgerennt, hamm in der sonne geleechn und ich hab eweng dreck gfressn und mich gewelchert …
… die Janette hat mich und die andern geärchert …
… und is mit dem Justus rumgschbrungn, solanger da war …
… des is genausoe verrückte humml wie die Janette und die zwei sinn durch den gartn gfetzt …
… und die kleine zweifüsserwelpn sinn auch noch dazwischn rumgerennt und hamm uns hünd geärchert …
… odder vielmehr meistns hammse blohs die Janette geärchert, weil ich und der Chris, mir lassn uns net ärcher von zweifüsserwelpn …
… und der Justus war eh die meiste zeit im audoh rumghockt und hat blohs e schdund rausgedürft …

… sonst sagich jetzt dazu nixmehr, weil ihr kennt ja alle selber die zweifüssergeburtsdäächer, gell … ?
… en haufn von denne halt und dazu noch en haufn von die kleine zweifüsser …
… da is hund am näxtn daach froh, wenner sei ruh kriecht …

die alte is ja jetzt widder e baar daach daheim und da hattse dann immer so anfäll und zerrt mich durch die geechnd, weilich doch auch was hab soll von meim bissle leben, sachtse immer …
… und dann fahrn mir draußn rumm und guckn uns neue mäusewiesn an und laufn im wald rum …
… obwohl im wald isses net so schö, weilich da ja die alte net alleins rumlauf lass kann und die nervt, wennse am schdrick hängt …
… die will immer aufm weech bleib …
… und dabei isses doch woanders viel intressanter, weil des viechzeuchs, des hockt beschdimmt net auf die weeche rum – außer em dummn hasn vielleicht …

naja, iss vielleicht besser, wenn mir auf die weeche bleibn, weil wenn die alte hinfällt, die kriechich NIEEE alleins ausm wald raus zum audoh …
… obwohl …
… ich däht da scho gernemahl durchs unterholz schdrolch und nachguck, wer da alles wohnt …

wohnt …
… des is des schdichwort …
… WOHNEN duhn bei uns die hasn sogar aufm blatz … !

ich hab euch ja scho derzählt, dassich kürzlich da e hasnbäbi gfundn hab …
… ja, genau, des wo ich dann doch net dohtmach hab dürf …
… und jetzt rennt doch datsächlich noche has aufm blatz rum! oder isses gar derselbe … ?!?!
naja, jednfalls hammer den auch net kriecht – netemahl zu dritt … ! *schäm*

des war nämlich so …
… unser blatz is ja eingezäunt, nä … ?!
… damit keiner bei uns neikann …
… aber die hasn schdöhrt des net, die hüpfn frech um unsern blatz rum und manchmal auch AUFm blatz …
… und letztns, da warn mir scho 2 schdundn drobn und hamm kein hasn gsehn …
… und blötzlich fliecht demm Flocke sei ball neis gebüsch und skommt doch datsächlich e has rausgschossn – direkt vor dem Flocke seinerer nas … !

na, ja, hünd …
… ich schweich am bestn DAdrüber, wie der Flocke sich widder angschdellt hat …
… ihr wissts ja – der is doof, der kann noch netemahl en has fang, wenn derm selber in sei maul neihüpft …

der has also gerennt …
… der Flocke erschd dumm geglotzt und dann hinterher …
… net in „ichkriechdich“-gschwindichkeit, sondern eher wie „wogehstnduhin“ nachgelaufn …
… der has unterm zaun durch in die schleuse nei …

… hähähä …
… und da war dann ich …
… und die Kira … !

die Kira war mehr beim has als wie ich und weilich ja weiss, dass die weiber immer alles alleins ess wolln und mich haun, wenn ich hingeh …
… warich scho recht froh, dass die alte „pfui“ und „schluss“ und „aus“ gschrien hat …
… obwohlse garnet gewusst hat warum se schreit - weil sooo schnell is die alte nimmer, dass die des gleich auf die reie kriecht, wenne has rennt – binnich gleich hin zuere weil, wie gesacht, weiber …
… egal ob mit vier oder mit zwei füss …

naja, was sollich euch saach …
… alleins hat die Kira den has dann net kriecht …
… blohs es schwänzle …
… des war im zaun ghängt, weils loch zu eng war wo der has sich durchgequetscht kappt hat …
… des hatse dann hab könn …

also ICH hät den has ja kriecht … !
… ganz beschdimmt hättich den kriecht …

sternzeit 3.725,11

und nochemahl warn mir bei der Silvia …
… diesmahl zum gehirnjogging, wie die zweifüsser so gschwolln saachn …
… gschbielt hammer … !!!
… en ganzn daach lang und e mords freud hammer dabei kappt – die zweifüsser ball noch mehr wie mir hünd …

in der hauptsach isses drum gangn, guddelichs iiirchndwo und irchndwie aus zeuch rauszupfriemln, wennmers gfundn hat …
… und des war fei oft arch schwer …
… odder wisst IHR, wie mer e guddelich ausm babierkorb rauskriecht, der wo aufm kopf schdeht … ???
… du siehst des guddelich neifliechn in den babierkorb und du siehsts auch drin liechn …
… aber kriech dustes net …
… puhhhhh …, des is anschdrengend, da musste viel denk.


	oder du hast zwei hütli vor deiner nas schdehn … … und bei eim machts klickklack, wendes anschdubbst … … und beim andern net … grübelkopfrauchdenk … des musste dann rausfind, warum und welches du jetzt nemm musst, weil die zweifüsser sinn ja gemein, und drehn des um, wieses grad wolln …


	gottseidank habbich des ja net an demm daach es erschde mahl gemacht kappt und drum schmiern die MICH net so schnell aus, hähähä … … aber e baar von die hünd warn ganz schö verzweifflt dagschdandn und hamms net geblickt … … obwohl dene dann gholfn worn is – der eine, der hat sich dann blohs noch hingsetzt und gar nix mehr gemacht, der wollt blohs fort …


	wenn mir außn rumgeleechn sinn – die alte hat sich diesmahl gleich am anfang eine von die liechn gschnappt und hat sichs da bequem gemacht … … habbich im gebüsch die mäus belauert … … war ich beschäfdicht … … und in die bausn simmer alle mitenander rumgschdrolcht und rumgerennt.


	der Chris hat diesmahl daheim bleib müss, weil die Edith mit der Janette genuch zum duhn kappt hat und die Kira hat net mitgekönnt, weil die ja bei dere hitz mit ihrm kabuttn herz net den ganzn daach draußn rumlauf dürf. obwohl mir im schattn gschafft hamm, warn mir abnds dodahl ferdich von die hitz und von dere blaacherei und nachdenkerei …

… und ich hab drotzdem am näxtn daach widder ganz frühs aufschdeh müss, weil sonndaachs kommt die Frieda …

am soondaach wars ball 40 graad heiss und drum hat die alte mich nachm blatz heimgfahrn und is alleins mit die andern hünd durchs kiliani schdieflt.

erzähl kannich nix davon und auch net von dem bfleechedaach im alteleuthaus. da warn die Anka und der Chris alleins mitm Cento und der Nina …
… weil da wars dann auch der alten zu heiss und drum sinn mir da net hingangn …
… weil mir sinn ja scho alt, ich und die alte …
… und müssn ja schließlich net überall dabei sei …

sterzeit 3.732,11

des sommerfest war auch noch …
dodahl verreechnt wars am anfang …
… bis auf die haut nassworn binnich …
... und, drotz aller müh, kei einziche maus habbich gfundn, die warn alle in ihre löcher ghockt. denne wars auch zu nass …
... ich hab mich dann zur alten unters zelt ghockt und gewart, dass der reechn aufhört …
… aber des hat gedauert …
der Michl hat gsacht kappt, dasses um dreie aufhört zum reechne …
… und um 5 minutn nach dreie hats dahdsächlich aufghört und mir hamm widder aufm blatz rumschbring könn …

es sinn net arch viel leut zum sommerfest kommn, weils ja kei sommer war …
… aber mir hünd hamm uns amüsiehrt …
… mir hamm abwexlnd schbring dürf, immer e baar, net alle auf einmahl …
… außer mir, ICH war immer aufm blatz …

sternzeit 3.728,11

der Onkl Manfred is ins krankeleuthaus kommn und is ganz arch, arch krank.
woher ich des weiß, obwohlich net nei dürf ins krankeleuthaus … ?
… die alte hat scho e baarmahl gheult wechene …

der Onkl Manfred is gfahrn mit seim fahrrad aufm radweech und blötzlich issm eins von die kleine zweifüsser vor sei fahrrad gerennt …
… und dann hat der Onkl Manfred en hackn schlaach müss, wie die hasn …
… und is runtergfalln von seim fahrrad …
… und dann warer wech – näh … -, er war net fort, aber er hat gschlaafn, mindestens 5 minutn und er weiss auch garnix mehr von dem runterfalln. sei hut, den worer aufghabt hat, der war ganz kabutt und im radio hammse gsacht, dasse radfahrer schwer verletzt is , aber wenner kein hut aufghabt hätt, dann wärer doht gewesn, weiler aufn kopf gfalln is – und weil der hut jetzt ganz kabutt is. aber der Onkl Manfred fähr nie ohne hut fahrrad, weil der hat auch scho eier aufgschlaachn, sacht die alte, und des is desselbe, wemmer aufn kopf fällt, wie wemmer e ei kabutthaut.

jetzt liecht der Onkl Manfred im ZOM, so heisst des krankeleuthaus. sei links hinterbein is abgebrochn und weils ganz obn is, da wo die kuuchl is, hammsen obberier müss. und sei kabutte schulter und der arm is auch widder kabutt, aber gottseidank net abgebrochn, blohs ganz dick gschwolln.

des schlimmste is aber, dasser garnet da ist, der Onkl. Manfred …
… der red lauter wirrs zeuch und will immer fortgeh von seim bett und weil des hinterbein scho widder ganz gut is – sinnja schraubn drin – is der scho widder recht flink auf die bein.
die krankn schwestern hamm fei scho ganz schö zum duhn, dassen bändichn, weil sonst däht der abhau!!!

naja, er is halt auch nimmer der jüngste …
… ich kenn des ja vom altelauthaus, da wo ich jede woche hingeh …
… da sinn auch ganz viele wirre alte leut …
… und da mussmer auch aufbass, dass die net abhaun …

mittlerweile gehts dem Onkl Manfred eweng besser under kommt die näxte woch wahrscheinlich, wenns so weiter berchauf mitm geht, auf ree ha ...

... aber die Teiny hats leider net gschafft ...

die is ja scho die ganze zeit krank gewesn, des habbich euch ja derzählt ...
... dassdes scho seit eim jahr so zugeht mit ihrm duumohr am darm.

aber jetz isses ganz schlimm worn und die Teiny immer wenicher ...
... und da hat der dokter gemeint, des geht net so weiter und dassmerse obberier muss. entweder isses danach besser, oder ....


	die Teiny is aus der narkohse nimmer aufgewacht ... ... und wartet “jenseits des horizonts” auf uns alle ... ... sacht die alte ... ... und ich glaubere des ... ... ich dreff die Teiny da widder ... ... ganz beschdimmt ... dschüss, Teiny, guck dich schonemal um und wennich komm, dann fangn mir mitenander mäus ...

nach oben

replica uhren